"1928 جىلى ستالين باستاعان سوۆەت وكىمەتى بۇكىل بايلاردى كامپەسكەلەۋ، ەلدى ۇجىمداستىرۋ ناۋقانىن باستايدى. مىنە، وسى ناۋقانعا قارسى قارسى شىعادى-اۋ دەگەن كوزى اشىق ادامداردى الدىن الا تۇتقىنداپ، تۇرمەگە جاۋىپ تاستايدى. احمەت بايتۇرسىن ۇلى، ءمىرجاقىپ دۋلات ۇلى، جۇسىپبەك ايماۋىت ۇلى، مىرزاعازى ەسپولوۆ باستاعان الاش قايراتكەرلەرىن ۇستاپ، تۇرمەگە جابادى. سوندا ولارعا تاعىلعان باستى ايپتىڭ ءبىرى امانگەلدىنىڭ ءولىمى بولاتىن.

الاشورداعا قاتىستى 12 تومدىق تەرگەۋ ىستەرىنىڭ بەتتەرىندە ءمىرجاقىپ دۋلاتوۆتىڭ ءوز قولىمەن ورىس تىلىندە جازىپ بەرگەن تۇسىنىكتەمەسى بار. "مەن امانگەلدى يمانوۆتىڭ ولىمىنە كىنالىمىن. ءبىراق تىكەلەي ونى ولتىرگەن مەن ەمەس. مەن جاۋاپكەرشىلىگىمدى سەزىنەمىن. ويتكەنى، كۇدىكپەن امانگەلدىنى تۇرمەگە جاۋىپ قويدىق. "قوستاناي جاقتان قىزىلداردىڭ ءوتريادى كەلە جاتىر" دەگەن حاباردى ەستىگەن سوڭ مەن وتريادتىڭ ءبىر بولىگىن الىپ، تورعايدان 30 شاقىرىمداي جەردە سولاردىڭ الدىنان شىقتىم..."،-دەپ جازادى ول. قىسقاسى، امانگەلدى ولتىرىلگەن كەزدە ءمىرجاقىپتار قالادا بولماعان.

امانگەلدىنى ناقتى كىمنىڭ ولتىرگەنى بەلگىلى. ول انىقتالعان. اسپانديار كەنجين دەگەن ازامات كەزىندە الاشوردانىڭ مۇشەسى بولعان. تورعايدا "الاش" وتريادىنىڭ شارۋاشىلىق جاعىن باسقارعان. كەيىنىرەك سوۆەت وكىمەتى تۇسىندا ىشكى ساۋدا حالىق كومميسارى، وقۋ-اعارتۋ حالىق كومميسارى بولىپ قىزمەت ىستەگەن. 1938 جىلى اتىلىپ كەتكەن. سول اسپانديار كەنجينگە قاتىستى مۇراعاتتا ءبىرشاما قۇجاتتار بار. سونىڭ بىرەۋى ماشينكاعا باسىلعان، ەلۋ بەتتەن اسادى. كەزىندە پارتيالىق تازالاۋدان وتكەن اسپانديار كەنجين بۇركىتالى سەيسەكەنوۆ دەگەن ادامنىڭ تۇرمەدەن سۇيرەپ شىعارىلعان امانگەلدىگە پىشاق سالىپ ءولتىرىپ، سوسىن موينىنا قىل شىلبىر سالىپ، ات قۇيرىعىنا بايلاپ جىبەرگەنىن جازادى.