شاھار باسشىسى باۋىرجان بايبەك الماتىدا وتكەن تمد سالىق قىزمەتتەرىنىڭ فورۋمىنا قاتىستى

تمد مەملەكەتتەرى سالىق قىز­مەتى باسشىلارى ۇيلەستىرۋ كەڭەسىنىڭ ءححىىى وتىرىسى الماتىدا ءوتتى. كەڭەس وتىرىسىنا قاتىسقان الماتى قالاسىنىڭ اكىمى باۋىرجان بايبەك قازاقستاننىڭ قارجى جانە بيزنەس ورتالىعى – الماتىدا سالىق قىز­مەتىنىڭ ماڭىزى مەن اتقارار ءرولى ەرەكشە ەكەنىن ايتتى.

– الماتى – مەملەكەت كىرىسىنىڭ ۇشتەن ءبىرىن بەرەتىن دونور-قالا. مەملەكەت باسشىسىنىڭ ايقىنداپ بەرگەن باعدارلا­مالارى مەن مەگاپوليستەگى جوعارى دەڭگەيدەگى بيزنەس-احۋالدىڭ ارقاسىندا الماتىلىقتار تابىس تابۋدا. ءبىز الماتىنى كاسىپكەرلىك پەن جەكە كاپيتالدىڭ قالاسى دەپ ايتامىز. تاۋەلسىزدىكتىڭ 25 جىلدىق ۋاقىتىندا قازاقستان ەكونوميكاسى 20 ەسە وسسە، الماتىنىڭ جالپى ايماقتىق ءونىمى (ءجاو) 100 ەسە بولىپتى. الماتى تۇرعىن­دارىنىڭ كىرىسى جالپى ەلمەن سالىس­تىرعاندا 2،2 ەسە كوپ. بۇگىندە الماتىنىڭ «جالپى ايماقتىق ءونىمى» 41 ملرد. اقش دوللارى. بۇل كەڭ كولەمدە سالىستىرعاندا جامان كورسەتكىش ەمەس، – دەدى الماتى قالاسىنىڭ اكىمى.

شاھار باسشىسى جەتى باسىم باعىتقا نەگىزدەلگەن «الماتى-2020» باعدارلاماسى تۋرالى دا جان-جاقتى ايتىپ بەردى. ب.بايبەك سالىق قىزمەتى باعدارلاماداعى باستى باعىتتاردىڭ ءبىرى – «تۇرعىندارعا جايلى قالا» تۇعىرناماسىنىڭ دامۋىنا تىكەلەي قاتىستى ەكەنىنە توقتالدى. باعدار­لامانىڭ وسى باعىتى قالا ەكونوميكاسىنا شەتەلدىك ينۆەستورلار مەن قوسىمشا ينۆەستيسيالار تارتۋعا مۇمكىندىك بەرەدى.

– ءبىز بىلتىر 4،2 پايىز ەكونوميكالىق وسىمگە قول جەتكىزدىك، بيىل دا جاقسى كور­سەتكىشتەر كۇتۋدەمىز. جالپى، 2016 جىلدىڭ 9 ايىندا بيۋدجەت شامامەن 80 پايىزعا ورىندالدى. شاعىن جانە ورتا بيزنەستەن (شوب) جينالعان سالىق ءتۇسىمى 40 پايىزدان استى، كەزىندە 10 پايىزدان باستاعان بولاتىنبىز، – دەدى ب.بايبەك.

تاۋەلسىزدىك تۇسىنداعى سوڭعى 15 جىلدا ەل بيۋدجەتىنە سالىق جانە باسقا دا مىندەتتى تولەمدەردى جيناۋ 9 ەسە ارتقان. بۇل كور­سەتكىش 2000 جىلى 393 ملرد. تەڭگە بولسا، 2015 جىلى 5،1 ترلن. تەڭگەگە جەتتى. وسى تۇرعىدان كەلگەندە، ەلدەگى، مەگاپو­ليستەگى بيۋدجەتتىك تابىستىڭ نەگىزى – سالىقتىق ءتۇسىم. ال بيۋدجەتتى قالىپتاس­تىراتىن قارجى بولسا، ەلدەگى جاسالىپ جاتقان بارلىق باعدارلامالاردىڭ كۇرە­تامىرى.

الماتىدا وتكەن تمد مەملەكەتتەرى سالىق قىزمەتى باسشىلارى فورۋمىندا دوستاستىق ەلدەرىنىڭ قارجى-ەكونوميكالىق سالاداعى ءوزارا بايلانىس، ءىس-قيمىلدارى تالقىلاندى. فورۋمداعى باستى تاقىرىپ­تاردىڭ ءبىرى – سالىق قىزمەتىندە شوت-فاكتۋرالاردىڭ، تاۋارلاردىڭ قوزعالىسىنا ارنالعان قۇجاتتاردىڭ (ناكلادنوي) ەلەكتروندى جۇيەسىن ەنگىزۋ تاجىريبەسى بولدى. تمد ەلدەرى بويىنشا كەدەندىك، سالىقتىق قىزمەتتەردىڭ مەملەكەتارالىق ءوزارا بايلانىسى ءسوز بولدى.

نۇرلان ءسۇيىن

«الماتى اقشامى»