اقتوبەگە وزبەكستاننان قونىس اۋدارعان كۇلجۇمىروۆتار وتباسىندا ءتورت بالا بار. اقەركە، اسەمگۇل، ايسۇلۋ، جانات ەسىمدى قىزداردىڭ الدى وندا، كىشىسى ءتورت جاستا. ءقازىر ولار ىشەرگە تاماق، كيەرگە كيىم تابا الماي ءجۇر. اكەسى ماحمۋد كۇلجۇمىروۆ جالدامالى جۇمىس ىستەيدى، ال اناسى ساودات كۇلجۇمىروۆا دەنساۋلىعى ناشارلاپ، قۇجاتتارى رەتتەلمەي، وزبەكستانعا قايتا ورالعان. قاڭتار ايىندا شەكارا اسىپ كەتكەن انا ءالى كۇنگە دەيىن ورالمادى. ال كىر جۋۋ، تاماق ىستەپ، ءۇي جيناۋ، بالالارعا كۇتىم جاساۋ سەكىلدى ءۇي شارۋاشىلىعىنىڭ ءبارى ون جاستاعى جانات كۇلجۇمىروۆانىڭ جاۋاپكەرشىلىگىنە ارتىلدى. باستاۋىش كلاسس وقۋشىسى ساباقتى جاقسى وقيدى، بارىنە ۇلگەرەدى. وسىدان بەس جىل بۇرىن اقتوبەگە كوشىپ كەلگەن قانداسىمىزدىڭ وتباسىندا Baq.kz ءتىلشىسى دە بولدى.
اقتوبە قالاسىنداعى ساياجايلاردىڭ بىرىندە اياداي بولمەنى 15 مىڭ تەڭگەگە جالعا الىپ وتىرعان وتباسىنىڭ جاعدايى مۇشكىل. بالالار انا كۇتىمىنە ءزارۋ، جۋىندىرىپ، كيىندىرىپ، ساباعىن وقىتاتىن ادام جوق. وتاعاسىنىڭ نەگىزگى ماماندىعى ەسەپشى بولعانىمەن، ءومىر بويى قۇرىلىستا جۇمىس ىستەپ كەلەدى. قازىرگى ۋاقىتتا تاڭ اتا ۇيىنەن شىعىپ، كەش باتا كەلىپ ءجۇر. بۇل ۋاقىتتا ءۇي شارۋاشىلىعىنىڭ ءبارى ون جاستاعى جانات كۇلجۇمىروۆانىڭ مىندەتىنە جۇكتەلگەن. ول بالا بولعانىمەن ەرتە ەسەيگەن، ۇيىنە كەلگەن قوناقتى جارقىن جۇزبەن قارسى الادى.
«ءقازىر ءبارىمىز اۋىرىپ ءجۇرمىز، سالقىن ءتيىپ قالعان. ەشكىم جوق بولعان كەزدە سىڭلىلەرىمە ءدارىنى ءوزىم بەرەمىن. سەنبى كۇنى كوزىم اۋىرىپ، ساباققا بارماي قالدىم. ءسىڭلىم ايسۇلۋ دا ساباققا بارمادى، قىزۋى كوتەرىلدى»، - دەدى جانات قۇلجۇمىروۆا.
بىرىنە سۋىق ءتيىپ اۋىرىپ، ەكىنشىسىنە جۇققان تۇماۋ وتباسىنىڭ مازاسىن قاشىردى. دارى-دارمەك الاتىن دا قارجى جوق. جەدەل جاردەم قىزمەتى العاشقى كومەكتى كورسەتىپ، تۇرعىلىقتى جەرى بويىنشا ەمحاناعا تىركەلۋدى ۇسىندى.
ءۇيدىڭ ۇلكەنى جانات №22 ورتا مەكتەپتە، ايسۇلۋ №8 ورتا مەكتەپتە وقيدى. ماحمۋد كۇلجۇمىروۆ كۇتىم جاساۋعا مۇمكىندىگى بولماي، بالالاردىڭ جانىنا تاياۋدا قاراقالپاقستاننان اجەسى كەلدى. زەينەتكەر كەلىنىنىڭ ءحالىن ءمالىم ەتتى.
«كەلىنىم كيىم-كەشەك الىپ، ساتتى. اقتوبە بازاردا ساۋدا جاساپ، بانكروت بولعان. ءقازىر ءالى دە 200 مىڭ تەڭگە بەرەجاعى بار. قۇجاتتارى دۇرىس بولماي شەكارا اسىپ كەتتى، ەندى قارجى تاپشىلىعىنان كەرى ورالا الماي وتىر ءارى ارا-تۇرا ەسىنەن تانىپ قالادى، اۋىرادى. اناسىنىڭ بولماعانى بالالارعا زيان. بيىل بىرەۋى دالاعا شىعىپ كەتىپ، جوق بوپ كەتكەن. كورشى-كولەم ىزدەپ، كوپ ۇزاماي تابىلدى. ۇلكەنى مەكتەپكە كەتكەندە، بالالار قاراۋسىز قالادى. سوسىن مەن قاراۋعا، كۇتىم جاساۋعا كەلدىم»،- دەيدى ءتىللاحان ىرزابايەۆا.
قاراقالپاقستاننان ۋاقىتشا بالاسىنىڭ ۇيىنە قونىستانعان ت. ىرزابايەۆانىڭ ايتۋىنشا، بالالاردىڭ بىرەۋى عانا قازاقستاندا دۇنيە كەلگەن. كوشىپ كەلگەندەرىنە 5 جىل بولعان ورالماندار وتباسى قازىرگى كۇنى كورشى ەلدىڭ تولقۇجاتىمەن ءجۇر. وتاعاسى ماحمۋد كۇلجۇمىروۆ قانا ورالمان كۋالىگىن الىپ، جەكە كۋالىگىن كۇتىپ ءجۇر.
«جەكە كۋالىك الۋ ءۇشىن الماتىداعى ەلشىلىككە بارۋ كەرەك ەكەن. وعان دا قارجى تاپشى. قازىرگى ۋاقىتتا اۋماعى 20 شارشى مەترگە جەتپەيتىن اياداي بولمەدە جان باعىپ وتىرمىز. ىشەر تاماعىمىز جوق. بالالار كوپتەن ەت تە جەمەدى. بالام ماحمۋد ايلىق الىپ ەدى، جىل بويى تولەنبەگەن پاتەراقىسىنا بەردى. تاماققا دەپ 5 مىڭ تەڭگە قالدىرىپ ەدى، ول ەكى كۇندە ءبىتتى. ال بالالارعا جىلى كيىم كەرەك. ولار ءقازىر تانىستارىمىزدان العان كۇرتەنى كيىپ ءجۇر. كىشكەنتايلارىنىڭ اياق كيىمى توزعان، دالاعا شىعا المايدى»،- دەيدى ول.
كۇلجۇمىروۆتار وتباسىنىڭ ماسەلەسى قالا اكىمى جانىنداعى كامەلەتكە تولماعانداردىڭ ىستەرى جانە ولاردىڭ قۇقىقتارىن قورعاۋ جونىندەگى كوميسسيادا قارالدى. كوميسسيا شەشىمى بويىنشا وتباسىنىڭ 6 جاستاعى قىزى اسەمگۇل مەن ءتورت جاسار اقەركە 5 كۇندىك بالاباقشاعا بەرىلەتىن بولادى. بۇعان دەيىن ەكى ءتۇرلى مەكتەپتە ءبىلىم الىپ جۇرگەن ايسۇلۋ مەن جانات ەندى №8 ورتا مەكتەپتە وقيتىن بولدى. ەكى وقۋشى دا العىر، ۇزدىك وقيدى. ال وتاعاسى ماحمۇد كۇلجۇمىروۆقا تۇراقتى جۇمىس تاۋىپ بەرۋگە تاپسىرما بەرىلدى. سونىمەن قاتار، كوشى-قون پوليسياسى ارقىلى ءتولقۇجات بەرۋ جۇمىستارى جەدەلدەتىلۋ مىندەتتەلدى. قازىرگى ۋاقىتتا ورالماندار وتباسى ارنايى بەرىلەتىن كۆوتاعا دا ىلىگە الماي وتىر. قيىن جاعدايدى باستان وتكەرىپ وتىرعان وتباسى اقتوبەلىكتەردەن كومەك كۇتەدى، قايىرىمدى جاندارعا ءۇمىت ارتادى.
