قازىرگى قازاق پوەزياسى ماعىنالىق، قۇرىلىمدىق جاعىنان جاڭا ءبىر سيپاتتا دامىپ كەلە جاتقانداي سەزىلەدى. ولەڭنىڭ تۇرلەنۋى، ءسوز تالعامپازدىعى، بەينەلىلىك، اۆتوردىڭ تەڭەۋلەرى، اقىن جەكە «مەنىنە» سۇراق قويا ءبىلۋى، سول ارقىلى قوعامداعى پسيحولوگيالىق قايشىلىقتاردى اقتارا ءبىلۋىن قاداپ ايتۋعا مىندەتتىمىز. مۇنداي جاڭالىقتار ادەبيەتتىڭ قاي داۋىرىندە دە بولعان، الايدا ولەڭ ورىسىندەگى ىزدەنىستەر بىر-بىرىنە ۇقسامايدى. قازىرگى جاستار پوەزياسىنىڭ پوستمودەرندىك سيپاتتا دامىپ، ورىستەۋىنە ءبىرشاما جىلدار، ىزدەنىستەر قاجەت بولدى. قازىرگى جاستار پوەزياسىنىڭ ەستەتيكالىق، ىرعاقتىق تۇرلەنۋىنەاعا اقىندار ە.راۋشانوۆ، ت.ابدىكاكىموۆ، س.تومانوۆ، گ.سالىقباي، ن.ماۋكەن ۇلى، ا.ىبىرايەۆ، ءا.بوتپانوۆ، ب.ۇسەنوۆ، م.رايىمبەك ۇلى ۇلكەن اسەر ەتتى.
قازىرگى قازاق پوەزياسىندا ىزدەنىپ جۇرگەن ەرلان ءجۇنىس، ءتوقتارالى تاڭجارىق، تالاپبەك تىنىسبەك ۇلى، ءىلياس مۇقايەۆ، ميراس اسان سىندى اقىنداردىڭ ولەڭدەرىن وقىپ وتىرعاندا كوكتەمنىڭ الماعايىپ كۇندەرىندەي سەزىم ساتتەرىن، ءتاتتى دە ءساتتى شۋماقتارعا ارا-تۇرا جولىعىپ قالاتىنىمىز كوڭىل قۋانتادى.
ىرعاق، بوياۋى كۇشتى، جىلت ەتپە جىرلار دا ۋاقىت مەرزىمىنە ىلەسە الماي شابانداعان اتتاي قالىپ قوياتىنى بولماسا باسقاسىنىڭ بارلىعى تۇگەلدەي سەزىلەدى. اقىننىڭ مۇراتى وتپەلى كەزەڭنىڭ دابىرىنا ىلەسپەي ءوزىنىڭ ءمولدىر قالپىن ساقتاي بىلگەندىگىندە عوي. قازىرگى جاس اقىنداردىڭ ولەڭدەرىن وقىپ وتىرعاندا ءبىز نەگىزگى وبەكتىنى نەمەسە جىرلاماق بولعان تاقىرىپتى دۇرىس مەڭگەرە الماعانىن كوپ بايقايمىز. ايتىلماق بولعان ويدى سوزبەن قيۋلاستىرعاندا جاس اقىندارىمىز جاتتاندىلىققا، ءبىر ىزدىلىككە، ەلىكتەۋگە ۇرىنىپ جاتادى. مۇنداي ءسوزدى ايتپاساق تا بولار ەدى. الايدا جاس جۇرەكتىڭ الدىڭعى تولقىننىڭ لەگىنە ىلەسىپ، ءوز ءومىرىنىڭ ايناسىن كورە الماي قالا ما دەگەن ءقاۋىپ قانا بار. ميراس اساننىڭ «العاشقى قار» ولەڭىندە ادام ءومىرىنىڭ باياندى شاقتارى، وقىرمانعا وي سالاتىنداي شۋماقتار العاشقىدا مولىنان ۇشىراساتىنداي بولىپ كورىنەدى. مىنا جولداردى قارايىق:
مامىقتارعا جامىلدى ميداي دالا.
وزىنە مۇڭ وسىلاي سىيلايدى ادام.
ادەمى-اق ليريكا. ەكىنشى جولدا:
ءومىر جايلى قىپ-قىسقا ولەڭ جازىپ،
ءوزىم جايلى ومىرگە سىيماي قالام، –
– دەپ سۋرەتتى باستالعان ولەڭدى قارابايىرلاندىرىپ جىبەرگەن. ءسوزدىڭ ورنالاسۋىنا، ۇيقاسىنا، سالىستىرۋىنا ەشقانداي سىن تاعا المايمىز. ءاربىر اقىننىڭ ولەڭىنەن كەمىستىك ىزدەپ وتىرۋ دا ادەپسىزدىك. ميراس بولاشاعىنان ءۇمىت كۇتتىرەتىن اقىن. تەك بۇل ولەڭگە جەتپەي تۇرعانى – اقىننىڭ ليريكالىق قاھارمانى اق قاردى الا وتىرىپ، ءوزىنىڭ ىشكى ينتۋيسياسىن جەتكىزۋگە كەلگەندە السىزدىك تانىتقان. «ءوزى جايلى ومىرگە سىيماي قالاتىن» وسى ءسوز ميراستاي جىگىتتىڭ ءوز ءسوزى مە؟ جۇرەكتەگى ءسوزى مە؟ جوق. ميراس پوەزياسىنىڭ وسۋىنە ءسوزدىڭ تالعامپازدىعى جەتپەيدى. ءوز ءومىرىنىڭ باقىتتى ساتتەرىن سەزىنە ءبىلۋ جەتپەيدى. وسىنداي ولقىلىقتار جالعىز ميراستا عانا ەمەس، اعا اقىنداردىڭ ولەڭدەرىندە دە جەتىپ، ارتىلادى. ءبىز ءقازىر ميراس شىعارماشىلىعى تۋرالى ناقتى، تولىمدى پىكىر ايتا المايمىز، سەبەبى بۇل اقىن ءالى دە ىزدەنىس، ءوسۋ ۇستىندە. قازىرگى كەزدە ميراسقا جەتپەي تۇرعانى – ءسوزدىڭ ماعىناعا ساي بولۋى. ءوزى جازعانداي «ءبىر نايزاعاي جارق ەتەدى كوكتەمشە» دەگەندەي جولداردان ساق بولۋ كەرەك ەكەنىن ايتۋعا عانا مىندەتتىمىز. وسى تۇرعىدا قازاق ولەڭ ءسوزىنىڭ تەورياسىن جاساۋشى اكادەميك، عالىم زاكي احمەتوۆتىڭ مىنا سوزىندە ءمان بار: «...ماسەلە – پوەزياعا ءتان كوركەم سۋرەتتەۋ ءادىسى جايلى، قانداي ءومىر قۇبىلىسى بەينەلەنسە دە، تەك ەڭ قاجەتتى، ەڭ ماڭىزدى قاسيەت، ەرەكشەلىكتەر تالعامپازدىقپەن سۇرىپتالىپ الىناتىندىعىنا كوڭىل اۋدارۋ».
ءىلياس مۇقايەۆتىڭ ولەڭدەرىندە دە ءساتتى شۋماقتار اسىپ توگىلمەسە دە كەزدەسەدى.
قايىڭمەن، گۇلمەن، بارىمەن سىرلاسقام،
ولار دا ەمەس جىگەرلى.
«ەسىڭە ال، – دەپ ەم – وتكەندى،
مۇڭلى اسپان
كوز جاسىن توگىپ جىبەردى.
– دەيدى اقىن. نەگىزگى موتيۆ وتكەن ءومىر بولسا، اقىن وتكەن شاقتىڭ تراگەديالىق تابيعاتىن كوز جاسىن توككەن اسپان ارقىلى بەينەلەيدى. بەينەلى تىركەستەر قوزعالىستا، بارىنشا جاندانا تۇسكەن. قايتالاۋ دا جوق. اسىرا اسەرشىلدىك تە جوق. ايتىلار وي اقىننىڭ كوڭىل كۇيىمەن بىتە قايناسىپ كەتكەن. الايدا ءىلياستان وسىنداي شۋماقتاردى كوپ كەزدەستىرە بەرمەيمىز. سوندىقتان بۇل اقىنعا دا ءالى كوپ ىزدەنۋ قاجەت-اق.
ال مەن شە،
بەزىنەمىن،
دۇنيە – كوزىمە جىن،
بوتەنمىن وزىمە ءوزىم،
دۇشپانمىن وزىمە ءوزىم!
بۇل ەرلان ءجۇنىس. ءبىز جوعارىدا ايتقان ىرعاقتىڭ كۇشتىلىگى وسى ولەڭدە بارىنشا باسىم. ءسوز ىقشامدالا تۇسكەن. ىرعاق ماياكوۆسكيي ايتقانداي اقىندى ءبىر جەلىسپەن جەلۋىنە ماجبۇرلەپ وتىرادى. ءسوز بەن ىرعاق ءبىر ساتتە كەلۋى مۇمكىن. كەيدە اقىن ىرعاقتىڭ جەتەگىندە كەتىپ، ءسوزدىڭ مانىنە كوڭىل قويمايتىن كەزدەرى دە بولادى. وسى تۇرعىدان كەلگەندە ىرعاقتىڭ قۋاتتىلىعى ەرلاننىڭ ولەڭدەرىندە باسىم. كەيدە وسى ىرعاق، ولەڭ اۋەنىنىڭ جەتەگىنە ەرگەندە اقىندار سوزگە دە اباي بولۋى قاجەت. ولەڭدە ءتىل قانشا باي بولعانىمەن ىرعاق ءالسىز بولسا ولەڭ ولقى كورىنەرى دە بار.
يوسيۆ برودسكييدىڭ «كوگو مى پومنيم، كوگو مى سەيچاس زابىۆاەم،چەگو مى ستويم، چەگو مى ەششە نە ستويم» دەگەن جولدارىن وقىپ وتىرعاندا قاراپايىم قايتالاۋدان سيمۆول، وي، ماعىنا شىعىپ وتىرادى. الەمدىك پوەزيادا قالىپتاسقان مۇنداي ءداستۇردى ەرلان دا جاقسى مەڭگەرگەن. اقىننىڭ وسى ولەڭىندەگى «سەن سونى سەزەسىڭ بە، سەن سونى بىلەسىڭ بە؟!»، «ويلارىڭ – كورشىلەرىم، سوزدەرىڭ – تانىستارىم!» دەگەن جولدار مۇقاعالي ماقاتايەۆ ولەڭدەرىنە ۇقساڭقىراپ كەتكەن. مۇنداي قايتالاۋلار وقىرمانعا اسەرسىز، جاتتاندى كورىنەدى.
ەرلاننىڭ باياۋ ىرعاققا قۇرىلعان «كوز جاسى» ولەڭىن وقىپ كورەلىك.
كىنامشىل سەزىمدەر كەشىرتكەن كەزىمنىڭ
بۇلتى اۋىپ بارادى باسىمنان.
مەن بيىك تۇرۋدى ۇيرەندىم،
ءوزىمنىڭ
ءبىر تامشى جاسىمنان.
العاشقى جول «كىنامشىل سەزىمدەر كەشىرتكەن كەزىمنىڭ» دەپ باستالادى. «كەشىرتكەن كەز» تىركەسى قۇلاققا توساڭداۋ ەستىلگەنىمەن ولەڭگە وزىنشە ەكپىن، رەڭ بەرىپ تۇر. «كەشىرتكەن كەز» ول قانداي كەز. وقىرمان وسى تىركەستى قابىلداي الا ما؟ «كەشىرتكەن كەز»، «كىنامشىل سەزىم» پوەتيكالىق تۇرعىدان ءالسىز بولعانىمەن ماعىناسىز دا ەمەس. ەكىنشى «بۇلتى اۋىپ بارادى باسىمنان» دەگەن جولى العاشقى جولدىڭ پسيحولوگيالىق كۇيىن بارىنشا ۇعىندىرا تۇسكەن. سوندىقتان ۇعىمعا بۇل ءسوز جات ەمەس. ءسوز نەمەسە ءسوز تىركەستەرىنىڭ پوەزيادا تولىق ماعىنا بەرمەي، ەكى ارالىقتا قالۋىن پروزايزم (نەدوستاتوك ستيحوۆ) دەپ اتايدى. ل.گينزبۋرگ ءپروزايزمدى بىلاي تۇسىندىرەدى: «پروزايزم – ەتو پرەجدە ۆسەگو نەستيليەۆوە سلوۆو، تو ەست ەستەتيچەسكي نەيترالنوە، نە پرينادلەجاششەە ك تومۋ يلي ينومۋ پوەتيچەسكومۋ ستيليۋ». كورىپ وتىرعانىمىزداي ەرلاننىڭ ولەڭىندەگى «كەشىرتكەن كەز» نەمەسە «كىنامشىل سەزىم» تىركەستەرى پروزايزم بولۋى مۇمكىن. سەبەبى ءسوز تولىق ماعىنا بەرىپ تۇرعان جوق. الايدا وسى تىركەستى وقىرمان جىلى قابىلدايدى.
بۇل دۇنيە تىم باسقا بولاتىن،
جاس ىرشىپ تۇسكەنشە جاناردان،
سول ءبىر جاس – قارا ءتۇن،
اق نۇردان جارالعان،
دەيدى ەرلان. ولەڭدە اقىن باسىنان كەشكەن وقيعالاردى بايانداپ، تاپتىشتەپ جاتپايدى. مۇنداعى ادامنىڭ كوز جاسى اۋىسپالى ماعىناسىندا – ءومىر، ۋاقىت. كوز جاسى – اقىننىڭ ءومىر ءسۇرۋ بيىكتىگىنىڭ ولشەمىندەي. ءومىردى سەزۋ، كورۋ پروسەسى اقىندا «كوز جاسى» ارقىلى سيمۆولدىق ماعىناعا يە بولعان. اقىن «كوز جاسىن» كورمەي، سەزبەي تۇرىپ، ءومىردىڭ باعاسىن دا بىلمەك ەمەس. «سول ءبىر جاس قارا ءتۇن، اق نۇردان جارالعان» نەمەسە:
تىرس ەتتى…
قارا جەر ءدىر ەتتى!..
توپىراق بولمىسى وزگەردى
وزگەرتتى ول گۇلدەردى، قۇستاردى،
جۇرەكتى…
ءسوز دە ەندى
بىلسەمشى كەلمەسىن قالپىنا بۇرىنعى،
اۋىتقىپ كەتەرىن عاسىردان!
…ۇيرەندىم مەن سولاي بيىكتە تۇرۋدى
كوزىمنىڭ ءبىر تامشى جاسىنان.
توپىراق، گۇل، قۇستار، ءسوزدىڭ وزگەرۋى اقىن پسيحولوگياسىندا ءجۇرىپ جاتقان ارەكەتتەر. بۇعان دەيىن ياعني «كوز جاسىنا» دەيىن اقىن الەمنىڭ وزگەرىپ جاتقانىن سەزبەگەن. كوز جاسى سوعان جەتەلەگەن ومىردەگى كەزدەيسوقتىق. سول ارقىلى اقىن عاجاپ سەزىمگە بولەنەدى. ەندى ءومىردى باسقاشا تۇسىنۋگە بەكىنەدى. مىنا جولعا قاراڭىز:
سودان سوڭ…
تاۋلار دا جىلاعان،
دالا دا جىلاعان،
ەشكىم دە بولمادى سەبەبىن سۇراعان،
سەبەبىن بىلمەدى ءبىر ادام.
ولار دا وزگەرگەن،
وزگەرگەن ولەڭمەن…
…ءبىر تامشى جاس تامىپ كەتپەۋىن كوزدەردەن،
كۇزەتىپ كەلەم مەن
پروسەسس ءوتتى. اقىن كەزدەيسوقتىق ارقىلى كورە الماي، سەزىنە الماي، تۇسىنە الماي جۇرگەن ومىرلىك قۇبىلىستاردى ءتۇسىندى. ەندى نە ىستەۋ قاجەت؟ ءوزى تۇسىنگەندى، تاۋلاردىڭ جىلاعانىن، دالانىڭ جىلاعانىن ەشكىم سۇراماپتى. ونىڭ سەبەبىن دە بىلمەپتى. اقىن وسى پروسەستى كورگەن سوڭ ەندىگى ءتۇيسىنۋ «كوزدەردەن جاس تامىپ كەتپەۋىن كۇزەتۋ» عانا بولماق.
و، سول ءبىر تۇماندى جىلداردان!
كەشسەم دە باسقا مۇڭ،
مەن ەندى جوقتامان جىلداردى ۇرلانعان،
مەنى ەندى جىلاتا كورمەشى، اسپانىم!..
وتكەن شاق، «ۇرلانعان جىلداردى جوقتاۋدان» ەندى ەشبىر قايران جوق. الايدا وتكەن ۋاقىت اقىنعا قانشاما سەزە الماي جۇرگەن ومىردەگى تۇسىنىكتەردى سەزىندىردى عوي. ءبىز قازىرگى پوەزيادان وسىنداي بەينەلى سوزدەردىڭ فيلوسوفيالىق تۇجىرىمدار بەرە الاتىنىن وقىدىق. بۇل تاۋەلسىزدىك كەزدەگى قازاق پوەزياسىنىڭ ءبىر ساتىعا كوتەرىلگەندىگىنىڭ بەلگىسى. مۇنداي ولەڭدەردىڭ جازىلۋىنا ارينە ەرلاننىڭ زامانداس اقىندارى ءوز ىقپالىن تيگىزدى.
ادامدار اداسقان ۆوكزال،
ەشكىمنىڭ جاسىنا سەنبەس.
قارسى الىپ الاتىن جاندار،
شىعارىپ سالۋعا كەلمەس.
پەندەلەر ءتىل قاتار ساراڭ،
جۇباتپاس بۇلىڭعىر كوشە.
بۇگىن دە اداسىپ بارام،
مەن وندا اداسقام كەشە.
ءتوقتارالى تاڭجارىقتىڭ «ۆوكزال. تاڭ» ولەڭىندە دە ۆوكزال ءوزىنىڭ سيپاتىنان اۋىسپالى مانگە يە بولعان. اقىن پسيحولوگياسىنا اسەر ەتكەن ايتىلار وي وبەكتىدەن الىس ەمەس. وسى ولەڭدەگى بۇلىڭعىر كوشە، اداسقان ۆوكزال (ماعىناسى – ومىردە اداسىپ جۇرگەن ادامدار)، قاپاستاعى قۇستار، مۇڭنان جارالعان عارىش، بەيۋاقتا سىڭسىعان نۋ ورمان، تاۋلاردى توزدىرعان جاڭبىر بارلىعى دا اقىندى ايتايىن دەپ وتىرعان تاقىرىپقا جاقىنداتا تۇسكەن. ولەڭدەگى نەگىزگى يدەيا – نەمقۇرايلى، سەزىمسىز ادامدار، اقىن ءوزى دە سول قوعامنىڭ ادىلەتسىزدىگىن وسى كورىنىستەر ارقىلى اشكەرەلەيدى. ي.ا.ۆينوگرادوۆ كوپتەگەن اقىن جازۋشىلاردىڭ تاقىرىپتى قاز-قالپىندا جەتكىزبەي، سيمۆول ارقىلى جازۋىن ايتا كەلىپ، ايتىلماق تاقىرىپ تۋرالى بىلاي دەپ وي قورىتادى: «...چتو «تەما» ەششە وچەن مالو گوۆوريت نام و پرويزۆەدەنيي، و ەگو دەيستۆيتەلنوم سودەرجانيي». ءتوقتارالىنىڭ «ۆوكزالى» نەگىزىنەن ايتايىن دەپ وتىرعان تاقىرىپتىڭ رەالدى كورىنىسى ەمەس، سونىڭ بالاماسى عانا دەپ تۇسىنگەنىمىز ابزال.
شاراپپەن تارقاتىپ شەردى...
كوڭىلىم قالدى بار جولدان.
سەن مەنى وكسىتپە ەندى،
ارماندار اداسقان ۆوكزال.
اقىن ءوزى قالاماعان وسى جولدى ەندى قايتا باستان كەشىرگىسى جوق. شىندىعىندا ومىردەگى ءاربىر قادامىمىزدى جۇرەك قىلىن شەرتە وتىرىپ سەزىنە الساق، وسىنداي عاجاپ وقيعالارعا كەز بولاتىنىمىزدى وسى ولەڭ دالەلدەپ تۇر. بۇل ءتوقتارالىنىڭ كوپتەگەن ولەڭدەرىنىڭ ىشىندەگى شوقتىعى بيىك دۇنيەسى دەپ ايتۋعا تولىق نەگىز بار.
تۋعان جەر قوينى دارا ب ا ق قانداي؟
ءجۇرۋشى ەم كۇندە ارالاپ قانباي.
جۇدەدىم نالىپ اتتانار شاقتا،
جۇرەگىم قالىپ بارا جاتقانداي.
بۇل تالاپبەك تىنىسبەك ۇلى. تالاپبەك ولەڭىندە ۇيقاس قۋۋ ءجيى كەزدەسەدى ەكەن. ۇيقاس قۋۋ اقىنعا ارينە جاقسىلىق اكەلمەيدى. الايدا وسىنداي تىركەستەردەن (جۇدەدىم نالىپ، جۇرەگىم قالىپ) جاقسى ولەڭ تۋدىرۋعا بولاتىنىن اقىن سەزىندىرە بىلگەن. مۇنداي سوزدەر كوپ قايتالانا بەرسە ولەڭ كوركەمدىگىنەن ايىرىلادى. ءسوز قاناتسىز قۇستاي بيىككە سامعاي المايدى. سوندىقتان تالاپبەككە «الامويناق» ولەڭىندە كەزدەسەتىن «تەگىن ولمەي تەنتەك وي تۋلاسىن دا، كومىلەردەي تاعدىرىن تىڭداتۋعا، تەگى مەندەي ۇل كەرەك بۇل عاسىرعا» دەگەن جولدارعا ءجيى قادام باسا بەرۋ اسەرسىزدىككە ۇرىندىرادى.
بۇلبۇلىڭ ەدىم ورمانىڭداعى،
اۋەنى بولەك ءوز باعىنداعى.
مولالار ءۇنسىز مۇڭعا باتادى،
بورىلەر جورتقان جوندارىڭداعى.
تالاپبەكتىڭ «تۋعان جەر» ولەڭىن وقىپ وتىرىپ قىرداعى اۋىل سۋرەتتەرى كوز الدىڭا كەلەدى. ولەڭ وقىرماننىڭ بولمىسىمەن قابىسىپ، ايتىلار وي جۇرەككە ساۋلە بوپ قۇيىلعاندا عانا ناعىز كوركەمدىگى جوعارى شىعارما بولماق. بىزگە وسى ولەڭدەگى ينتوناسيا، ىرعاقتىڭ ءوزى سوزبەن سۋرەت سالىپ تۇرعانداي كورىنەدى. «مولالار ءۇنسىز مۇڭعا باتادى» دەگەن جولدىڭ وزىندە قانشاما وي جاتىر جانە اقىن تۋعان جەردى جونداردا جورتىپ جۇرگەن بورىلەرمەن، ءۇنسىز مولالاردى سۋرەتتەۋ ارقىلى ءبىزدى ۇلكەن اسەردە قالدىرىپ وتىر.
اقىنداردىڭ مۇنداي شەبەرلىككە جەتۋى ءۇشىن كوپتەگەن پوەزيالىق شىعارمالار جارىق كوردى. كەيبىر جاس اقىنداردىڭ شابىت قۋاتى العاشقىدا «تاۋ قوپاراتىنداي» ەكپىندە بولعانىمەن، كەيىن كەلە ولاردىڭ ولەڭدەرىنىڭ كوبى ىرعاقتىڭ كۇشتىلىگىنىڭ ارقاسىندا كوركەمدىككە يە بولىپ تۇرعاندىعىن بايقادىق. ءسوزدىڭ قۇدىرەتتىلىگىن كورسەتۋ ءۇشىن كوپ اقىندار اۋىز ادەبيەتىمىزدە كەزدەسەتىن ۇلتتىق سيپاتى مول سوزدەردى ولەڭدەرىنە ەنگىزدى. مۇنداي قادامدار كەي ساتتەردە ءوز جەمىسىن سىيلادى، كەيدە ءسوز جۇرەكتەن شىقپاعان سوڭ جاساندىلىققا ۇرىنىپ جاتتى. قولدان اكەلىپ قويعان ەسكى سوزدەر ولەڭنىڭ ءبىر بۇرىشىن ويسىراتىپ تۇرعانداي سەزىلدى. جوعارىداعى اتالعان اقىندارمەن قاتارلاس، ۇزەڭگى قاعىستىرىپ جۇرگەن اقىندار دا بار. ونىڭ بارلىعى الداعى زەرتتەۋدىڭ ەنشىسىندەگى دۇنيە. قازىرگى جاس اقىندارعا ءالى دە كوپ ىزدەنىس كەرەك. سەبەبى ءبىر اقىننىڭ كىتابىنان ەكى ءۇش-اق ولەڭدى عانا ماقتاۋعا بولادى. ارينە، ءبىز ءۇشىن بۇل ازدىق ەتەدى. ەندەشە ولەڭ ولكەسىنە ساپار شەكەن جاس اقىندارىمىز وقىرمان جۇرەگىندە ماڭگى ورىن الاتىن ولەڭ جازاتىنىنا ءالى دە سەنىمىمىز مول. سەنىمى مول، اقيقاتتىڭ جارشىسى بولعان اقىندار قانداي قۇرمەتكە بولسىن يە.
مارات ءازىمحان، ادەبيەت جانە ونەر ينستيتۋتىنىڭ عىلىمي قىزمەتكەرى
