پاۆلوداردا قىزىن ۇرىپ-سوققان نۇرگۇل دوكۋوۆاعا قاتىستى ءىس اكىمشىلىك سوتقا جىبەرىلدى. ءبۇلدىرشىندى اياۋسىز تومپەشتەپ، ۆيدەوعا تۇسىرگەن قاتىگەز كەلىنشەك ەندى انالىق قۇقىعىنان ايىرىلۋى مۇمكىن. ال سوت شەشىمىنە دەيىن اكەسىنىڭ تاربيەسىنە بەرىلگەن ءايليننىڭ ءوزى بۇگىن سۇمدىق وقيعادان كەيىن العاش رەت بالاباقشاعا باردى.

بۇل تۋرالى كتك ارناسى حابارلايدى. 

نۇرگۇل دوكۋوۆانى اتا-انا قۇقىعىنان ايىرۋ تۋرالى ازاماتتىق تالاپ-ارىزدى قالالىق ءبىلىم ءبولىمى تۇسىرگەن. بۇل ءىستىڭ نۇكتەسى قاراشانىڭ 15ء-ى كۇنى قويىلماق. ال «بالاعا قاتىگەزدىك كورسەتۋ» بابى بويىنشا قوزعالعان قىلمىستىق ىسپەن پوليسيا اينالىسۋدا. كەلىنشەكتىڭ اقىل-ەسىنىڭ دۇرىستىعىن انىقتايتىن ساراپتامالار تاعايىندالعان. ەستەرىڭىزگە سالساق، بۇرىنعى كۇيەۋىنەن ءوش الۋ ماقساتىمەن 3 جاسار قىزىن ۇرىپ جىلاتىپ، ونىسىن ۆيدەوعا تۇسىرگەن كەلىنشەكتىڭ ارەكەتى قوعامدا قىزۋ تالقىعا تۇسكەن بولاتىن.

ەرجان قاسىموۆ، ءايليننىڭ اعاسى:

– ەشقانداي دا كەلىسىم بولمايدى. ءبىز ءۇشىن باستىسى – بالانىڭ قاۋىپسىزدىگى. ءايليننىڭ اناسى بۇگىنگە دەيىن ءبىر رەت تە كەلگەن جوق، حابارلاسپادى دا. سوت ونى انالىق قۇقىعىنان ايىرماعان جاعدايدا، اپەللياسيالىق سوتقا شاعىم جازامىز. بالانى ءوز قامقورلىعىمىزعا العىمىز كەلەدى.