قىتايدىڭ كوممۋنيستتىك پارتياسى تاراپىنان شىعاتىن «Global Times» گازەتى اقش-قا جاڭادان پرەزيدەنت بولىپ سايلانعان جىلجىمايتىن مۇلىك ميللياردەرى دونالد ترامپقا اشىقتان اشىق سوعىس جاريالادى.

ترامپتىڭ قىتايعا «ەكونوميكالىق سوعىس» اشۋىنىڭ اقىماقتىق بولاتىنىن باسا ايتقان گازەت، «ەگەر ترامپ جۇڭگو ونىمدەرىنە قارسى كەدەندىك سالىق سالاتىن بولسا، ەسالاڭدىق، ناداندىق، ەپسىزدىگىمەن ايىپتالادى» دەپ جازدى.

«Global Times» گازەتى اقش-تىڭ جۇڭگو ونىمدەرىنە قارسى قانداي دا ءبىر شەكتەۋلەر جاسايتىن بولسا، قىتايدىڭ بىردەن قارسى شارالار قولدانىپ، جاۋاپ بەرۋگە دايىن ەكەنىن اتاپ ءوتتى. قىتايدىڭ قارسى جاۋاپ رەتىندە اقش ەكونوميكاسىنا سوققى بەرۋ ءۇشىن iPhone مەن اقش كولىكتەرىنىڭ ەلگە كىرۋىنە، ساتىلىمىنا تيىم سالاتىنى ءبىر مىسال رەتىندە كورسەتىلدى.

اقش-تا 8 قاراشاداعى سايلاۋدا جەڭىسكە جەتكەن دونالد ترامپ سايلاۋ الدى ۇگىت-ناسيحاتىندا قىتايدى نىساناعا الىپ، تاۋارلارىن كىرگىزبەيتىنىن، سالىقتى جوعارىلاتىنىن ايتقان بولاتىن.
قىتايدىڭ اقش-پەن جاساعان ساۋدا شارتتارىنان وراسان پايدا تاۋىپ وتىرعانىن ايتقان ترامپ، «پرەزيدەنت بولىپ سايلانسام قىتايدان كەلەتىن ونىمدەرگە سالىقتى %45 ارتتىرام» دەگەن ەدى. ونىڭ بۇلاي ايتۋىنا، «ەگەر قىتايدان ءونىم ساتىپ الماساق ءوزىمىز ءوندىرىستى قولعا الامىز» دەگەن ويى سەبەپ بولعان.

ترامپ سونداي-اق، تامىز ايىنداعى ءبىر مالىمدەمەسىندە قىتايدىڭ ءوز ەكسپورتىن ارتتىرۋ ءۇشىن قولدان ۆاليۋتالىق مانيپۋلياسيا ۇيىمداستىرىپ، ءيۋاندى ديەۆالۆاسيالاۋ ارقىلى ەلگە ۆاليۋتالىق اعىن جاسايتىن «الەمنىڭ ەڭ ۇلكەن ۇرىسى» سوزدەرىن ايتقان بولاتى.