«الماتى تاۋەرس» عيماراتىنداعى ءورت كەزىندە قازا بولعانداردىڭ وتباسىلارىنا 3 ملن. تەڭگەدەن ماتەريالدىق كومەك كورسەتىلەدى. بۇل تۋرالى وقيعا بولعان جەردى ارالاۋ كەزىندە الماتى اكىمى باۋىرجان بايبەككە «الماتى تاۋەرس» باسقارۋشى كومپانياسىنىڭ وكىلى ابليميت راحماتۋللايەۆ ايتتى، دەپ حابارلايدى Baq.kz.
قالا اكىمى مارقۇمداردىڭ وتباسىلارىنا كوڭىل ايتىپ، جان- جاقتى قولداۋ كورسەتۋدى تاپسىردى.
«قازىرگى كەزدە ولارعا بارىنشا كومەك كورسەتىپ، جەرلەۋ مەن وعان كەتەتىن شىعىن ماسەلەسىن شەشۋ قاجەت. ەشكىم نازاردان تىس قالماسىن. كوميسسيا بارلىق تەكسەرۋ جۇمىسىن اشىق جانە جاريالى تۇردە جۇرگىزەدى. قىسقا مەرزىم ىشىندە تولىق ەسەپ بەرىلۋى ءتيىس»، - دەپ اتاپ ءوتتى ب.بايبەك.
«الماتى تاۋەرس» باسقارۋشى كومپانياسىنىڭ وكىلى ورتتەن قازا بولعانداردىڭ وتباسىلارىنا بۇگىننەن باستاپ ماتەريالدىق كومەك بەرىلەتىنىن ايتتى.
«وسى قايعىلى وقيعادان مەرت بولعانداردىڭ وتباسىلارىنا كوڭىل ايتامىز. ءبىزدىڭ كومپانيا باسشىلىعى مارقۇمداردىڭ وتباسىلارىنا 3 ملن. تەڭگەدەن قارجىلاي كومەك كورسەتۋ تۋرالى شەشىم قابىلدادى. بۇل تولەمدەر بۇگىننەن باستاپ بەرىلەدى»، - دەدى ا.راحماتۋللايەۆ.
«باتۋتنىي سەنتر» ج ش س ديرەكتورى داۋرەن تۇياقوۆ جەرلەۋ راسىمىنە كومەك كورسەتىپ، زارداپ شەككەندەرگە وتەماقى تولەيتىنىن جەتكىزدى. قازا بولعان ستۋدەنتتەر ءبىلىم العان جوعارى وقۋ ورىندارى دا ماتەريالدىق كومەك كورسەتەتىن بولادى.
الماتى قالاسى توتەنشە جاعدايلار دەپارتامەنتىنىڭ باستىعى سەرىك اۋباكىروۆ ءورت دانەكەرلەۋ جۇمىستارى كەزىندە قاۋىپسىزدىك ەرەجەلەرىنىڭ ساقتالماۋىنان نەمەسە اپاتتى جاعدايداعى ەلەكترقوندىرعىلارىنان تۇتانۋى مۇمكىن دەگەن ەكى بولجام ايتىپ وتىر.
«اكىم ءورتتىڭ نەدەن بولعانىن ءجىتى تەكسەرۋدى تاپسىردى. وسىعان وراي، وقيعا ورنىندا ءتجد-نىڭ ارنايى زەرتحاناسى جۇمىس ىستەپ جاتىر. وقيعا ورنى تەكسەرىلدى، ونى ق ر ءىىم ءورت قاۋىپسىزدىگى ينستيتۋتى مەن توتەنشە جاعدايلار جونىندەگى ازاماتتىق قورعانىس كوميتەتىنىڭ ارنايى ماماندارى جۇرگىزدى»، - دەپ اتاپ ءوتتى س.اۋباكىروۆ.
بۇدان وزگە، الماتى قالاسى ءىىد باستىعىنىڭ ورىنباسارى ءىزباسار بەكتۇروۆ قايعىلى وقيعاعا قاتىستى 292 باپتىڭ 3 تارماعى (ءورت قاۋىپسىزدىگى ەرەجەسىنىڭ ساقتالماۋى سالدارىنان ەكى جانە ودان دا كوپ ادامنىڭ قازا بولۋى) بويىنشا قىلمىستىق ءىس قوزعالعاندىعىن ايتتى.
