ق ر پرەمەر-مينيسترى باقىتجان ساعىنتايەۆتىڭ توراعالىعىمەن وتكەن ۇكىمەت وتىرىسى كەزىندە ينۆەستيسيالار جانە دامۋ ءمينيسترى جەڭىس قاسىمبەك ەلىمىزدەگى گەولوگيالىق سالانى دامىتۋ شارالارى تۋرالى باياندادى، - دەپ حابارلايدى Qamshy.kz.  

ءمينيستردىڭ ايتۋىنشا، گەولوگيالىق سالانى دامىتۋ ءۇشىن ءبىرىنشى كەزەكتە جاڭا اۋماقتار مەن ايماقتارداعى ىزدەۋ جۇمىستارىن قارجىلاندىرۋداعى مەملەكەتتىڭ ءرولىن ارتتىرۋ قاجەت.

«سونىمەن قاتار، جەر قويناۋلارىن زەرتتەۋدەگى باسىمدىقتاردى بەلگىلەۋ، گەولوگيالىق بارلاۋ جۇمىستارىنىڭ تۇرلەرى مەن كولەمىن ناقتىلاۋدى نەگىزدەۋ ءۇشىن الدىن-الا عىلىمي-زەرتتەۋ جۇمىستارىن جۇرگىزۋ قاجەت. عىلىمي تاقىرىپتاردى قاراستىرۋ ءۇشىن گەولوگيا جونىندەگى ۇلتتىق عىلىمي كەڭەستى قۇرىپ، ونىڭ قۇرامىنا گەولوگيالىق باعىتتاعى ساراپشىلاردى قوسۋ كەرەك»، - دەدى ج.قاسىمبەك.

ونىڭ ايتۋىنشا، دۇنيەجۇزىلىك تاجىريبەگە سۇيەنسەك، الەمدىك دەڭگەيدەگى سالالىق ينفراقۇرىلىمدى قۇرعان ءجون. ونىڭ اياسىندا بىرنەشە عىلىمي-زەرتتەۋ ورتالىقتارى، گەولوگيالىق اقپاراتتار قامتىلعان ەلەكتروندى مالىمەتتەر قورىنىڭ بلوگى، سونىمەن قاتار زەرتتەۋلەر جۇرگىزۋ ءۇشىن حالىقارالىق اككرەديتتەلگەن زاماناۋي زەرتحانا سالىنۋى ءتيىس.