Qamshy.kz وتكەن كۇننىڭ ءبىرقاتار وقيعالارىنا شولۋ جاسايدى.
قازاقپاراتتىڭ جازۋىنشا، بالقاشتىق لاڭكەستەر 11 كەلى جارىلعىش زات دايىنداعان. قاراعاندى وبلىسىندا لاڭكەستەردى دايىنداۋ تۋرالى قىلمىستىق ىستە فيگۋرانتتاردىڭ ءبىرى تەرگەۋگە جاردەمدەسىپتى. بۇل تۋرالى ادۆوكات عالىم نۇرپەيىسوۆ:
«مەنىڭ قورعاۋىمداعى ەرلان ۇسەنوۆ قاتىسۋشى ەكەنىن مويىندادى. باسىنان باستاپ ول ۇسىنىسقا كۇدىكپەن قاراعان. ۇستالعان ساتتەن باستاپ تەرگەۋمەن ىنتىماقتاسا جۇمىس ىستەپ، جاردەمدەستى. سوندىقتان تەرگەۋ ۋاقىتىندا پروسەسسۋالدىق كەلىسىمگە كەلدىك»، - دەپ مالىمدەگەن.
ونىڭ ايتۋىنشا، قورعاۋشىسى قۇپيا ورىندا ساقتالعان بارلىق جارىلعىش زاتتاردى كورسەتىپ، ايعاقتى دالەلدەر بەرگەن. ادۆوكاتتىڭ ايتۋىنشا، جاسىرىن ورىندا 11 كەلى جارىلعىش زات بولعان. «بۇل قىلمىستىق ءىستىڭ ماتەريالدارى، ءالى دە زەردەلەندى»، - دەگەن ادۆوكات، لاڭكەستىك توپتى قۇرۋعا نە يتەرمەلەگەنىن انىقتاۋ قاجەت ەكەنىن ايتتى. «ءبىز بۇل جاعدايعا نە تۇرتكى بولعانىن انىقتايتىنىمىزعا سەنەمىن. مۇنداي وقيعا اقتوبەدە دە، الماتىدا دا ورىن الدى. ەڭ باستىسى، بولعان وقيعاعا نە سەبەپ بولعانىن انىقتاۋ»، - دەپ اتاپ وتكەن نۇرپەيىسوۆ.
***
ال، الماتىدا تيميريازيەۆ پەن ماركوۆ كوشەلەرىنىڭ قيىلىسىندا ورنالاسقان "الاتاۋ گراند" بيزنەس ورتالىعىنىڭ ماڭىندا اتىس بولدى، - دەپ حابارلادى Tengrinews.kz. اتىس بولعان بيزنەس ورتالىقتىڭ ىشىندە "سبەربانك" پەن ۆتب بانكتەرىنىڭ بولىمشەلەرى ورنالاسقان.
كۋاگەرلەردىڭ ايتۋىنشا، اتىس تۇسكى ۋاقىتتا بولعان. بانك بولىمشەسىنىڭ كۇزەتشىسى بيزنەس ورتالىقتىڭ الدىندا اتىس بولعانىن حابارلاعان. كۇزەتشىنىڭ ايتۋىنشا، اتىستان بانك كليەنتى زارداپ شەكتى.
ەسكە سالا كەتسەك، 25 قازاندا الماتىدا "سەنتركرەديت بانكتىڭ" مانشۇك مامەتوۆا كوشەسىندەگى بولىمشەسىندە بەلگىسىز ادامدار كۇزەتشىنى سوققىعا جىعىپ، تراۆميتيكالىق قارۋىن تارتىپ الىپ كەتكەن ەدى. شابۋىلدان كۇزەتشى جەڭىل جارالانعان. پوليسيا ول وقيعا بويىنشا دا "قاراقشىلىق شابۋىل" بابىمەن ءىس قوزعاعانىمەن ازىرگە قىلمىسكەرلەردىڭ ۇستالعانى تۋرالى حابارلانبادى.
***
Tengrinews.kzء-تىڭ تاعى ءبىر حابارىنا ساي، تارازدا وفيسەر اسكەري بولىمدەگى باقىلاۋ كامەراسى الدىندا وزىنە قول سالعان. تارازدا اسكەري ءبولىم قويماسىندا وزىنە قول سالعان 46 جاستاعى پراپورششيك بولعان. "№ 5513 اسكەري ءبولىمىنىڭ قارۋ قويماسىنىڭ اۋماعىندا 27.05.1970 جىلى تۋعان پراپورششيك راپيشيەۆ ۇسەن تۇرسىنقۇل ۇلى ءوزىن جۇرەك تۇسىنان جارالادى. العان جاراقاتتان وقيعا ورنىندا كوز جۇمدى"، - دەلىنگەن ق ر ۇلتتىق ۇلانى "وڭتۇستىك" وڭىرلىك قولباسشىلىعىنىڭ حابارىندا.
اقپارات بويىنشا، ءبىراز ۋاقىت بۇرىن ارتىندا ءتورت بالاسى قالعان راپيشيەۆ جۇمىستان شىعارىلعان. سونىمەن قاتار، 46 جاستاعى راپيشيەۆتىڭ سول كۇنى كەزەكشى بولعانى جانە وزىنە باقىلاۋ كامەرالارى الدىندا قول سالعانى بەلگىلى بولدى.
***
«قامشى» ءتىلشىسى وقىرماندارعا «قورعانىسىمىز قانداي كۇيدە؟» دەگەن سۇراق تاستايدى. الماتىدا كۇلەكبايەۆ ىسىنەن كەيىن قورعانىستىڭ «سارى دەڭگەيى» جاريالانىپ، قاۋىپسىزدىك شارالارى بارىنشا قولا الىنعان بولاتىن. سوعان قاراماستان ءبىر اپتانىڭ ىشىندە ەكى بىردەي اتىس بولدى...
ال، سالافيزمگە زاڭمەن تيىم سالا الماي جاتقان مىنا كۇنىمىزدە، لاڭكەستەر ەمىن-ەركىن ونداعان كيلو جارىلعىش زات دايىنداپ جاتقانى نەنىڭ نىشانى؟ ولار ماقساتىنا جەتىپ، بومباسىن جارا قالسا نە بولار ەدى؟ ەل قورعايتىن ەرلەرىمىزدى ايدىڭ-كۇننىڭ امانىندا وزىنە قول سالۋعا نە يتەرمەلەيدى؟ ال، بەسىكتەن بەلى شىقپاي، باليعات جاسىنا تولماي بالاعى قىسقارىپ، ميى شايىلىپ جاتقان قانشاما جاستارىمىز بار؟ رۋحىمىز نە كۇيدە؟
قورعانىس دەمەكشى، اقوردانىڭ باسپا ءسوز قىزمەتى كەشە پرەزيدەنتتىڭ قورعانىس ءمينيسترىنىڭ ەكى ورىنباسارىن قىزمەتىنەن بوساتقانىن حابارلادى. مەملەكەت باسشىسىنىڭ وكىمدەرىمەن نۇرلان ەرمەك ۇلى ساۋرانبايەۆ قازاقستان رەسپۋبليكاسى قورعانىس ءمينيسترىنىڭ ورىنباسارى قىزمەتىنەن؛
بەرىك شولپانقۇل ۇلى شولپانقۇلوۆ قازاقستان رەسپۋبليكاسى قورعانىس ءمينيسترىنىڭ ورىنباسارى قىزمەتىنەن بوساتىلعان.
