تارازداعى 5513 اسكەري بولىمىندە 46 جاستاعى پراپورششيك تابەلدى قارۋىمەن اتىلىپ ءولدى. زەينەتكە شىعۋىنا نەبارى 5 اي قالعان ۇسەن راپيشيەۆتى مۇنداي قادامعا نە يتەرمەلەگەنى ءقازىر تەكسەرىلىپ جاتىر. ال مارقۇمنىڭ جاقىندارى ونىڭ سۋيسيد جاساۋىنا باسشىلىق تاراپىنان كورگەن قىسىم سەبەپ ەكەنىنە سەنىمدى. سوندىقتان 4 بالاسىمەن ەڭىرەپ قالعان جەسىرى كىنالىلەردىڭ قاتاڭ جازاعا تارتىلۋىن سۇراپ وتىر.

بۇل تۋرالى كتك ارناسى حابارلايدى. 

اتپالداي ازاماتتىڭ مەزگىلسىز قازاسى جاقىندارىنىڭ قابىرعاسىن قايىستىردى. 5513 اسكەري بولىمدە قارۋ-جاراق قويماسىنىڭ باستىعى بولعان ۇسەن راپيشيەۆتىڭ ءولى دەنەسى وتكەن جۇما كۇنى ءوزىنىڭ جۇمىس ورنىندا تابىلعان. تۋىستارىنىڭ ايتۋىنشا، ول ءوزىن تابەلدى قارۋىمەن جۇرەك تۇسىنان اتىپتى. 46 جاستاعى ازاماتتىڭ سوڭىندا ايەلى مەن 4 بالاسى قالدى.

اياگوز راپيشوۆا، ءۇ.راپيشيەۆتىڭ جەسىرى:

ء-قازىر ول كەتتى. ءقازىر ويلانىپ وتىرمىن ەرتەڭ مىنا ءتورت بالا-شاعاما تاماقتى قايدان تاۋىپ بەرەمىن. مەن قالاي بۇلاردىڭ وقۋىن تولەيمىن. قالاي ەلدىڭ اراسىنا شىعارامىن، ايتىڭىزدارشى. مەنىڭ جالعىز تىرەگىم سول بولاتىن. بۇلاردى قالاي جەتكىزەرىمدى بىلمەيمىن.  

بەس ايدان سوڭ زەينەتكە شىققالى جاتقان ازاماتتىڭ بۇلايشا اجال قۇشۋى كوپتىڭ كۇدىگىن تۋعىزدى. مارقۇمنىڭ باۋىرلارى ونى ولىمگە باسشىلارى يتەرمەلەگەنىنە سەنىمدى. ايتۋلارىنشا، ۇسەننىڭ سىڭارى اسان دا وسى مەكەمەدە كينولوگ قىزمەتىن اتقارعان. الايدا ءبىر جىل بۇرىن باسشىلىعى وعان وتەماقى بەرمەي زەينەتكە شىعارىپ جىبەرگەن. قارجىنى داۋلاعان اسان اسكەري پروكۋراتۋراعا ارىز جازىپتى. سودان بەرى اسكەري شەندىلەر ءىنىسىڭ سوڭىنا ءتۇسىپتى-مىس. ءسويتىپ، مارقۇمنىڭ ولەرىنەن ءبىر كۇن بۇرىن جۇمىسقا كەشىككەنىن جەلەۋ ەتىپ قىزمەتىنەن بوساتپاق بولعان كورىنەدى.    

اسان راپيشيەۆ، ءۇ.راپيشيەۆتىڭ اعاسى:

- وسى كوماندير پولكانىڭ تاپسىرماسى بويىنشا، زام پو تەحقا دا مۇمكىن تاپسىرما بەرگەن شىعار. اقىرى سىڭارى جازىپ جاتقاسىن وسىنى قۇرتايىق دەپ. مەنىڭ جازعان ارزىما بايلانىستى ۇسەن ءراپيشوۆتى قۇرتايىق دەپ ولار قىسىم جاسادى. مەن سولاي دەپ تۇسىنەمىن.

ۇسەندى قىزمەتىنەن كەتىرۋ جايى كوتەرىلگەنىن اسكەري ءبولىم كومانديرى دە راستادى. جۇمىسقا ءۇش ساعات كەشىككەن دەيدى ويتكەنى. ءبىراق، ونىڭ 16 جىل ەڭبەك ءوتىلى بارىن، ءارى زەينەتكە شىعۋىنا نەبارى جارتى جىل قالعانى ەسكەرىلىپ، مۇنداي شارا قولدانىلماس ەدى دەپ سەندىرەدى. ال قىسىم جاسالدى دەگەندى مويىنداعان جوق. 

باعدات ناربايەۆ، 5513 اسكەري ءبولىمىنىڭ كومانديرى:

-ول ءوزىن جاقسى قىرىنان كورسەتە بىلگەن ازامات. نەگە سۋيسيد جاساعانىن ءوزىمىز دە تۇسىنبەي قالدىق. الدىن-الا بۇل جاعدايعا قاتىستى ەشتەمە ايتا المايىز. ءقازىر تەكسەرۋ ءجۇرىپ جاتىر. ەگەر راسىندا كىنالىلەر انىقتالسا، قاتاڭ جازاعا تارتىلادى.

ءقازىر اسكەري تەرگەۋ باسقارماسى بۇل دەرەككە قاتىستى قىلمىستىق ءىس قوزعاپ، تەرگەۋ ءجۇرىپ جاتىر. ازىرگە تەك، مارقۇمنىڭ ماكاروۆ تاپانشاسىنان اتىلىپ ولگەنى بەلگىلى. وزگە مالىمەتتەر تەرگەۋ قۇپيالىعىنا بايلانىستى ايتىلماۋدا. سونداي-اق، قوسا كەتەيىك، ۇسەن راپيشيەۆ وزىنە قول سالاردىڭ الدىندا بۇل قادامعا نە ءۇشىن بارعانىن جانە وعان كىمدەردىڭ كىنالى ەكەنى كورسەتىلگەن حات جازىپ قالدىرعان. الايدا تىلدەي قاعازداعى جازبانىڭ مازمۇنى ازىرگە ايتىلماي جاتىر.