جاس بۋىن كادرلار اراسىنان جاقسىلىق ومار الماتى وبلىسى اكىمى ورىنباسارى قىزمەتىنە تاعايىندالدى، دەپ حابارلايدى «قامشى» پورتالى الماتى وبلىسى اكىمى باسپا ءسوز قىزمەتىنىڭ جەتەكشىسى  ايدار كاربوز ۇلىنىڭ مالىمدەمەسىنە سۇيەنىپ.

«بۇگىن وبلىس اكىمى اماندىق باتالوۆ ءوڭىر اكتيۆىنە قازاقستان رەسپۋبليكاسى پرەزيدەنتى اكىمشىلىگىنىڭ كەلىسىمىمەن وبلىس اكىمىنىڭ ورىنباسارى بولىپ تاعايىندالعان ومار جاقسىلىق مۇقاشۇلىن تانىستىردى»، دەلىنگەن حابارلامادا.

جاقسىلىق مۇقاش ۇلى ومار 1980 جىلى 28 قىركۇيەكتە الماتى وبلىسى الاكول اۋدانى ءۇشارال اۋىلىندا دۇنيەگە كەلگەن. 2001 جىلى اباي اتىنداعى الماتى مەملەكەتتىك ۋنيۆەرسيتەتىن ءتامامداعان.

2001-2004 جىلدارى قازاقستان رەسپۋبليكاسىنىڭ مادەنيەت، اقپارات جانە قوعامدىق كەلىسىم مينيسترلىگىندە. 2004-2007 جىلدارى قازاقستان رەسپۋبليكاسى مادەنيەت مينيسترلىگىندە. 2007-2009 جىلدارى «قازاقستان» رەسپۋبليكالىق تەلەراديوكورپوراسياسى» اق-ىندا. 2009-2009 جىلدارى «ارنا مەديا» ۇلتتىق اقپاراتتىق حولدينگى» اق-ىندا. 2009-2010 جىلدارى شىعىس قازاقستان وبلىسى اكىمىنىڭ كومەكشىسى. 2010-2011 جىلدارى شىعىس قازاقستان وبلىسى ىشكى ساياسات باسقارماسى باستىعىنىڭ ورىنباسارى، باستىعى. 2011-2013 جىلدارى شىعىس قازاقستان وبلىسى مادەنيەت باسقارماسىنىڭ باستىعى. 2013 جىلعى 27 مامىردا شىعىس قازاقستان وبلىسى اكىمىنىڭ ورىنباسارى لاۋازىمىنا تاعايىندالدى.
سونداي-اق، اتالعان وبلىستا بۇعان دەيىن وبلىس اكىمىنىڭ ورىنباسارى قىزمەتىن اتقارعان باقتيار ونەربايەۆ بۇگىننەن باستاپ الماتى وبلىسىنداعى مونوقالا - تەكەلىگە اكىم بولىپ تاعايىندالعان.