4 قاراشا كۇنى تۇركيانىڭ وڭتۇستىك-شىعىسىنداعى ديارباقىر قالاسىندا بولعان جارىلىستا قازاقستان ازاماتتارى زارداپ شەككەن جوق. مۇنداي اقپارات ق ر يينۆەستيسيالار جانە دامۋ مينيسترلىگىنىڭ فەيسبۋك جەلىسىندەگى پاراقشاسىندا ورنالاستىرىلدى، - دەپ حابارلايدى Qamshy.kz.
«تۇركيا پرەمەر-مينيسترى بينالي ييلدىرىم ەلدىڭ وڭتۇستىك-شىعىسىنداعى ديارباقىر قالاسىندا مينا قويىلعان اۆتوكولىك جارىلىسىنان 8 ادام قازا تاۋىپ، 100-دەن اسا ادامنىڭ جارالانعانىن حابارلادى. ق ر يدم تۋريزم يندۋسترياسى دەپارتامەنتىنە زارداپ شەككەن قازاقستاندىق تۋريستەر تۋرالى مالىمەت تۇسپەگەن. ديارباقىر كۋرورتتى قالا ەمەس جانە ەلدىڭ تۋريستىك اۋداندارىنان الىستا ورنالاسقان. ق ر يدم تۋريزم يندۋسترياسى دەپارتامەنتى قازاقستان رەسپۋبليكاسىنىڭ سىرتقى ىستەر مينيسترلىگىمەن تۇراقتى بايلانىستا. ق ر يينۆەستيسيالار جانە دامۋ مينيسترلىگىنىڭ تۋريزم يندۋسترياسى دەپارتامەنتى تۇركيا اۋماعىندا جۇرگەن قازاقستاندىق تۋريستەردى مۇقيات بولۋعا جانە ساقتىق شارالارىن ساقتاۋعا شاقىرادى: ادامدار كوپ جينالاتىن ورىندارعا بارماڭىز، تۇرىپ جاتقان جەرىڭىزدەن ەش سەبەپسىز كەتپەڭىز، جەرگىلىكتى بيلىكتىڭ نۇسقاۋلارىنا قۇلاق اسىڭىز؛ تۋروپەراتورلار تۇركياداعى بولۋى مۇمكىن قاۋىپتەر تۋرالى تۋريستەردى اقپاراتتاندىرىپ وتىرۋى كەرەك»، - دەلىنگەن ورنالاستىرىلعان حابارلامادا.
