بۇعان دەيىن ءبىرقاتار اقپارات قۇرالدارى شىعىس قازاقستاندا ءبىلىم بەرۋ، مادەنيەت مەكەمەلەرىنە قازاقتىڭ ۇلى تۇلعالارى مەن كورنەكتى قايراتكەرلەرىنىڭ ەسىمى بەرىلەتىنىن سۇيىنشىلەي جازعان ەدى. وسى يگى باستاما شىعىستاعى كەي ادامدارعا تۇرپىدەي تيگەن سىڭايلى. «ەكسپرەسس ك» گازەتىنە سەمەي قالاسىنان جەتكەن يليا ميللەر دەگەننىڭ «ا پولى مىت بايتۋرسىنوۆ بۋدەت؟» (ال، ەدەندى بايتۇرسىنوۆ جۋىپ بەرە مە؟) دەگەن ماقالاسىن وقىعاننان كەيىن ايتىپ وتىرمىز مۇنى.

اۆتور وبلىس باسشىلىعىنىڭ شەشىمىنە كوڭىلى تولمايتىنىن ءبىلدىرىپ قانا قويماي، بيلىكتەگىلەرگە «مەكتەپ اتىن اۋىستىرعانشا، ەدەن جۋۋشىلارعا شتات اشىڭدار» دەگەنگە ساياتىن كەڭەس تە بەرە كەتىپتى.

قازاقتىڭ اعارتۋشى عالىمىنا ءتىل تيگىزگەن ميللەردىڭ بۇل قىلىعىنا جەلى قولدانۋشىلارى ورە تۇرەگەلدى.

الماسبەك ءابسادىق ەسىمدى قولدانۋشى: «قازاقستاندا ءومىر ءسۇرىپ، قازاقستان زاڭدارىن پايدالانا وتىرىپ باسىلىمنىڭ ءبىرىنشى بەتىندە مەملەكەتتىڭ ەڭ بيىك تۇلعالارىنا ءتىل تيگىزۋ - ارسىزدىق بەلگىسى. ەلدى، جۇرتتى سىيلاماۋدىڭ كورىنىسى. ا.بايتۇرسىن ۇلى – الاشتىڭ ۇلى تۇلعاسى. ەگەر «ەك» تۇسىنبەسە، ا.بايتۇرسىن ۇلى – ورىستىڭ لومونوسوۆىمەن تەڭ تۇلعا. 
قازاقتىڭ ۇلى تۇلعالارىنىڭ ەسىمى بەرىلسە، قارسى شىعاتىن باسىلىمدار بار. مىنا يليا ميللەر سەكىلدى جۋرناليستەرگە مەملەكەت قۇندىلىعىن اياققا تاپتاعانى ءۇشىن ەسكەرتەتىن اقپارات جانە كوممۋنيكاسيا مينيسترلىگى، ق ر جۋرناليستەر وداعى بار ما ەكەن تاۋەلسىز قازاقستاندا؟» دەسە، نۇرقانات قۇلابايەۆ ەسىمدى فەيسبۋك قولدانۋشىسى «بۇلاردى دا ءتۇسىنۋ كەرەك، الەكە! 1 مەكتە نەمەسە 1 كوشە قازاقىلانسا، 100-دەگەن شوۆينيست ينفاركت الادى. بايقۇستار كۇندىز كۇلكى، تۇندە ۇيقى جوق، قان قىسىمى كوتەرىلىپ بىتەتىن بولدى ابدەن)» دەپ قازاق اتاۋلارىنا قارسى شىعۋشىلاردىڭ ءوزىن تۇيرەپ ءوتىپتى. 

گازەتتىڭ سايتىندا جاريالانعان ماقالا