17-19 قاراشا كۇندەرى قازاقستاندا 40 گرادۋسقا دەيىنگى اياز كۇتىلۋدە، دەپ حابارلادى «قازگيدرومەت» رمك.  «ۇسكىرىك ايازدار قازاقستاننىڭ سولتۇستىك جانە شىعىس وبلىستارىنا كەلدى. بۇل اۋداندارداعى ورتاشا تاۋلىك تەمپەراتۋراسى وسى كەزدە بولاتىن كليماتتىق نورمادان 10...18 گرادۋسقا تومەن. مۇنداي ايازدار كار تەڭىزىنىڭ ۇستىندە تۇزىلگەن سالقىن ءارى كۇشتى انتيسيكلوننىڭ ىقپالىمەن كەلدى. رەسپۋبليكا اۋماعىنداعى انتيسيكلونمەن بىرگە اركتيكالىق اۋا ماسسالارى دا تۇسۋدە، سوندىقتان ەڭ تومەنگى تەمپەراتۋرا 30...36 گرادۋسقا دەيىن ءتۇستى»، - دەلىنگەن حابارلامادا. مۇنداي سينوپتيكالىق جاعداي الداعى ءۇش تاۋلىكتە ساقتالادى، ال ورتالىق پەن شىعىستا تۇنگى تەمپەراتۋرا تومەندەي بەرەدى، ءتىپتى كەي اۋدانداردا -40 گرادۋسقا دەيىن سۋىتادى. قازاقستاننىڭ وڭتۇستىك-شىعىسىندا سۋىق اعىمداردىڭ اسەرىنەن جاۋىن-شاشىن مەن قار جاۋادى جانە تەمپەراتۋرا تومەندەيدى.