باتىس قازاقستاندا تاۋلىك بويى تولاسسىز جاۋعان قار اعاش بۇتاقتارىن سىندىرىپ،  ەلەكتر جەلىلەرىن زاقىمدادى. ءقازىر ءتورت اۋداننىڭ تۇرعىندارى جارىقسىز وتىر. وبلىستىڭ كوممۋنالدىق قىزمەت توتەنشە جاعداي سالدارىن جويىپ جاتقانىمەن، جۇمىستارى ونەتىن ەمەس.

بۇل تۋرالى كتك ارناسى حابارلايدى. 

بۇعان دەيىن توتەنشەلىكتەر باتىس قازاقستان وبلىسى بويىنشا اۋا رايىنىڭ كۇرت سۋىيتىنى جايىندا ەسكەرتۋ جاساعان. وڭىردە كۇنى بويى جاۋعان قارعا جىلدامدىعى سەكۋندىنا 20 مەترگە دەيىن جەتەتىن جەل قوسىلىپ، ارتى اق تۇتەك بورانعا اينالدى. مامانداردىڭ ايتۋىنشا، ءبىر تاۋلىكتىڭ ىشىندە بۇل ايماققا اق ۇلپانىڭ ون كۇندىك مولشەرى تۇسكەن. تابيعاتتىڭ مۇنداي توسىن سىيىنا وبلىس ورتالىعىنىڭ كوممۋنالدىق قىزمەتى دە دايىن بولماي شىقتى. بار تەحنيكاسى مەن 300-دەي جۇمىس قولىن جۇمىلدىرعانىمەن كوشەلەردى قاردان تازالاپ ۇلگەرەر ەمەس. قار اعاش بۇتاقتارىن سىندىرىپ، ەلەكتر جەلىلەرىن دە زاقىمداعان.

نۇرجان  قاجكەنوۆ،  بقو تجد ءبولىم باستىعى:

-اعاشتاردىڭ قۇلاۋىنىڭ سەبەبىنەن ەلەكتر ەنەرگياسىنىڭ جەلىلەرى ءۇزىلىپ، سونىمەن قازىرگى ۋاقىتتا زەلەنوۆ اۋدانى دارينسك اۋىلىندا 302 ابونەنت  جانە تەرەكتى اۋدانى  بوگدانوۆ اۋدانىندا 257  ابونەنت قازىرگى ۋاقىتتا ەلەكتر قۋاتىنسىز قالۋدا.