الەۋمەتتىك جەلىدە قار استىندا قالىپ، قۇلاپ قالعان شىنى عيماراتتىڭ ۆيدەوسى پايدا بولدى. ۆيدەو تۇسىرۋشىلەردىڭ سوزدەرىنە قاراعاندا بۇل عيمارات «EXPO 2017» ەكسپو الاڭىنداعى پاۆيلونداردى جالعاعان كوپىر. ۆيدەونى سول ماڭداعى قۇرىلىسشىلار جۇكتەگەن. 

وسى ماسەلەگە بايلانىستى «استانا ەكسپو-2017» ۇلتتىق كومپانياسى باسپا ءسوز قىزمەتىنىڭ جەتەكشىسى سەرگەي كۋيانوۆ مالىمدەمە جاسادى. «وقيعا تۇستە بولدى. زارداپ شەككەندەر جوق. قۇلاعان عيمارات  - ەكى پاۆيلوننىڭ اراسىن جالعاپ تۇرعان دەكوراتيۆتى كونسترۋكسيا ەدى. مەردىگەر - BI Group كومپانياسى.  بۇكىل شىعىندى ەسەپتەيتىن، قۇلاعان جەردىڭ كولەمىن ەسەپتەيتىن دە سول كومپانيا. ەكىنشى جاعىندا تۇرعان ەكىنشى كونسترۋكسيا قۇلاي ما، جوق پا ونى سول مەردىگەر كەلىپ كورەدى»، - دەگەن س.كۋيانوۆ. 

ايتا كەتەر بولساق، كەلەسى جىلى جازدا استانادا «بولاشاق ەنەرگياسى» اتتى «EXPO 2017» ۇلتتىق كورمەسى وتەدى. كورمە قۇرىلىستارىنا  – $3 ميلليارد بولىنگەن. جەرگىلىكتى قۇرىلىس سالۋشىلار - BI Group حولدينگى، «بازيس-ا» كورپوراسياسى، «سرەدازەلەكترومونتاج» كومپانيالارى بولىپ تابىلادى.

بۇعان دەيىن «EXPO 2017» ۇلتتىق كومپانياسىنا باسشى بولعان تالعات ەرمەگيايەۆ ءىستى بولعان بولاتىن. ءقازىر اتالعان كومپانيانى الماتىنىڭ ەكس-اكىمى احمەتجان ەسىموۆ باسقارادى.