بىشكەكتەن ماسكەۋگە بەت العان، 20 قىرعىزستاندىق وتىرعان اۆتوبۋس قازاقستان اۋماعىندا جول-كولىك اپاتىنا ۇشىرادى، - دەپ حابارلايدى قازاقپارات. 

«30 قازان كۇنى قازاقستان اۋماعىندا شامامەن تاڭعى 04:00-دە  قىرعىزستاننىڭ 20 ازاماتى وتىرعان اۆتوبۋس اۋدارىلدى. بارلىق جولاۋشى ەلەۋلى جاراقات الدى. بەس ادام اۋىر جارالانىپ، اۋرۋحاناعا ءتۇستى»، -  دەپ جازدى اۆتوبۋس جولاۋشىسى نۋركىز نازاركۋلوۆا ءوزىنىڭ Facebook پاراقشاسىندا.

قازاقستانداعى قىرعىزستان ەلشىلىگى اقپارات الۋ ماقساتىندا ق ر ءسىم كونسۋلدىق قىزمەتىمەن، ق ر ءىىم كەزەكشى بولىمىمەن، ق ر ءىىم  توتەنشە جاعدايلار جانە جول پوليسياسى كوميتەتتەرىمەن جانە اقمولا، قاراعاندى، سولتۇستىك قازاقستان، قوستاناي جانە اقتوبە وبلىسىنداعى ءىىد كەزەكشى بولىمدەرىمەن كونسۋلتاسيالار جۇرگىزگەنىن حابارلادى.

«جوعارىدا اتالعان قۇزىرەتتى ورگانداردىڭ مالىمەتتەرىنە سۇيەنسەك، بۇل جول-كولىك وقيعاسى تىركەلمەگەن. سونىمەن بىرگە، ەلشىلىك تەلەفون ارقىلى ن.نازاركۋلوۆامەن تىلدەستى. ونىڭ ايتۋىنشا، 2016 جىلى 29-نان 30-قازانعا قاراعان ءتۇنى تاڭعى 05:30-دا ق ر اقتوبە وبلىسىندا مەرسەدەس-سپرينتەر جۇرگىزۋشىسى كولىكتى باسقارا الماي، جىراعا ءتۇسىپ كەتكەن»، - دەپ حابارلايدى ەلشىلىك.

ەلشىلىكتىڭ حابارلاۋىنشا، سالوندا 18 جولاۋشى جانە 2 جۇرگىزۋشى بولعان. جول-كولىك اپاتىنان جۇرگىزۋشىلەر مەن جولاۋشىلار ءتۇرلى جاراقات العان. اقتوبە وبلىسى حرومتاۋ اۋدانىنىڭ دارىگەرلەرى قاجەتتى كومەك كورسەتكەن سوڭ، 13 جولاۋشى وزگە اۆتوكولىكپەن رەسەي فەدەراسياسىنا ءجۇرىپ كەتتى. 5 زارداپ شەگۋشى قىرعىزستانعا قايتۋ تۋرالى شەشىم قابىلدادى.

«ن.نازاركۋلوۆانىڭ ايتۋىنشا، جۇرگىزۋشى-تاسىمالداۋشىلارعا ەش شاعىم بولماعاندىقتان، ق ر قۇزىرلى ورگاندارىنا رەسمي حابار بەرىلمەگەن. مەرسەدەس-سپرينتەر بىشكەك قالاسىنان ماسكەۋگە باعىت العان، ونداعى جولاۋشىلار مەن جۇرگىزۋشىلەر قىرعىزستان ازاماتتارى»، - دەپ حابارلايدى ەلشىلىك.