پاۆلودار قالاسىنىڭ تۇرعىنى اسقار دانياروۆ 2014 جىلدان باستاپ تۋعان جيەنى اسانباي تەلقارايەۆتى بەلگىسىز جاننىڭ الداۋ جولى ارقىلى دۋبايعا الىپ كەتكەنىن دالەلدەي الماي، ءبىرتالاي قۇزىرلى ورگاننىڭ تابالدىرىعىن توزدىرۋدا، دەپ حابارلايدى قازاقپارات.

 بۇگىنگى كۇنگە دەيىن جەتى جاسار بالا جايلى حابار-وشار الا الماي وتىرعان  تۇرعىننىڭ ايتۋىنشا، ق ر ۇلتتىق قاۋىپسىزدىك كوميتەتى باسقارماسىنىڭ باسشىسىنا جولداعان حاتتىڭ جاۋابىنا 2014 جىلى 5-قازاندا اسانباي تەلقارايەۆتىڭ «الماتى-دۋباي» باعىتىندا ەلدەن شىعىپ كەتكەنى تۋرالى رەسمي حابارلاما كەلگەن. الايدا بالانىڭ كىمنىڭ جەتەگىندە كەتكەنى جانە بۇگىنگى حال-جاعدايى بەيمالىم. - 2009 جىلى كۇزدە قىزىم گۇلنار بوسانعان سوڭ جول اپاتىنان جاراقات الىپ، № 1 ەمحانادا جاتتى. باس-ميى شايقالىپ، قابىرعالارى سىنعان ەدى. 2010 جىلى اياعىنا تۇرىپ، ءجۇرىپ جۇرە باستاعان سوڭ قۇدالارىم استاناداعى قىزدارىنا الىپ كەتتى.

الايدا ول جاقتا وتباسىندا كيكىلجىڭ تۋىنداپ، دەنساۋلىعى سىر بەرە باستادى. كۇيەۋ بالام ءىسساپاردا جۇرگەن بولاتىن. جاعدايى ناشارلاعان سوڭ، قىزىمدى الىپ كەلۋگە تۋرالى كەلدى. قۇدا مەن قۇداعي بالا سوندا بولسىن دەپ وتىنگەن سوڭ، ۋاقىتشا قالدىرۋدى ءجون كوردىك. اراعا بەس-التى كۇن سالىپ، جيەنىمنىڭ جاعدايىن سۇراپ حابارلاسىپ ەدىم، ەشكىم تەلەفوننىڭ تۇتقاسىن كوتەرمەدى. كوپ ۇزاماي گۇلناردىڭ كۇيەۋى اجىراسۋعا ءوتىنىش بەرگەنى تۋرالى حابارلاما كەلدى.  بۇعان قوسا، ايەلىنىڭ اڭعالدىعىن پايدالانىپ، باعدات پەن ونىڭ قارىنداسى بالانى الماتىعا الىپ كەتكەن. سوڭىندا الماتىعا بارىپ، 2010 جىلى 3-جەلتوقساندا قىزىم مەن كۇيەۋ بالام اجىراسىپ كەتتى. سودان بەرى ولاردىڭ ەشقايسىسىن قولعا تۇسىرە المادىق. 2012 جىلى قىزىم ۇلىنا جاقىن بولۋ ءۇشىن الماتىنىڭ ءىرى تۇرىك فيرماسىنا جۇمىسقا ەسەپشى-ەكونوميست بولىپ ورنالاستى. ول تالاي مارتە بالاسىمەن كەزدەسۋگە تىرىسقانمەن، ەش ناتيجە بولمادى. سودان 2012 جىلى بالامەن جولىعىپ، جارتى ساعاتتاي بولدىم. ءبىراق اناسى كەلگەنگە دەيىن اسانبايدى اكەسى الىپ كەتتى. بۇدان ءارى مۇلدەم حابارسىز قالدىق، - دەيدى اسقار دانياروۆ.

2015 جىلى 10 قىركۇيەكتە الماتى قالاسى مەدەۋ اۋداندىق سوتى بالانى اناسى گۇلنار تەلقارايەۆامەن قالدىرۋ تۋرالى شەشىم شىعارعان. اسانباي تەلقارايەۆ 2014 جىلى مەكتەپ تابالدىرىعىن اتتاۋى ءتيىس. دەگەنمەن الماتى قالالىق ءبىلىم بەرۋ باسقارماسى جانە ىشكى ىستەر دەپارتامەنتىمەن بىرلەسىپ جۇرگىزگەن تەكسەرىس ناتيجەسىز اياقتالعان. - 2010 جىلدان بەرى بۇرىنعى كۇيەۋ بالام باعدات تەلقارايەۆپەن بىرنەشە سوت وتىرىسى ءوتىپ، سوت قاۋلىسى شىعارىلدى. الايدا ول ءبىر دە ءبىر رەت سوتقا كەلگەن ەمەس. مەدەۋ اۋداندىق ىشكى ىستەر باسقارماسى كامەلەتتىك جاسقا تولماعاندار ءىسى جونىندەگى پوليسەيلەر مەن ۋچاسكەلىك ينسپەكتورلار، سوت ورىنداۋشىلار بۇرىنعى كۇيەۋ بالام مەن ونىڭ قارىنداسىنىڭ ۇيىنە بىرنەشە رەت بارعان. قۇدام ۇنەمى بالاسى مەن نەمەرەسى بىردە الماتىدا، بىردە اقتاۋدا تۇرادى دەپ، جالعان تەلەفون نومىرلەرىن بەرەدى. قازىرگى كۇنى گۇلنار بالانى قايتارۋ ءۇشىن تاعى دا ادۆوكات ىزدەستىرۋدە، - دەپ، اسقار دانياروۆ بالانىڭ  بولاشاعىن ويلاپ كوكىرەگى  قارس ايىرىلادى.