بورتكەن، تەرىسكەن جانە ۇشىق
پامپەرس اتتى پالە بار (جايالىقتان ساداعا كەتكىر). سوسىن پامپەرستىڭ جارناماسى بار. ءاۋ-باستا ونى كورشى ەلدىڭ تىلىندە جاساعان. سوسىن بىرەۋ قازاقشالاعان. جارنامانىڭ ءبىر تۇسىندا مىناداي تىركەس ءجۇر: "اياقتاردىڭ اراسىنداعى ىلعالدى تۇيىرشىكتەردىڭ پايدا بولۋىنا جول بەرمەيدى". ەندى ءبىز وسىنى قازاقشالاپ كورەلىك. "شاپتى بورتكىزبەيدى". اناۋ اۋدارماداعى سەگىز ءسوزدى اتام قازاق ەكى-اق سوزبەن جەتكىزىپتى. ءبىراق ءبىزدىڭ "اسا ساۋاتتى اۋدارماشىلار" بورتكەندى بىلە قويماس. سول سياقتى كوزگە نەمەسە تىلگە شىعاتىن تەرىسكەندى. ەرىنگە شىعاتىن ۇشىقتى. ولار ون جىلدان استى "كاريستى" "تىسجەگى" دەپ جانە ءبىر جاڭالىق اشىپ تاستاعان. بارلىق جارنامادا سولاي. ناقتى قازاقتىڭ ءسوزى "قانقۇرت" ەدى. ايتىلعانى "قانعۇرت". "تىسىڭە قاڭقۇرت تۇسپەسىن" دەپ وتىراتىن جارىقتىق اجەمىز. ال جانە ءبىر جارناماداعى "اۋىزدىڭ ىشكى قۋىسىندا پايدا بولاتىن ويىقتىڭ" ناق اتاۋى: "اۋىزدىڭ ۋىلۋى". و-و، وسىنىڭ ءبارىن ويلاعاندا ەن دالاعا تەنتىرەپ كەتكىڭ كەلەدى. مۇقىم اقسۋات "ءبىزدىڭ قاينار قايدا قاراپ وتىر" دەمەۋى ءۇشىن.