الماتىدا قاندى قىرعىن جاساعان رۋسلان كۇلىكبايەۆ ءولىم جازاسىنا كەسىلدى. وسىلايشا ون ادامنىڭ ءومىرىن قيعان قاراقشىعا سوڭعى ون جىلدا بولماعان اسا اۋىر جازا بەرىلىپ وتىر. الايدا ۇكىمنىڭ قاشان ورىندالاتىنى بەلگىسىز. ويتكەنى ەلىمىزدە ءولىم جازاسىنىڭ ورىندالۋىنا موراتوريي بار ەكەنى ءمالىم. سوندىقتان كۇلىكبايەۆ قوستاناي وبلىسىنداعى ەرەكشە رەجيمدەگى «قارا بۇركىت» تۇرمەسىندە وتىرىپ، ۇكىمنىڭ ورىندالۋىن كۇتەدى. ال ونىڭ بەس سىبايلاسى ءار ءتۇرلى مەرزىمگە سوتتالدى.

بۇل تۋرالى كتك ارناسى حابارلايدى. 

رۋسلان كۇلىكبايەۆقا قاتىستى سوڭعى سوت وتىرىسى بولعاسىن با، بۇگىن قاۋىپسىزدىك شارالارى ەرەكشە كۇشەيتىلگەن. ون ادامدى اتىپ ولتىرگەن لاڭكەستى بىرنەشە جاۋىنگەر كۇزەتىپ تۇر. ءتىپتى سوت زالىنا مۇزداي قارۋلانعان ارنايى جاساق ساربازدارى دا كىرگىزىلىپتى. ويتكەنى قوعام ءۇشىن اسا ءقاۋىپتى سانالاتىن لاڭكەس اياۋشىلىق قاسيەتتەن ادا ەكەنىن كورسەتتى. سوت ۇكىمى وقىلعاندا دا باياعى ادەتىنە باسىپ، ورنىنان تۇرعان دا جوق. سۋديا دا كوپكە سوزباي، قانىپەزەردى اتۋ جازاسىنا كەستى.

ەرلان بولات، سۋديا:

-قك 58ء-شى  بابىنىڭ 4-بولىگىن باسشىلىققا الىپ، رۋسلان كۇلىكبايەۆتىڭ جەكە مۇلكى تاركىلەنىپ، ءولىم جازاسى تاعايىندالسىن.

الايدا اسا اۋىر جازا ارقالاعان كۇلىكبايەۆتىڭ بۇل ۇكىمگە بەتى بۇلك ەتكەن جوق. سەبەبى جاساعان قىلمىسىنا ەش وكىنگەن ەمەس. ءتىپتى جابىرلەنۋشىنىڭ تۋىستارىنان كەشىرىم سۇراۋعا دا جارامادى. 

زاعيرا قىرىقبايەۆ، مارقۇم ا.ءازىمجانوۆتىڭ تۋىسى:

-وڭباعان ەكەن. ءبارىبىر سياقتى وعان. اتسىن. قانشاما ادامنىڭ قانىن ءىشتى. سونداي مادەنيەتسىز ادام.       

كۇلىكبايەۆ جابىرلەنۋشىلەرگە قىرۋار قارجى قارىز بولىپ قالدى. سۋديا ونى ءبىر اي ىشىندە 50 ميلليون تەڭگەدەن استام وتەماقى تولەۋگە مىندەتتەدى. ال قىلمىسكەردى ۇستايمىن دەپ قازا تاپقان ايان عالييەۆتى مەملەكەتتىك ناگراداعا ۇسىنۋ تۋرالى جەكە قاۋلى شىعارىلعان. 

انار اسانوۆا، مارقۇم ا.عالييەۆتىڭ جەسىرى:

-توعىز جەردەن جارالانسا دا كۇلىكبايەۆتى توقتاتا ءبىلدى. ەگەر ول توقتاتپاعاندا قانشا ادامدى ولتىرەر ەدى. سول سەبەپتى مەن ارتىنان قالعان بالالارىنا، باسقا دا جاستارعا ۇلگى بولسىن، قازىرگى زاماننىڭ باتىرى رەتىندە ەرلىگى ەسكەرىلۋى كەرەك دەپ ويلايمىن.

مۇزداي قارۋلارعان قاسكوي شىلدەدە الماتىنىڭ ءتارتىپ ساقشىلارىنان اياعىنان تىك تۇرعىزعان بولاتىن. ءتارتىپ ساقشىلارىنا كەكتەنگەن لاڭكەس 9 قۇزىرلى ورگان قىزمەتكەرى مەن ءبىر بەيبىت تۇرعىندى اتىپ ءولتىردى. ەندى وسى قاندى قىلمىسى ءۇشىن جازاسىن ەرەكشە رەجيمدەگى «قارا بۇركىت» تۇرمەسىندە وتەۋى ءتيىس. قوستاناي وبلىسىنداعى وسى كولونيادا اتىشۋلى ۆلاديسلاۆ چەلاح تا وتىر. ال كۇلىكبايەۆ ەندى وعان ەشكىمنىڭ جازاسىن جەڭىلدەتپەيتىنىن تۇسىنسە كەرەك، اپەللياسيالىق شاعىم جازبايمىن دەپ ادۆوكاتىنىن سالەم ايتىپ جىبەرىپتى.

-قاندىقول قاراقشىنىڭ بۇگىننەن باستاپ بوستاندىققا شىعۋعا دەگەن ءۇمىتى تولىق ءۇزىلدى. سوندىقتان ول ەلىمىزدە ءولىم جازاسىنىڭ ورىندالۋىنا جاريالانعان موراتوريي الىنىپ تاستالعانشا قاتاڭ رەجيمدەگى تۇزەتۋ مەكەمەلەرىنىڭ بىرىندە وتەيتىن بولادى. ايتا كەتەيىك رۋسلان كۇلىكبايەۆقا قولدانىلعان ەڭ اۋىر جازا ەلىمىزدە سوڭعى رەت وسىدان ون جىل بۇرىن قولدانىلعان ەكەن.

بۇگىن سونداي-اق، سوت كۇلىكبايەۆتىڭ سىبايلاستارىنا دا ۇكىم كەستى. توپتاسىپ ادام توناپ، قاراقشىلىق جاساعان بەس جىگىت 3 جىلدان 10 جىلعا دەيىن باس بوستاندىقتارىنان ايىرىلدى.