قازاننىڭ 19-ى كۇنى قازاقستاننىڭ ءۇش بىردەي مينيسترلىگى: ءبىلىم جانە عىلىم، ادىلەت، ءدىن جانە ازاماتتىق قوعام مينيسترلىكتەرى قازاقستان زاڭناماسىنا سايكەس ءدىني باعىتتاعى كيىمدەردى مەكتەپكە كيۋگە تىيىم سالىنعانىن مالىمدەگەن ەدى. «قامشى» پورتالى ءوزىنىڭ ەركىن وي مىنبەرى ەكەنىن ەسكەرتە وتىرىپ، «تامشى» سايتىندا جاريالانعان جاسۇلان جۇسىپبەكوۆ ەسىمدى ءدىني قىزمەتكەردىڭ ورامالعا تيىم سالۋعا قاتىستى پىكىرىن ۇسىنادى.

«قۇرمەتتى مۇسىلمان باۋىرلار، قازىرگى كۇندە كوتەرىلىپ جاتقان ەڭ ۇلكەن ماسەلە ايەل ادام ۇياتتى جەرلەرىن، اۋرەت جەرلەرىن جاۋىپ ءجۇرۋ ماسەلەسى. ول، ورامالمەن جابا ما، ارابشا ايتقاندا حيدجاپپەن، قازاقشا ايتقاندا كيمەشەكپەن جابا ما، الدە سپورتتىق كيىممەن جابا ما، ماتامەن جابا ما قانداي دا ماتەريالمەن ايەل ادامنىڭ ۇياتتى جەرىن جابۋى حالىقتىڭ اراسىندا، مۇسىلمانداردىڭ اراسىندا، ۇكىمەتتىڭ اراسىندا قاتتى كوتەرىلىپ جاتىر. وسىعان قىسقاشا توقتالا كەتسەك:

بىرىنشىدەن، ايەل ادام باليعات جاسىنا تولعاندا ەكى قولى مەن بەتىنەن باسقا جەرىن جابۋى پارىز. بۇل، اللانىڭ ءامىرى. قۇراندا كەلەدى. اللا تاعالا بۇيىرعان پارىز نارسە باسقا بىرەۋ پارىز ەمەس دەپ جوققا شىعاراتىن بولسا، وندا، ول ادام دىننەن شىعادى، كاپىر بوپ كەتەدى. ال، ەگەر مويىنداپ تۇرىپ، «مەن بىلەم عوي پارىز ەكەنىن، ءبىراق تاعا المايمىن، تاقپايمىن قانداي دا ءبىر سەبەپپەن» دەسە، وندا، ول ادام دىننەن شىقپايدى، ءبىراق كۇناھار بولادى دەيدى عالىمدار. سوندىقتان، ۇكىمەتتىڭ، مينيسترلىكتىڭ مەكتەپتەردە، باسقا دا ورگانداردا «ورامال تاققىزبايمىز» دەگەنى تىكەلەي دىنگە قايشى. يمام تاحاۋيدىڭ «ءبىز باسشىعا بۇيسۇنامىز» دەپ ايتقان ءسوزى بار. «باسشىعا بۇيسۇنۋ ءۋاجىپ، تەك اللانىڭ امىرىنە قارسى كەلمەيتىن ماسەلەلەردە» دەيدى. مىسالى باسشىمىز، دىنگە، قۇران-حاديسكە قايشى ىسكە بۇيىرسا، ياعني، اراق ءىش دەپ بۇيىرىپ جاتسا، زينا جاسا دەپ بۇيىرىپ جاتسا، ورامال تاقپايسىڭ، اۋرەتىڭدى جاپپايسىڭ دەپ بۇيىرىپ جاتسا وندا ول جەردە ادامنىڭ ءامىرى ەمەس اللانىڭ ءامىرى ءبىرىنشى ورىنعا قويىلادى. ۇكىمەت باستاپ وتىرعان ورامال تاققىزباۋ ماسەلەسى قولعا الىنسا، مەن باليعات جاسىنا تولعاندا قىزىمدى مەكتەپتەن شىعارىپ الامىن. ويتكەنى، اللانىڭ ءامىرى ءبىرىنشى ورىندالادى. ال، باسشىلىقتىڭ ايتقانى اللا امىرىنە قايشى كەلمەسە عانا ورىندالادى. ياعني، وسى ماسەلەدە اللانىڭ امىرىنە قارسى كەلگەندىكتەن باسشىنىڭ امىرىنە بۇيسۇنىلمايدى.

يمام تاحاۋي اشىپ ايتقان: «باسشىلار زۇلىمدىق قىلسا دا ءبىز وعان بۇيسۇنامىز. وعان سابىر، تاۋپيح بەر، تۋرالىق بەر دەپ دۇعا قىلامىز، اللانىڭ امىرىنە قارسى جۇمساسا بۇيسۇنىلمايدى» دەپ.

ەكىنشىدەن، وسى ماسەلەنى كوتەرىپ، ەلباسىنان، ەلدىڭ باسىندا وتىرعان اعالاردان كومەك سۇراپ، جەر-جەردەن قول جيناپ پەتيسيا ۇيىمداستىرامىز. وسىنى ىسكە اسىرماۋىن، مۇسىلماندار قۇقىعىن قورعاۋىن تالاپ ەتەمىز. وبلىستاردا، اۋدانداردا زاڭگەرلەردى تارتىپ، ازاماتتاردى پەتيسياعا قول قويۋعا شاقىرامىز. بۇنى مۇسىلماندار قۇقىعىن قورعاۋ دەپ ءتۇسىنۋىمىز كەرەك. شاريعات شەڭبەرىنەن، زاڭ شەڭبەرىنەن شىقپاۋىمىز كەرەك. اتا زاڭىمىزبەن شاريعاتىمىز قايشى كەلىپ قالعان جاعدايدا ءبايبىت جولمەن، ەل اعالارىنا حات جازۋ ارقىلى قۇقىعىمىزدى قورعاپ قالۋعا ات سالىسايىق.