«استانا ەكسپو-2017» ۇلتتىق كومپانياسىنىڭ سالىنىپ جاتقان الاڭىندا بۇگىن اپات بولىپ، پاۆيلونداردى جالعايتىن كوپىر قۇلاعانى تۋرالى حابارلاعانبىز. اپات ورنىنا شۇعىل ارەكەت قىزمەتتەرىمەن قاتار ءۇش بىردەي جەدەل مەديسينالىق جاردەم كولىگىنىڭ دە بارعانىن جازادى Tengrinews.kz.

«اپات ورنىندا كۇزەت كۇشەيتىلگەن. ەشكىمدى قۇرىلىس الاڭىنا جىبەرمەي جاتىر. العاشقى جەدەل جاردەم كولىگى ءبىر جۇمىسشىنى الىپ كەتتى. ەكىنشىسى اپات ورنىنان بوس شىقتى. ءۇشىنشى بريگادا وقيعا ورنىندا قالدى. دارىگەرلەر مەن توتەنشە جاعدايلار قىزمەتكەرلەرى ەشتەڭە دەپ پىكىر بىلدىرمەدى»، - دەپ جازادى Tengrinews.kz.

كەيىنىرەك، جەدەل جاردەم قىزمەتى گوسپيتاليزاسيالانعان قۇرىلىسشىنىڭ جاراقات الۋىنا قۇلاعان كوپىردىڭ قاتىسى جوعى، ونىڭ الاڭدا ءوز بەتىمەن جۇگىرىپ كەلە جاتىپ، قۇلاعانى، سونىڭ سالدارىنان جاراقات العانىن حابارلادى.

استانا قالاسى دەنساۋلىق ساقتاۋ باسقارماسىنداعىلار جاراقات العان جۇمىسشىنىڭ 26 جاستاعى قازاقستان ازاماتى ەكەنىن، ونىڭ ەكسپو نىساندارىنىڭ بىرىندە وندىرىستىك جاراقات العانىن، ءقازىر №1 قالالىق اۋرۋحاناعا تىزە جاراقاتىمەن جاتقىزىلعانىن ايتادى.