ق ر پارلامەنتىنىڭ تومەنگى پالاتاسىنىڭ دەپۋتاتتارى سوتتىڭ شەشىمى مەن قازاقستاندا ءولىم جازاسىنا ەنگىزىلگەن ءموراتورييدى الىپ تاستاۋدىڭ قاجەتتىلىگى تۋرالى ماسەلەنى تالقىلادى، - دەپ حابارلايدى Tengrinews.kz.

بۇگىن، 2 قاراشادا الماتىدا بيىل جازدا تەراكت ۇيىمداستىرعان رۋسلان كۇلەكبايەۆقا قاتىستى ۇكىم شىعارىلدى. سۋديا سوتتالۋشىعا ۇكىمدى استانادا پارلامەنتتىڭ تومەنگى پالاتاسىنىڭ وتىرىسى ءوتىپ جاتقاندا وقىدى.

"ءولىم جازاسىن ورىنداۋ ماسەلەسىنە كەلگەندە كۇمانىم بار. مەنىڭشە، ادام ومىرگە ءوز بەتىنشە كەلە سالمايدى. ءومىر - قۇدايدىڭ سىيى. وسى ورايدا ادامنىڭ باسقا ءبىر ادامنىڭ ءومىرىن قيۋعا قۇقىقتىق ەمەس، مورالدىق تۇرعىدا قۇقىعى بار دەگەنگە كۇمانمەن قارايمىن. ءيا، ول سۇمدىق قىلمىسكەر، جاۋىز - تاپا-تال تۇستە بىرنەشە ادامدى ءولتىردى. ءبىراق بۇدان دا اۋىر قىلمىستار بار، زورلايدى، ولتىرەدى دەگەندەي. مۇنداي جاعدايدا قوعام ءولىم جازاسىن اقتاپ الادى. الايدا ءولىم جازاسى مۇنداي جاۋىزدىق ءۇشىن تىم وڭاي جازا بولىپ كورىنەدى. ولارعا ءومىر بويىندا قيناۋ، اۋىر جاعدايدا قالدىرۋ جانە ءومىرىنىڭ سوڭىنا دەيىن وكىنۋمەن وتكەنى دۇرىسىراق پا دەپ ويلايمىن"، - دەپ ءبىلدىردى پىكىرىن دەپۋتات ازات پەرۋاشيەۆ.

"وكىنىشكە قاراي، تاجىريبەدەن كورىپ وتىرعانىمىزداي، جازانىڭ جەڭىل نەمەسە اۋىر بولۋى قىلمىستىڭ قايتالانۋىنىڭ الدىن الا المايدى. كەڭەس كەزىندە ەڭ اۋىر جازالار بولدى، ءبىراق قىلمىس جوعارى دەڭگەيدە قالىپ قويدى"، - دەدى پەرۋاشيەۆ "كۇلەكبايەۆقا قاتىستى ءولىم جازاسىن ورىنداۋ ءۇشىن ءموراتورييدى الىپ تاستاۋعا بولا ما؟" دەگەن سۇراققا جاۋاپ بەرە وتىرىپ.

"اناسىنىڭ، ايەلدەردىڭ، رەسپۋبليكا ازاماتىنىڭ كوزقاراسى بويىنشا ايتساق، ارينە، ءبىز قاۋىپسىزدىكتىڭ بولعانىن قالايمىز، مۇنداي جاعدايلاردىڭ قايتالانباۋىن قالايمىز. سوعان قاراعاندا، مۇنداي جازا ءادىل دە شىعار. ال زاڭناما تۇرعىسىنان قاراپ كورسەك، بىزدە موراتوريي بار. ەگەر سوت وسىنداي شەشىم شىعارسا، وعان قارسى بولا المايمىن. ال ادامگەرشىلىك جاعىنان الىپ قاراساق، مۇنداي جاۋىزدىق ءۇشىن ەڭ اۋىر جازا تاعايىندالعانى دۇرىس"، - دەپ ءبىلدىردى كوزقاراسىن دەپۋتات مايرا ايسينا.

"مەنىڭشە، ۇكىم ءادىل، سەبەبى مۇنداي تەرروريستىك قىلمىستى اقتاپ الۋعا بولمايدى. ۇكىم قازاقستان زاڭىنىڭ نەگىزىندە جۇزەگە اسىرىلدى، بۇل زاڭ ءولىم جازاسىن قاراستىرادى. ءبىراق قايتالاپ ايتامىن، بۇل جاعدايدا موراتورييگە بايلانىستى ۇكىمدى ورىنداۋدىڭ مۇمكىن ەمەستىگى نەگىزگى ماسەلە بولىپ قالىپ وتىر، سوندىقتان ول ءومىر بويىنا باس بوستاندىعىنان ايىرۋ جازاسىنا اۋىستىرىلادى"، - دەپ اتاپ ءوتتى تومەنگى پالاتانىڭ دەپۋتاتى ماۋلەن اشىمبايەۆ.

"موراتوريي بارلىعىنا بىردەي، موراتورييدە بىرەۋ-مىرەۋگە قاتىستى توقتاۋدى قاراستىرمايدى. سوندىقتا وسى جاعدايدا موراتوريي بارلىعىنا بىردەي قولدانىلادى"، - دەپ مالىمدەدى اشىمبايەۆ "الماتىلىق اتقىشقا" قاتىستى ءموراتورييدى توقتاتا تۇرۋعا بولا ما؟" دەگەن ساۋالعا جاۋاپ بەرە وتىرىپ.

"مەنىڭشە، قازاقستان ەكونوميكالىق ىنتىماقتاستىق جانە دامۋ ۇيىمىنىڭ 30-دىعىنا تالپىنىپ جاتقاندا مۇنى جاساۋ مۇمكىن ەمەس، بۇل ەلدەردە ءولىم جازاسى جوق. سوندىقتان، ۇكىم بار، ءبىراق ونى ورىنداۋ قيىن"، - دەدى كوممۋنيستەر فراكسياسىنىڭ دەپۋتاتى ايقىن قوڭىروۆ.

"ەگەر موراتوريي الىپ تاستالسا، ەل ابىرويىنا نۇقسان كەلەدى. سوندىقتان، مەنىڭ پىكىرىمشە، موراتوريي الىپ تاستالمايدى"، - دەدى دەپۋتات قوڭىروۆ.

ايتا كەتەيىك، بۇگىن الماتىلىق اتقىش ءولىم جازاسىنا كەسىلدى. ءبىراق ونى ورىنداۋعا ەلىمىزدە موراتوريي جاريالانعان. 

ەسكە سالايىق، 18 شىلدەدە الماتىدا تەرروريستىك اكت بولعان ەدى. بەلگىسىز ەر ادام المالى اۋداندىق ءىىب مەن ۇقك دەپارتامەنتىنە قارۋلى شابۋىل جاسادى. وقيعا سالدارىنان بەس ادام، ونىڭ ىشىندە ءۇش پوليسيا قىزمەتكەرى قازا تاپتى. قالادا تەررورلىق قاتەردىڭ قىزىل دەڭگەيى جاريالاندى. قىلمىسكەر ۇستالدى،ول بۇرىن ءىستى بولعان قىزىلوردا وبلىسىنىڭ تۋماسى رۋسلان كۇلەكبايەۆ بولىپ شىقتى.