حالىقارالىق «شەكاراسىز رەپورتەرلەر» ۇيىمى باسپا ءسوز بوستاندىعىنا توسقاۋىل جاساعان تانىمالى تۇلعالاردىڭ ءتىزىمىن جاسادى، دەپ حابارلايدى «قامشى» پورتالى BBCء-دىڭ ورىس قىزمەتىنە سىلتەمە جاساپ.

اتالعان تىزىمگە رەسەي پرەزيدەنتى پۋتين، شەشەنستان رەسپۋبليكاسى پرەزيدەنتى رامازان قادىروۆ باستاعان ليدەرلەر تاعى دا كىرگەن.

ايتا كەتەر بولساق، پۋتين اتالعان تىزىمنەن 2000 جىلدان، پرەزيدەنت بولعالى بەرى شىعا الماي كەلەدى. ال، قادىروۆ بولسا 2005 جىلدان اتالعان تىزىمدە.

پۋتين تىزىمدە «ۇلتتىق اۆتوريتاريزم» تاكتيكاسىن قولدانىپ، باسپاسوزگە قىسىم جاساۋشى تۇلعا رەتىندە ورىن العان.

ءتىزىم اۆتورلارى «سوۆەت بيلىگى قۇلاعالى بەرىگى ۋاقىتتا رەسەيدە مۇلدە از تاۋەلسىز اقپارات كوزى قالدى» دەيدى. ءپۋتيننىڭ باسپاسوزگە قىسىمىنا «ىلعي دا قيتۇرقى زاڭ قابىلدايتىن» مەملەكەتتىك دۋما، «تاۋەلسىز باق-تى ساتىپ الاتىن» وليگارحتار، كۇشتىك قۇرىلىمدار كومەكتەسەدى.

تىزىمگە سونداي-اق تمد ەلدەرىنەن ازەربايجان پرەزيدەنتى يلحام الييەۆ، بەلورۋس پرەزيدەنتى الەكساندر لۋكاشەنكو، قازاقستان پرەزيدەنتى نازاربايەۆ پەن  تۇركمەن باسى گۋربانگۋلى بەردىمۋحامەدوۆتەر دە ەنگەن.

سونىمەن قاتار جۇڭگو، تۇركيا، ساۋد ارابيا ەلدەرىنىڭ دە پرەزيدەنتتەرى تىزىمنەن ويىپ ورىن العان.