قالامگەرلەر ءۇشىن قۋان ءسۇيىنشى حابار! كەلەر جىلدان باستاپ مەملەكەت جازۋشىلاردىڭ جاعدايىنا قاراسپاق. ياعني ادەبيەتشىلەرگە بيۋدجەت ەسەبىنەن قالاماقى تولەنىپ، ۇرپاق تاربيەسىنە قاجەتتى دەپ تانىلعان قۇندى كىتاپتارى بەس مىڭ دانامەن باسىپ شىعاراتىن بولدى،- دەپ حابارلايدى Qamshy.kz.

ءتول ادەبيەتتى دامىتۋعا باعىتتالعان بۇل زاڭ جوباسىن كەشە  دەپۋتاتتار مەن مادەنيەت مايتالماندارى تالقىلاپ جاتىر. سۋ جاڭا قۇجات ساراپشىلاردىڭ سۇزگىسىنەن كەيىن پارلامەنتكە جولدانادى.

مادەنيەت سالاسىنا تىڭ سەرپىن بەرەتىن جاڭا زاڭ جوباسىنىڭ الماتىدا تالقىلانۋى بەكەر ەمەس. اقىن-جازۋشىلار شوعىرلانعان، ادەبي ورتا قاشان دا وسى وڭتۇستىك استانادا بولعان. قۇجاتتىڭ قابىلدانۋىنا، اسىرەسە، قالام ۇستاعان قاۋىم اسا مۇددەلى. سەبەبى، بۇل جولعى زاڭدا جازۋشىلارعا بيۋدجەت ەسەبىنەن قالاماقى تولەپ، شىعارمالارىن تەگىن كىتاپ ەتىپ باسىپ شىعارۋ  قاراستىرىلعان. ول ءۇشىن مەملەكەت ەسەبىنەن ءبىر جارىم ميلليارد تەڭگە ءبولۋ كوزدەلىپ وتىر ەكەن. 

پارلامەنت ءماجىلىسى ءتوراعاسىنىڭ ورىنباسارى گۇلميرا يساتايبەك قىزى

- «قازاقتىڭ ارىق ايتىپ، سەمىز شىق» دەگەن ءسوزى بار، سىزدەرگە تارقاتىپ ايتساق بۇدان بىلاي مەملەكەت قانداي دا ءبىر رەداكسياعا كەلىپ وتىرعان جازۋشىنىڭ شىعارماسىن قوعامعا، رۋحانياتقا كەرەك دەپ تانىسا، اۆتوردان ساتىپ الىپ، سول شىعارماسىنا قالاماقى تولەيدى. بۇگىنگى ۇكىمەتتىڭ جاساعان جوباسى بويىنشا گونورار قۇنى ءبىر باسپا تاباققا 150 مىڭ تەڭگە بولادى.

 
وسىلايشا ءتول ادەبيەتتى دامىتۋ ماسەلەسى ەندى زاڭ ارقىلى رەتتەلمەك. سەبەبى، سوڭعى ۋاقىتتا جازۋشى دەگەن اتتىڭ قادىر-قاسيەتى جوعالىپ بارادى دەيدى قالامگەرلەر. اتاق-داڭققا الدانىپ كەلگەن اقىن-جازۋشىلاردى الاڭداتاتىن دا سۇراقتار بار. ماسەلەن، بيۋدجەت ەسەبىنەن قارجىلاندىرىلىپ، قالاماقىسى تولەنگەن شىعارمالارعا شەكتەۋ كوپ بولۋى مۇمكىن دەيدى جازۋشىلار. الايدا زاڭ شىعارۋشىلار ەشكىمنىڭ اۋزىنا قاقپاق قويماي قالامگەرلەرگە شىعارماشىلىق ەركىندىك بەرىلەدى دەپ وتىر.

بەكبولات تىلەۋحان، ءماجىلىس دەپۋتاتى

-كوپ جاعدايدا دايىن ادەبيەتتى الامىز. ويتكەنى جازعان كەزدە بىلاي جاز دەپ ايتۋ كونستيتۋسياعا قايشى. ويتكەنى ونىڭ قالامىنا تۇساۋ بەرۋ سەنزۋرا بولىپ كەتەدى. ال سەنزۋرا كونستيتۋسيامىزعا تومپاق كەلەتىن دۇنيە.

وسىنداي كەمشىن تۇستار بولماس ءۇشىن اتالعان زاڭ جوباسى اقىن-جازۋشىلار مەن قوعام قايراتكەرلەرىنىڭ تالقىسىنا ءتۇسىپ وتىر. قۇقىقتىق قۇجات ساراپشىلاردىڭ سۇزىگىسىنەن وتكەن سوڭ جاڭا جىلعا دەيىن قابىلدانادى دەيدى دەپۋتاتتار.