نۇرتاس ادامباي كينوتەاتردا اياعىن الدىڭعى ورىندىقتىڭ ۇستىنە شىعارىپ وتىراتىن ادەپسىز جاندارعا ءوز وكپەسىن ءبىلدىردى. تانىمال اكتەردىڭ ايتۋىنشا، بۇگىندە جاستار عانا ەمەس، ەرەسەك ادامدار دا قوعامدىق ورىندا وزدەرىن قالاي ۇستاۋ كەرەكتىگىن بىلمەيدى.
بۇل تۋرالى Qamshy.kz حابارلايدى.
نۇرتاس دەمالىس كۇندەرى ەكى رەت كينوتەتارعا بارعانىن جانە ونداعى كەي كورەرمەننىڭ قاراپايىم عانا كينوتەتاردا وتىرۋ ەتيكەتتەرىن بىلمەۋىنە نالىدى، جاستاردى بىلاي قويىپ، ەرەسەك ايەلدەردىڭ اياقتارىن ورىندىقتارعا اسىپ قويىپ وتىراتىنىن ايتساڭشى دەيدى رەجيسسەر.
«اياعىن كوتەرىپ وتىرعان جاندارعا ەسكەرتۋ جاساعىم كەلدى، الايدا ولار مەنەن الىستاۋ جەردە وتىردى. كەرەك دەسەڭىز بۇكىل زالعا دا ايقايلايىن دەگەنمىن. ءبىراق ءوز اتا-انالارى تاربيەلەي الماعان جاندارعا مەنىڭ ءسوزىمنىڭ ءوتۋى ەكىتالاي. مەنى اشۋلاندىرعان نارسە باسقا. سول اياعىن جوعارى كوتەرىپ وتىرعان «مادەنيەتتى جانداردىڭ» اراسىندا جاسى ۇلكەن ايەلدىڭ بولۋى. سىرت كوزگە قاراساڭ دەنى ءتۇزۋ «تاتەشكا». ۇپ-ۇلكەن ادامدار وسىنداي ارەكەتكە بارىپ وتىرعان كەزدە جاستاردان نە سۇرايمىز؟ ولار ءوز بالالارىنا نە ۇيرەتە الادى؟ ۇيات دەگەن بولۋ كەرەك قوي. الايدا وندايلار ۇيالمايدى. ءالى كۇنگە دەيىن كينوعا قالاي بارۋ كەرەكتىگىن بىلمەسەك، 30 ەلدىڭ قاتارىنا كىرۋ تۋرالى ءسوز قوزعاۋدىڭ ءوزى ارتىق شىعار؟!» – دەپ جازدى ول جەلىدەگى پاراقشاسىندا.
جەلى قولدانۋشىلارى ادامبايدىڭ پىكىرىن قوستاپ، اكتەردىڭ ەل مادەنيەتىنە قاتىستى وزەكتى تاقىرىپتى ءبىرىنشى رەت قوزعاپ وتىرماعانىن جانە ءساتى كەلسە وسىنداي دۇنيەلەرگە الەۋمەتتىك روليك تۇسىرگەنى جاقسى بولاتىنىن ايتىپ جاتتى.
