سەمەيدە ءبىر جارىم جاسار قىزىن ەرتىسكە اعىزىپ جىبەردىم دەگەن كەلىنشەكتەن كۇيەۋىنىڭ جاقىندارى كۇدىكتەنە باستادى. ويتكەنى تەرگەۋ بارىسىندا كەلىندەرى جۇدىرىقتاي ايشانى سۋعا ناقتى قاي جەردەن تاستاعانىن ايتپاي، ءۇش جاعالاۋدى كورسەتىپ الەك بولعان. ءتىپتى، ودان پسيحيكالىق اۋىتقۋ تۇرماق، وكىنىشتىڭ تابى دا بايقالمايدى دەيدى كۇدىكتەنۋشىلەر. سوندىقتان بۇل ايەل بالانى جاسىرىپ وتىر، نە بولماسا ساتىپ جىبەردى دەگەن ويدا.

بۇل تۋرالى كتك ارناسى حابارلايدى. 

وقيعا وسىدان ءبىر اپتا بۇرىن بولعان ەدى. كۇيەۋىمەن اراداعى جانجالدان كەيىن 24 جاستاعى ايسۇلۋ قارشاداي قىزىن قولىنا الىپ ەرتىسكە بەتتەگەن. باسىندا وزىمەن قوسا بالاسىن دا ولتىرمەك بولعان كەلىنشەكتىڭ جەمە-جەمگە كەلگەندە جۇرەگى شىداماعان كورىنەدى. الايدا اعىنى قاتتى وزەنگە ايشانى عانا تاستاپ جىبەرىپتى. ال قىزدىڭ شىرت ۇيقىداعى اكەسى ۇرىس-كەرىستەن كەيىن ايەلى جان تۇرشىگەرلىك جاعدايعا بارادى دەپ ويلاماعان.

ايدىن سەرىكبولسىنوۆ، ايشانىڭ اكەسى:

-ەرتىستىڭ جاعاسىنا جارىق  تۇسىرسەم كۇرتەشە  جاتىر. بىردەن سۋعا سەكىردىم. تۇسسەم جوق. ءوزىم باتىپ كەتە جازدادىم. سۋىق. اياعىم تارتىلىپ قالدى.

سودان بەرى سۋدى سۇزگەن سۇڭگىرۋلەر 1 جارىم جاستاعى بالانىڭ دەنەسىن قانشا شارلاعانىمەن تابا الاتىن ەمەس. ال تۋىستارى كەلىندەرىنىڭ قىلىعىنا سەنبەيدى. ويتكەنى ولار قىزىنىڭ كيىم-كەشەگىن كورسە دە، جۇرەگى سەلت ەتپەگەن انادان سەكەم الىپ وتىر. ءتىپتى كەلىنشەك تەرگەۋشىلەردىڭ وزىنە ناقتى قاي جەردەن اعىزعانىن ءدال كورسەتە الماعان. وسىدان كەيىن تۋىستارى بالانى جاسىرىپ وتىر نە ساتىپ جىبەردى دەگەن تۇجىرىمعا كەلىپتى.

-ەشقانداي وكىنىش بولعان جوق. سونىڭ ءبارىن تەرگەۋشىلەرگە قالىپتى تۇردە كورسەتتى. جىلاعان دا جوق.

نۇرلان سايلاۋحان ۇلى، ايشانىڭ اتاسى:

ء-يتتىڭ كۇشىگىن سۋعا لاقتىرسان ءوزى بارىپ الىپ شىعادى. مىناۋ، ادام عوي ەندى. جاندىك ەمەس، اڭ ەمەس. مەنىڭشە ول ولتىرگەن جوق. ءبىر جەرگە تىعىپ تاستاعان سياقتى. سونى ۇقپاي وتىرمىز.

ايسۇلۋدىڭ دەنساۋلىعىندا بۇرىن-سوڭدى ەشقانداي اۋىتقۋلار بولماعان ەكەن. كورشىلەرىمەن دە، دوستارىمەن دە قارىم-قاتىناسى جاقسى. ولار دا، ونىڭ بۇل جاعدايعا بارۋى مۇمكىن ەمەس ەكەنىن العا تارتۋدا. كورشىلەرى ەرلى-زايىپتىلاردىڭ جانجالداسىپ جاتقانىن دا بۇرىن بايقاماعان.

ناتاليا زايسيەۆا، كورشىسى:

-ونىڭ ءبىر كوگەرىپ جۇرگەنىن كورمەدىك. ايدىن دا قول كوتەرمەيتىن. ول اراق تا ىشپەيدى. ەڭبەكقور. بۇلاردا بارلىعى جەتكىلىكتى. كوشەدە بالالارىن سەرۋەندەتىپ جۇرەتىن. ەستىگەندە بارلىعىمىز جاعامىزدى ۇستادىق.

تەرگەۋ امالدارى جۇرگىزىلىپ جاتقاندىقتان پوليسيا قانداي دا ءبىر مالىمەت بەرۋدەن باس تارتتى. تەك بەلگىلىسى، بۇگىندە بۇل وقيعاعا قاتىستى قىلمىستىق ءىس قوزعالعان. بالاسىن سۋعا تاستادىم دەگەن ايسۇلۋ ءسابي دەنەسى تابىلماعاندىقتان قولحاتپەن بوساتىلىپتى. ال جۇدىرىقتاي ايشانى ءتىرى دەپ ۇمىتتەنىپ وتىرعان تۋىستارى ەندى كورىپكەلدەردىڭ كومەگىنە جۇگىنبەك نيەتتە.