كەشەلى بەرى اقىندار تۋرالى ءار ءتۇرلى اڭگىمە بوپ جاتىر عوي. وندا كەلگەن ەكەنبىز، قازاقتار. بايقاساڭىزدار، اقىندار ءولىپ جاتىر، نە ىستەرىن بىلمەگەندىكتەن قىزىق قىلىقتار كورسەتىپ جاتىر، اي استىنداعى تۇنگە، كۇن استىنداعى الەمگە سىيماي ءجۇر. بۇل جاي ەمەس، ءتىپتى تەگىن ەمەس. بۇل الەۋمەتتتىك قاتىناستارعا قويىلعان دياگنوز. زامان وزگەرەر الدىندا، كۇردەلى بەتبۇرىستار قارساڭىندا جۇرت يا اقىنعا شۇيلىگىپ تيىسەدى يا اقىندى قورعان كورەدى. بوراننىڭ الدىندا يت قۇتىرسا، وزگەرىستەر الدىندا اقىننىڭ ءمىنەزى وزگەرەدى. مۇنداي الاعاي شاقتا اقىننىڭ قۇلازۋى ءتىپتى كۇشەيەدى، دۇنيەدەن باز كەشەدى، جىلاڭقى بولادى، قيسىق سويلەيدى، ايقايلايدى، قولدارىن سەرمەپ، ەبەدەيسىز قيمىلدار جاسايدى، جانىنا تىنىشتىق تاپپاي الاسۇرادى. سەبەبى، اقىن قاشاندا قوعامنىڭ بارومەترى بولعان. بۇل ءوزىمدى نەمەسە قالامداس دوستارىمدى كوتەرمەلەپ، ءقادىرىن ارتتىرۋ ماقساتىندا ايتىلعان ءسوزىم ەمەس. بۇل بۇگىنگى ۇلتتىڭ باسىنداعى جاعدايدىڭ، حالىقتىڭ ىشتەي تىنىپ، الابۇرتا الاعىزىپ وتىرعان كۇيىنىڭ اقىننىڭ تۇيسىگىندە شىڭعىرۋى، ابدىراعان ەلدىڭ اقىننىڭ بولمىسىندا كورىنىس تابۋى دەپ ءبىلىڭىز. وسىدان كەيىن اقىن ءۇشىن ساياساتتىڭ، ءتىل مەن ۇلتتىڭ بولاشاعى قاجەت ەمەس دەپ كورىڭىز. بۇدان كەيىن اقىندار قيالي، ولار باسقا الەمدە ۇشىپ جۇرەدى، ولارعا ءبارىبىر دەپ كورىڭىز. اقىن - ءار ادامنىڭ ىشىندە بولىپ جاتقان سانسىز سەزىمدەردى جالعىز ءوزى باسىنان كەشىرەدى. ءبارى وڭاي، ءبارى ويىن بولسا، بۇگىن قاننەن قاپەرسىز 45ء-ىن تويلاپ وتىراتىن ءامىرحانعا نە كورىندى دەيسىزدەر؟! الدە اقىن ولگەن سوڭ عانا اۋليە مە؟ ولگەن ادام ولەڭ جازبايدى، شىراقتار!