كۋاگەر EXPO-2017 اۋماعىندا بولعان توتەنشە جاعدايدىڭ ءمان-جايىن ايتىپ بەردى، - دەپ حابارلايدى Tengrinews.kz سايتى.
كورمە كەشەنىندەگى پاۆيلونداردا جۇمىس ىستەپ جۇرگەن ليفت كومپانياسىنىڭ قىزمەتكەرى نيكولاي كوستەنكو توتەنشە جاعداي بولماي تۇرىپ 2 مينۋت بۇرىن كەتىپ، امان قالعان. جۋرناليستەرگە بەرگەن سۇحباتىندا ول بولعان وقيعانىڭ ءمان-جايىن ايتىپ بەردى.
"توتەنشە جاعداي س 1-3 پەن س1-4 پاۆيلوندارىنىڭ اراسىندا بولعان. ولاردىڭ اراسىندا شىنىدان سالىنعان كوپىر ورنالاسقان ەدى. ەندى سول كوپىر بۇگىن وپىرىلدى. مىنا جاعداي بولماس بۇرىن كەتىپ قالعانىم جاقسى بولىپتى. مەن پاۆيلونعا كىرگەن سوڭ عانا جەر سىلكىنىسى بولعانداي دىبىستاردى ەستىدىم"، - دەدى ەر ادام.
ونىڭ ايتۋىنشا، بۇل وقيعا تۇسكى ءۇزىلىس كەزىندە بولعان. سول ۋاقىتتا وندا جۇمىسشىلار دا بولماپتى.
سونداي-اق، ەر ادام قازىرگى ۋاقىتتا وندا توتەنشە جاعدايدىڭ ءمان-جايى انىقتالىپ جاتقانىن ايتتى. ونىڭ ويىنشا، بۇل جاعداي مىنا سەبەپتەرگە بايلانىستى بولىپ وتىر: "شىنىدان سالىنعان كوپىر جاۋعان قاردى كوتەرە المادى. ءقازىر ەندى بۇل ماسەلەمەن اينالىسادى. (...) ەگەر دە مۇنىڭ بارلىعىن قايتا قالپىنا كەلتىرەتىن بولسا، بۇل قيىنعا سوعادى. ونسىز دا بۇل شىنى كوپىردى ءبىر جىل بويى سالعان بولاتىن"، - دەدى نيكولاي كوستەنكو.
ليفت كومپانياسىنىڭ قىزمەتكەرىنىڭ ايتۋىنشا، وپىرىلعان قۇرىلىس بولىكتەرىنىڭ استىندا پاۆيلونداردىڭ بىرىنە ورناتىلۋى ءتيىس ەسكالاتورلار قالىپ قالدى.
"ءبىز پاۆيلوندارعا ليفت ورناتىپ جاتقان بولاتىنبىز. جۇمىسشىلارىمىز ارەڭ دەگەندە ول جاقتان قاشىپ شىعا الادى. ءبىز ەكى ەسكالاتوردى ورناتۋىمىز كەرەك بولاتىن. ولاردى سىرتقا شىعارىپ، تۇسكى اسقا كەتكەن ەدىك. وسىلايشا ەسكالاتورلار وپىرىلعان قۇرىلىستىڭ استىندا قالىپ قويدى"، - دەدى كۋاگەر.
ەسكە سالايىق، وسىعان دەيىن استاناداعى EXPO-2017 اۋماعىندا قۇرىلىس بولىگىنىڭ وپىرىلعانى حابارلانعان بولاتىن. بۇل بۇگىن، 16 قاراشادا بىرنەشە ساعات بۇرىن بولىپ وتىرعان جاعداي ال كەيىنىرەك وندا بولعان توتەنشە جاعدايدان ءبىر جۇمىسشىنىڭ اۋرۋحاناعا تۇسكەنى ايتىلدى.
