زاڭگەر ابزال قۇسپان الەۋمەتتىك جەلىدە حالىق ءارتىسى تۇڭعىشباي جامانقۇلوۆتىڭ قارجى جىمقىردى دەگەن كۇدىكپەن ۇستالۋىنا وراي پىكىرىن ءبىلدىرىپ، ءىستىڭ ارتى قيىن بولاتىنىن ايتىپتى، - دەپ حابارلايدى Qamshy.kz.

«تۇڭعىشباي جامانقۇلوۆ اعامىزدىڭ ۇستالۋىنا بايلانىستى نە ايتۋعا بولادى؟ قازىرگى بيلىكتىڭ ۇرانى (الدە ۇستانىمى) «باردىم. ۇستادىم. سوتتادىم» بولىپ تۇر. سوندىقتان مەن زاڭگەر رەتىندە تۇڭعىشباي اعامىزدىڭ سوتتالاتىنىنا تولىق سەنىمدىمىن. ماسەلە ونىڭ كىناسىنىڭ بولۋ، بولماۋىندا ەمەس، ماسەلە مەملەكەت ۇستانىمىندا. ول ءۇشىن مەملەكەتتىڭ «داموكلاۆ قىلىشى» - قوجامجاروۆ باسقاراتىن اگەنتتىك (الدە مينيسترلىك) بار. ول مەكەمەمەن قوزعالعان ىستەر بويىنشا مىندەتتى تۇردە ايىپتاۋ ۇكىمى شىعارىلادى. ماسەلە تەرگەۋدىڭ ساپاسى ارتىپ كەتكەنىندە ەمەس، ماسەلە مەملەكەتتىڭ ۇستانىمىندا.

اعامىز ءۇشىن قۇتىلۋدىڭ جالعىز-اق جولى بار، ول - قىلمىسىن تولىق مويىنداپ، ءبىر ادامنان كەشىرىم سۇراپ، ماتەريالدىق زالالدى (ۇرلاسا دا/ۇرلاماسا دا) مۇمكىندىگىنشە تولەۋ. قۇتىلۋدىڭ باسقا جولى جوق. ال، شۋلاپ جاتقان جۇرتقا ايتارىم، وسىلاي شۋلاپ-شۋلاپ باسىلامىز، ءبىرىنشى رەت ەل جاقسىلارى سوتتالىپ جاتقان جوق، ءبىرىنشى رەت شۋلاپ جاتقان جوقپىز...» دەپ جازادى ابزال قۇسپان.