قالاي ايتقاندا دا، الەم اق ۇيگە كىم كەلەتىنىن ۇزاماي بىلەتىن بولادى. ءبىراق ءقازىردىڭ وزىندە اقش پرەزيدەنتى كىم بولاتىنىن الدىن الا انىقتاپ قويعاندار بار. دۇنيەنىڭ ءار تۇكپىرىنەن كورىپكەلدىك جاسايتىندار شىعىپ جاتىر. كەشە قىتايدىڭ شانحاي قالاسىندا ساياسي ويىندارعا ساۋەگەيلىك ايتاتىن «گەدا» اتتى مايمىل اق ۇيدە كىمنىڭ باسشى بولاتىنىن قولىن جوعارى كوتەرىپ، كورسەتكەن كورىنەدى. ۇنەمى قانداي دا ءبىر عالامدىق وقيعالار بولسا، قىتايلىقتار وسى سارى كويلەك كيگىزىلگەن مايمىلعا جۇگىنەتىن كورىنەدى. سونىمەن، قىتايلىقتار قاي كانديداتتىڭ جەڭىمپاز بولاتىنىن انىقتاۋ ءۇشىن دونالد ترامپ مەن حيللاري كليتوندى قاعاز كارتوننان جاساپ، وعان مايمىلدى جىبەرگەن. ۇسقىنسىز مايمىل ميللياردەر ترامپتى قۇشاقتاعان. ءتىپتى ونى قايتا-قايتا قۇشاقتاپ، ەرنىنەن سۇيگەن كورىنەدى. مۇمكىن، اقشالى ازامات ەكەنىن مايمىل دا سەزگەن بولار. ال ساياسي ساراپشىلاردىڭ بولجامىنا سەنسەك، حيللاري حانىمنان ءسال عانا كەيىن قالىپ كەلە جاتقان دونالد ترامپ مۇمكىن مايمىلدىڭ مەيىرىمى تۇسكەننەن كەيىن كۇرت جەڭىسكە جەڭەتىن شىعار.

جالپى «گەدا» مايمىلدىڭ ساۋەگەيلىگىنە قىتايلىقتار بەكەر نازار اۋدارىپ وتىرعان جوق. وسى 2016 جىلدىڭ باسىندا «فۋتبولدان ەۋروپا چەمپيونى كىم بولادى؟» دەگەن ساۋالعا قىتايلىقتار جاۋاپ ىزدەگەن. اقىرى فۋتبولسۇيەر قاۋىمنىڭ وكىلدەرى «گەداعا» بارعان. مايمىل ءوز ۇستانىمىنان جاڭىلىسپاي، پورتۋگاليانىڭ تۋىن الىپ، ونى قاسىنداعىلارعا بەرمەي قويعان كورىنەدى. اقىرىندا، پورتۋگالي ەۋروپا چەمپيونى اتاندى.

ماقۇل، مايمىل قاتەلەسسە، وعان كەشىرىممەن قاراۋعا بولار. ال ادامنىڭ قاتەلەسۋى مۇمكىن بە؟ ءقازىر ساياسي دوداعا قۇشتارلىقپەن قارايتىن امەريكالىقتاردىڭ ءبىرسىپىراسى تاريح سالاسىنىڭ مامانى، پروفەسسور اللان ليچتمەننىڭ پىكىرى وسى جولى سايكەس كەلە مە دەپ وتىر. ويتكەنى امەريكالىقتاردىڭ الاڭداۋىنىڭ نەگىزى بار. 1982 -2012 جىلدار ارالىعىندا وتكەن بارلىق پرەزيدەنتتىك سايلاۋدا كىم جەڭىمپاز اتاناتىنىن ءدال بولجاعان ادام وسى - اللان ليچتمەن. پروفەسسور -ساياساتتانۋشى بۇل جولى جەڭىستى رەسپۋبليكالىق پارتيا وكىلى دونالد ترامپقا بەرىپ وتىر. پروفەسسور ءوزى جازىپ شىققان «اق ءۇيدىڭ كىلتى» اتتى ءادىسنامالىق جيناقتا سايلاۋالدى ناۋقاندا جەڭىمپازدى انىقتايتىن 13 پۋنكتكە باستى ءمان بەرەدى. بۇل باپ بويىنشا كانديداتتاردىڭ ءوزىن-وزى ۇستاۋ ءتارتىبى، كوزقاراسى، ەلدەگى ەكونوميكالىق جاعداي، حالىقارالىق ساياساتتاعى اقش-تىڭ ءرولى، شەتەلدەگى اسكەري وپەراسيالار، جەڭىس پەن قاتەلىكتەر ساراپقا سالىنادى.

ءدال وسى سەبەپتەردى ساراپتامادان وتكىزگەن پروفەسسور حيللاري كلينتوندى جەڭىسكە جەتكىزبەيتىن بىرنەشە سەبەپتىڭ بارىن اتاپ كورسەتتى. 2014 جىلعى كونگرەستىڭ جىلارالىق سايلاۋىندا رەسپۋبليكاشىلدار جەڭىسكە جەتۋى، باراك وبامانىڭ شەتەلدىك اسكەري وپەراسيالارىنىڭ ساتسىزدىگى، ەلدەگى ىشكى قايشىلىقتار مەن دەموكراتتارعا قارسىلىقتىڭ ارتۋى جانە كانديدات حيللاري حانىمنىڭ حاريزمالىق مىنەزىنىڭ جوقتىعى ونى ءسوزسىز جەڭىلىسكە ۇشىراتادى. ونىڭ ۇستىنە وسى ۋاقىتقا دەيىن ترامپ ەشقاشان مەملەكەتتىك قىزمەتتە ىستەمەگەن، قاراپايىم حالىقتىڭ اراسىنان ءوز ەڭبەگىمەن شىققان ميللياردەر. بۇل دا وعان ساياسي ۇپاي اكەلۋى ىقتيمال.

«ءبىز وسى ۋاقىتقا دەيىن، ياعني اقش تاريحىندا پرەزيدەنتتىك سايلاۋ وتكەن سوڭعى 32 جىلدان بەرى دونالد ترامپ سەكىلدى حالىقتىق ويلار ايتىپ، پرەزيدەنتتىك كانديداتقا دەيىن كوتەرىلگەن قايراتكەردى كورگەن جوقپىز. قاتىپ قالعان تاريحي شابلوندى ترامپ سەكىلدى تۇلعالار بۇزدى. سوندىقتان ونىڭ پرەزيدەنت بولۋى ابدەن مۇمكىن»، - دەيدى پروفەسسور اللان ليچتمەن.

مىنە ساناۋلى ساعات قالعاندا، كىمنىڭ جەڭىمپاز بولاتىنىن قوس كورىپكەل وسىلاي الدىن الا انىقتاپ بەردى. ءبىراق ءالى دە كوكەيدە كۇپتى ساۋال بار.

اق ۇيدەن كوپ ۇزاماي كەتەتىن دەموكرات باراك وبامانى ەندى كىم اۋىستىرادى؟ بيلىك كەزەگى تاعى رەسپۋبليكاشىل پارتيانىڭ وكىلدەرىنە كەلدى مە؟

مۇمكىن بۇل جولى مايمىل دا، پروفەسسور دا قاتەلەسەتىن شىعار.

  ماتەريال Baq.kz سايتىنان الىندى