بىرنەشە جىل بۇرىن جەتى جىلعا سوتتالعان ەكس-مينيستر بۇگىندە وپەراسيالىق ۇستەل جانىنا قايتا ورالدى. بۇل تۋرالى جاقسىلىق دوسقالييەۆ «حالىق سوزىنە» بەرگەن سۇحباتىندا ايتىپ بەردى.
مەملەكەت باسشىسىنىڭ ارالاسۋىمەن بوساتىلعان دارىگەر كۇن سايىن ادام ومىرىنە اراشا ءتۇسىپ، ءوزىنىڭ سۇيىكتى ىسىمەن اينالىسۋدا.
ءقازىر جاقسىلىق دوسقالييەۆ ءوزىن بوستاندىققا شىعارۋعا ىقپال ەتكەن ەلباسىنا ىشتەي راحمەتىن ايتىپ جۇرەدى ەكەن.
«بالكىم مەن «انا جاقتا» جاتسام، وسى كۇنگە دەيىن ءولىپ كەتەر مە ەدىم. ءقازىر كۇن-تۇنى ەلباسىنا العىس ايتامىن، ىشتەي. مەنىڭ ءوتىنىشىمدى قاراۋعا ۋاقىت تاۋىپ، ۇلكەن جۇرەكپەن كەلدى. تەك قانا مەن ەمەس، بەسىكتەگى بالامىزدان باستاپ بۇكىل تۋعان-تۋىستارىم، جاقىندارىم، ءبارىمىز ءقازىر سول كىسىنىڭ تىلەۋىن تىلەيمىز»، - دەيدى ءوز سوزىندە دارىگەر.
ءسوز اراسىندا جاقسىلىق دوسقالييەۆ وپەراسيانى سەگىز ساۋساعىمەن جاسايتىنىن ايتىپ قالدى. ەستەرىڭىزدە بولسا، ول «قىزمەت بابىن اسىرا پايدالاندى» دەگەن كۇدىكپەن قىلمىستىق ءىس بويىنشا تەرگەۋ كەزىندە ينسۋلت العان ەدى.
«مەن ءقازىر ەكىنشى توپتاعى مۇگەدەكپىن. ءبىراق مۇگەدەكپىن دەپ ءوزىمدى اياپ وتىرا المايمىن. ارينە، ارىپتەستەرىمە العىس ايتامىن. مەنىڭ اياققا تۇرىپ كەتۋىمە كۇش-قاجىرلارىن ايامادى. ءقازىر ەكى ساۋساعىم ناشارلاۋ، ءبىراق سەگىز ساۋساقتىڭ ءوزى وپەراسياعا جەتىپ جاتىر. سول اياعىمدى سىلتىپ باسامىن. سپرينتەرلىك جۇگىرۋگە بارمايمىن. ءبىراق كۇنبە-كۇن ارىپتەستەرىمدى ۇيرەتۋگە، نان تاۋىپ جەۋگە دەنساۋلىعىم جەتەدى»، - دەيدى دارىگەر حيرۋرگ.
ەكس-مينيستر جوعارى لاۋازىمدا وتىرعان ۋاقىتتا ارىپتەس بولعان اتقامىنەر ازاماتتارمەن ءالى كۇنگە ارالاسىپ تۇراتىنىن جەتكىزدى.
«بارلىعىمەن ارالاسىپ تۇرامىن، دەپۋتاتتارمەن دە، ۇكىمەت مۇشەلەرىمەن دە، بارلىعىمەن. مەن ولارمەن نەگە ارالاسپاۋىم كەرەك؟ بىرەۋدىڭ اكەسىن، بىرەۋدىڭ شەشەسىن ولتىرگەن جوقپىن. مەن ەشتەڭە ۇرلاعان جوقپىن. ءوزىمدى قىلمىسكەرمىن دەپ سانامايمىن. ويتكەنى مەن ونى جاساعان جوقپىن»، - دەدى ەكس-مينيستر.
سونداي-اق، ەكس-شەنەۋنىك، ەشكىمگە وكپەلەمەيتىنىن مالىمدەدى.
ول بۇرىنعى لاۋازىمدى قىزمەتىنەن ەشقانداي راحات كورمەگەنىن جەتكىزدى.
«بىلايعى حالىق مينيستر بولعان راحات دەپ ويلايتىن شىعار. ەشقانداي دا راحاتىن كورمەدىم. اشىعىن ايتقاندا، ءمينيستردىڭ قىزمەتىندە جۇيكە توزدىرۋدان باسقا ەشتەڭە جوق. ويتكەن، مينيستر بولساڭ، بارىنە سەن كىنالىسىڭ، ايدالاداعى مەدبيكە ناۋقاستى قاباق شىتىپ قارسى السا، تاياق ساعان تيەدى. كۇندە تاياقتىڭ استىندا بولعان وڭاي ەمەس»، - دەيدى جاقسىلىق دوسقالييەۆ.
دارىگەر مىرزانىڭ بالالارى ەلدە ابىرويمەن قىزمەت جاساپ جاتىر ەكەن.
«ۇلىم – نەيروحيرۋرگ، جاپونيادا بەس جىل وقىپ كەلىپ، نەيروحيرۋرگيا ورتالىعىندا جۇمىس ىستەپ جاتىر. قىزىم – نوتاريۋس. ءتورت نەمەرەم بار»، - دەپ شۇكىرشىلىك ەتەدى جاقسىلىق دوسقالييەۆ.
دارىگەر-حيرۋرگ قازاقستانداعى ترانسپلانتاسيا ماسەلەسىنە توقتالدى. ونىڭ ايتۋىنشا، ەلىمىزدە مامان تاپشى ەمەس، دارىگەرلەر جەتكىلىكتى. ترانسپلانتاسيا جاساۋعا تەك دونور تاپشىلىعى سەزىلەدى.
