ءبىز جۋىردا جەر جانە قۇرىلىس جونىندەگى ءماسليحات جانىنداعى كوميسسيا مۇشەلەرىمەن بىرىگىپ، جەر ماسەلەسى تۋرالى جيىن وتكىزىپ، حالىق پىكىرىن تىڭدادىق. وندا قالا تۇرعىندارى قالا سىرتىندا يگەرىلمەي جاتقان جەر تەلىمدەرى بولسا، ونى تۇرعىن ءۇي سالۋعا، بولماسا، شارۋاشىلىق جۇرگىزىپ، جەكە كاسىپ اشۋ يگىلىگىنە بەرسە دەگەن ۇسىنىستارىن ءبىلدىردى. تۇرعىنداردىڭ بۇل پىكىرلەرىن جيناقتاپ، ءبىز جەر ماسەلەسى جونىندە قۇرىلعان كوميسسياعا ۇسىنباقپىز. ال ەندى ءوزىم سايلانعان الاتاۋ اۋدانىنداعى سايلاۋ ۋچاسكەسىنىڭ سايلاۋشىلار تاراپىنان بەرىلگەن تاپسىرمالارىمنىڭ ءبىرقاتارىن ورىندادىم دەسەم دە بولادى. «العاباس» ىقشاماۋدانى تۇرعىندارى جۇرگىنشى جولدارىن سالۋ جونىندە ۇسىنىس ايتقان ەدى، ول ماسەلە شەشىمىن تاپتى. ال وسى ىقشاماۋدان تۇرعىندارىنىڭ «اقساي» كوشەسىن اسفالتتاپ بەرۋ تۋرالى ماسەلە كوتەرگەندەرىنە ءبىراز ۋاقىت بولسا كەرەك. جاقىندا ول ماسەلە دە دەمەۋشىلەرىءمىزدىڭ ارقاسىندا شەشىمىن تاپتى. ءبىز قالانىڭ قۇرىلىسىنا كورىكتەندىرۋ مەن كوگالداندىرۋ جۇمىستارىن جىل باسىندا قابىلدانعان الماتى قالاسىن دامىتۋعا باعىتتالعان «الماتى-2020» باعدارلاماسى اياسىندا جۇزەگە اسىرىپ كەلەمىز. مەملەكەتتىك-جەكەمەنشىك سەرىكتەستىك جوباسى اياسىندا «بورالداي» ىقشاماۋدانىندا بالالارعا ارنالعان سپورت-ويىن الاڭىن سالدىق. حالىق سەنىمىن ارتىپ، قولىمىزعا دەپۋتاتتىق مانداتىمىزدى الىپ جۇرگەندىكتەن، سايلاۋشىلار تاراپىنان ايتىلعان قانداي دا ءبىر ءوتىنىم، تىلەك بولسىن سەرگەكتىكپەن قاراۋعا تىرىسامىن. الاتاۋ اۋدانى بويىنشا وتكىزىلگەن «مەكتەپكە جول» قايىرىمدىلىق اكسياسىنا اتسالىسىپ، كوپبالالى وتباسىلارى مەن تۇرمىسى تومەن وتباسىلارىندا تاربيەلەنىپ جاتقان بالالاردىڭ قاتارىنان قالماي، مەكتەپكە بارۋىنا جاعداي جاسادىق. سونىمەن قاتار، اۋىر ناۋقاسقا شالدىققان ءبىر ءسابيدىڭ ەمدەلۋىنە كومەك قولىن سوزدىق. ادامعا كومەك قولىن سوزۋ دەپۋتاتتىق قانا مىندەتىم ەمەس، ءوزىمنىڭ ازاماتتىق، انالىق پارىزدارىمنىڭ ءبىرى دەپ سانايمىن. قولىڭنان كەلسە، ادامدارعا قولۇشىن بەرگەنگە نە جەتسىن. وسى رەتتە مەن الەۋمەتتىك جوبالارعا گرانت بولگەن كەزدە سول قوعامدىق ۇيىمداردىڭ قولعا العالى وتىرعان جۇمىستارىنىڭ جوسپارى، باعىت-باعدارىمەن تانىسىپ، ولاردىڭ وسى ۇيىم ارقىلى ادامدارعا قانداي كومەك كورسەتە الادى، سونى باعامداپ بارىپ گرانت بولسەك دەپ ويلايمىن. بولماسا، بىزدە الەۋمەتتىك جوبالالارعا بەرىلەتىن گرانتتاردى جىل سايىن ۇتىپ العانمەن، ول قاراجاتتى حالىق يگىلىگىنە جۇمسايتىندارى نەكەن-ساياق. سودان كەيىنگى قالا تۇرعىنى رەتىندەگى تاعى ءبىر ۇسىنىسىم – ورتالىق كوشەلەردەگى تاماق، كيىم، قىمبات ۇيالى تەلەفوندار تۋرالى جارنامالاردى ازايتساق. جارنامانىڭ قالا بيۋدجەتىنە قوماقتى قارجى اكەلەتىندىگىن جاقسى تۇسىنەمىن، ءبىراق، بىزگە ءدال ءقازىر جاستاردى دۇنيەقۇمارلىققا تاربيەلەيتىن ونداي سۇرەڭسىز جارنامالاردان گورى، رۋحاني دەم بەرەتىن، جاستاردىڭ سولارعا ەلىكتەۋىنە ىقپال ەتەتىن بەلگىلى سپورتشىلارىمىزدىڭ، عالىمدارىمىزدىڭ، دەنساۋلىق ساقتاۋ، ادەبيەت پەن ونەر سالاسىنىڭ كورنەكتى وكىلدەرىنىڭ، الماتى قالاسىنىڭ قۇرمەتتى ازاماتتارىنىڭ سۋرەتتەرى ءىلىنۋلى تۇرسا، الماتى قالاسىنىڭ كوشەلەرى اجارلانا تۇسەر ەدى. ءقازىر كوشە بويلارىنا دانالىق سوزدەردى جازىپ ءىلىپ قويىپتى. ورىسشادان قازاقشا اۋدارىلسا كەرەك، كەيبىر سوزدەرى وراشولاقتاۋ كورىنگەنمەن، وقىعان ادامىن ويلاندىرادى. بۇل دەگەنىڭىز قالا باسشىلىعىنىڭ كوشە تاربيەسىنە كوڭىل بولە باستاعانىنىڭ بەلگىسى. بالا تۇرماق، ۇلكەن ادامنىڭ ءوزىن قورشاعان ورتاسى مەن كوشە تاربيەلەيتىنىن ەسكەرسەك، مۇنداي ساناعا ساۋلە تۇسىرەتىن كورىكتى ويلاردىڭ قالا اۋداندارىنىڭ كوشەلەرىندە دە بولعانى ابزال. «الماتى-2020» باعدارلاماسىنىڭ ەڭ باستى ماقساتى – قالانى تۇرعىندارعا جايلى قالا جاساۋ بولىپ وتىرعاندىقتان، ءبىز بارىنشا وسى ماسەلەگە جان-جاقتى كوڭىل ءبولۋىمىز كەرەك. مەن جاقىندا دەپۋتاتتىق جۇمىسىما بايلانىستى الاتاۋ اۋدانىنداعى ازتم دەپ اتالىپ كەتكەن ىقشاماۋدان تۇرعىندارىمەن كەزدەستىم. وندا تۇرىپ جاتقان 60 وتباسىنىڭ ءالى كۇنگە دەيىن تۇراقتى باسپانالارى مەن تىركەۋلەرى جوق ەكەن. ءقازىر شەشىمى تابىلماي كەلە جاتقانىنا جيىرما جىلعا جۋىقتاپ قالعان وسى ازتم ىقشاماۋدانى تۇرعىندارىنىڭ ماسەلەسىن شەشۋ جولدارىن قاراستىرىپ جاتىرمىز. «الماتى – 2020» دامۋ باعدارلاماسىنىڭ تالاپتارىن ەسكەرە وتىرىپ، وسى ايماقتان شاعىن تۇرعىن ءۇي كەشەنىن سالۋ ويىمىزدا بار. الماتى قالاسىنا قوسىلعان ەلدى مەكەندەردىڭ ماسەلەسى ءالى شاشەتەكتەن، دەگەنمەن، كۇرمەلىپ قالعان ماسەلەلەردىڭ ءتۇيىنىن ءبىر جىلدا شەشىپ تاستاۋ مۇمكىن ەمەس، دەگەنمەن، قالا باسشىسىنىڭ قازىرگى ۇستانىپ وتىرعان الماتى قالاسىن دامىتۋ باعىتىنداعى كورەگەن ساياساتى بۇل ماسەلەلەردىڭ جاقىن ۋاقىتتاردا وڭ شەشىمىن تابۋىنا مۇمكىندىك بەرەدى دەگەن سەنىمدەمىن. ەڭ باستىسى، ۇستانىپ وتىرعان باعىتىمىز دۇرىس. سول باعىتتا ءبىر جاعادان باس، ءبىر جەڭنەن قول شىعارا ەڭبەك ەتسەك، العا قويعان ماقساتتارىمىزعا قول جەتكىزەمىز. ال وعان «نۇر وتان» پارتياسىنىڭ سايلاۋالدى تۇعىرنامالىق باعدارلاماسى نەگىز بولماق.
فاريدا مەرحاميت قىزى
«الماتى اقشامى» گازەتى
