ەسىك قالاسىندا توپتاسىپ قىز زورلادى دەگەن كۇدىكپەن قاماۋعا الىنعان 4  جىگىت ءوز كىنالارىن ءالى دە مويىنداماي وتىر. سەبەبى، ولار جابىرلەنۋشى جىبەك مۋسينوۆانىڭ كەلىسىمىمەن جىنىستىق قاتىناسقا تۇستىك دەيدى. سوندىقتان بۇل ارەكەتتەرىن قىلمىس دەپ سانامايدى ەكەن. سوعان قاراماستان ولار ەندى 11 جىلعا سوتتالۋى مۇمكىن. سەبەبى، سوتتا پروكۋرورلار تورتەۋىنە دە وسىنداي اۋىر جازا كەسۋدى سۇرادى.

بۇل تۋرالى كتك ارناسى حابارلايدى.

الماتى وبلىسىنىڭ ەسىك قالاسىنداعى اتىشۋلى قىز زورلاۋ وقيعاسىنا قاتىستى سوت پروسەسى اياقتالۋعا جاقىن. سوندىقتان بولار، وسى كۇنگە دەيىن كوپتىڭ كوزىنەن تاسادا جۇرگەن كۇدىكتىلەردىڭ تۋىستارى دا تىپىرشي باستادى. سەبەبى، ۇلدارىنىڭ ۇزاق مەرزىمگە سوتتالىپ كەتۋىنەن قاۋىپتەنگەن اتا-انالار تەرگەۋ قورىتىندىسىنا كوڭىلىمىز تولمايدى دەيدى. ويتكەنى جابىرلەنۋشى جىبەك مۋسينوۆانى ءتورت جىگىتتىڭ توپتاسىپ زورلاعانى قيسىنعا كەلمەيدى دەپ وتىر. ياعني ۇستالعانداردىڭ ءبىرى قىزدىڭ كەلىسىمىمەن جىنىستىق قاتىناسقا تۇسكەن ەكەن. سوندىقتان ءىستىڭ قايتا تەرگەلۋىن تالاپ ەتۋدە.

تولقىن شورمانوۆا:

ء-بىر ادامنىڭ وتىرىك ايتقانى ءۇشىن سوتتاي ما؟ مەن ءقازىر بارىپ مەنى  زورلادى دەپ  كەز-كەلگەن ادامدى كورسەتەم سونى سوتتاي ما؟

جىبەك مۋسينوۆانىڭ زورلانعانىن جۇرتقا جايعان ونىڭ اناسى بولاتىن. گۇلبادار مۋسينوۆا وتىز جاستاعى قىزىنىڭ اياۋسىز زورلانعانىن ايتىپ الەۋمەتتىك جەلىدە ۆيدەوۇندەۋ جاريالاعان. وسىدان كەيىن ءىس قوعامدىق داۋ تۋدىرىپ، ارتىنشا ءتورت جىگىت قاماۋعا الىندى. سودان بەرى ءۇش اي وتسە دە، ايىپتالۋشىلاردىڭ تۋىستارى تىنىشتىق بەرەر ەمەس دەيدى جابىرلەنۋشى.

جىبەك مۋسينوۆا، جابىرلەنۋشى:

 -مەن ءقازىر قاتتى قورقامىن. سەبەبى زورلىقشىلاردى قولداپ جۇرگەن جىگىتتەر ماعان قوقان-لوققى كورسەتۋدە. ەگەر تورتەۋى سوتتالىپ كەتسە كورەسەنى كورسەتەمىز دەدى. سوندىقتان ءوزىم عانا ەمەس وتباسىم ءۇشىن دە الاڭدايمىن.

وسىنداي قورقىتىپ-ۇركىتۋلەردەن كەيىن جابىرلەنۋشىلەر سوتقا جالعىز كەلۋدەن قورقىپ قالىپتى. سوندىقتان جىبەك مۋسينوۆانىڭ جاقتاستارى پروسەسسكە پلاكات ۇستاپ كەلگەن. زورلىق-زومبىلىققا جول جوق دەپ ۇرانداتقان جاستار جىبەكتىڭ باسىنداعى جاعدايدىڭ قايتالانباۋىن تالاپ ەتۋدە.

ال ايىپتالۋشى ءتورت ازاماتتىڭ تاعدىرى كەلەسى اپتادا شەشىلەدى. پروكۋرور ولاردىڭ ءارقايسىسىن 11 جىلعا سوتتاۋدى سۇرادى. ەندى سۋديانىڭ قانداي ۇكىم شىعاراتىنى 15ء-شى قاراشادا بەلگىلى بولماق.