وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ فرانسيادان كەلگەن قوناقتار الدىندا ۇيالىپ قالعان، -دەپ حابارلايدى Nur.kz سايتى.  

اكىمدىك قىزمەتكە كىرىسكەنىنە كوپ ۋاقىت وتە قويماعان جانسەيىت تۇيمەبايەۆ فرانسيا ەلىنەن كەلگەن دەلەگاتتارمەن كەزدەسكەندە ىڭعايسىز جاعدايعا تاپ بولعان. بۇل تۋرالى ول شىمكەنتتە وتكەن وبلىستىق جاستار فورۋمىندا ايتىپ بەردى.

"جاقىندا فرانسيا ەلشىسى كەلدى. قالانى ارالاپ شىقتى. كوشەدە قۋراپ كەتكەن اعاشتاردى كورىپ، "اعاشتارعا نە بولعان؟" دەپ سۇرادى. "اۋىرىپ قالىپ ەدى" دەپ جاۋاپ بەردىم"، - دەدى تۇيمەبايەۆ.

ودان وزگە ايماق باسشىسىنىڭ ايتۋىنشا، شىمكەنت كوشەلەرىندەگى سۇر تۇستەن كوز سۇرىنەتىن جول جيەكتەرىندەگى جاساندى بوگەتتەر، ارىقتار دا شەتەلدىك قوناقتى تاڭ قالدىرىپتى. ءقادىرلى مەيمان شىمكەنتتىڭ بۇل كەيپىن قالا سوعىسقا دايىندالىپ جاتىر دەپ ويلاپتى.

ەستەرىڭىزگە سالا كەتەيىك، بۇعان دەيىن ايماق باسشىسى جانسەيىت تۇيمەبايەۆ شىمكەنت اكىمىن كوگالداندىرۋ جۇمىستارى بويىنشا سىناپ، ءابدىراحىموۆتىڭ ورىنباسارى جاساعان باياندامانى قابىلداماي قويدى.  ءتىپتى كەيبىر شەنەۋنىكتەردى ورنىنان تۇرعىزىپ قويىپ ۇرىسىپ تاستادى. تەك قانا كوگالداندىرۋ ەمەس، قالا كوركىن رەتتەۋ جۇمىستارىنا دا كوڭىلى تولماعان تۇيمەبايەۆ مىرزا جاۋاپتىلارعا قولدارىنان كەلمەسە، ورنىن بوساتۋ كەرەكتىگىن ەسكەرتتى. ول از دەگەندەي وبلىس اكىمى قوناقتاردى الىپ باراتىن جەرلەردىڭ دە جوقتىعىن نازارعا الدى.

"قالاعا قوناقتار كوپ كەلىپ جاتىر. مەن سىزدەرگە ايتايىن، ەشقانداي ۇيالماي الىپ باراتىن جەرىمىز ءقازىر تەك قانا Rixos ءقوناقۇيى. اۋەجاي دايىن ەمەس، جول دايىن ەمەس. تۇسىندىڭىزدەر مە؟ ەسكى ۇيلەردىڭ سىرتقى كەلبەتىن رەتتەپ، جاڭا ۇيلەر سالاردا بىركەلكىلىككە ءمان بەرۋ كەرەك"، - دەپ اشۋلاندى جانسەيىت تۇيمەبايەۆ.