ۇلكەن داۋمەن كۇللى ەلگە جامان اتى شىققان قىلمىستىق اتقارۋ جۇيەسى كوميتەتىنىڭ ءتوراعاسى قىزمەتىنەن الىندى. ءبىراق گەنەرال باۋىرجان بەرداليننىڭ ورنى ۇزاق ۋاقىت بوس قالعان جوق. بۇگىن ىشكى ىستەر ءمينيسترى قالمۇحانبەت قاسىموۆ ەل تۇرمەلەرىندەگى تارتىپكە جاۋاپتى ەتىپ ازامات بازىلبەكوۆتى تاعايىندادى. 

بۇل تۋرالى كتك ارناسى حابارلايدى.

45 جاستاعى بازىلبەكوۆ بۇعان دەيىن قىلمىستىق اتقارۋ جۇيەسى كوميتەتى ءتوراعاسىنىڭ ورىنباسارى بولعان. ياعني، جاڭا باسشىعا بۇل قىزمەت تانسىق ەمەس. ايتا كەتۋ كەرەك، سوڭعى كەزدە ەلىمىزدەگى تۇرمەلەردەن ءجيى شۋ شىعىپ ءجۇر. ماسەلەن، جۋىردا عانا جازاسىن وتەپ جۇرگەن كەلىنشەكتى زورلاعانى ءۇشىن تۇرمە قىزمەتكەرى رۋسلان حاكيموۆ 9 جىلعا سوتتالدى. ال ناتاليا سلەكشينانىڭ ساقشىدان بالاسى بار. سونداي-اق، قوعام بەلسەندىلەرى «اباقتى ەسىرتكى بازارىنا اينالعان » دەپ شۋلاعان بولاتىن. ول ازداي تۇزەتۋ مەكەمەلەرىندە لاڭكەستەردىڭ قاتارداعى سوتتالۋشىلارمەن ءبىر كامەرادا وتىرۋى جاعدايدى ۋشىقتىرىپ وتىر. تەمىر تورداعى تارتىپسىزدىك سياقتى ءبىراز بىلىقتىڭ  ءبارىن ەندى ازامات بازىلبەكوۆ رەتتەۋى ءتيىس.