1847 جىلى ەۋروپالىقتار اراسىندا العاشقىلاردىڭ ءبىرى بولىپ قازاقستاندى زەرتتەگەن بريتاندىق ساياحاتشى ءارى زەرتتەۋشى توماس اتكينسوننىڭ جازبالارى تاۋەلسىزدىك 25 جىلدىعىنا ارنالعان ەلىمىز تۋرالى بەينەروليكتىڭ نەگىزى بولدى، دەپ حابارلايدى قازاقپارات.

قاراشا ايىنىڭ ورتاسىنان باستاپ، ونى ۆۆس World تەلەارناسى كورسەتە باستايدى. فيلم تۇسىرىلىمدەرى بريتاندىق ساياحاتشى ءجۇرىپ وتكەن - استانادا، الماتىدا جانە الماتى وبلىسىندا ءتۇسىرىلدى. كورسەتىلىمگە قازاقستاننىڭ ۇلىبريتانياداعى ەلشىسى ەرجان قازىحانوۆ پەن ەكسپو-2017 حالىقارالىق كورمەسىنىڭ كوميسسارى ءراپىل جوشىبايەۆ قاتىستى. بىزگە ءمالىم بولعانداي، ۆۆس اتالعان كورمەگە ۇلكەن قىزىعۋشىلىق تانىتىپ وتىر. قازىرگى ۋاقىتتا حالىقارالىق كورمەنى بريتاندىق جانە وزگە دە مەدياكومپانيالاردان كورسەتۋ جونىندە كەلىسسوزدەر ءجۇرىپ جاتىر.  «ءبىز ءقازىر ۆۆس ارناسىمەن ارىپتەستىك كەلىسىم ورناتۋدامىز. ولار كورمە كەزىندە ءبىزدىڭ ەلىمىزدى كورسەتكىسى كەلەدى. بارلىق حالىقارالىق شارالاردى، بارلىق تۋريزم مۇمكىندىكتەرىن»، - دەدى ەكسپو-2017 حالىقارالىق كورمەسىنىڭ كوميسسارى ءراپىل جوشىبايەۆ.