قاراعاندى وبلىسى جەزقازعان قالاسىنىڭ باسشىلىعى قالا اۋماعىنداعى مەكەمە، ۇيىمدارعا جاڭا جىلعا دايىندىق شارالارىن ەل تاۋەلسىزدىگىنىڭ 25 جىلدىق مەرەيتويى اتالىپ وتكەننەن كەيىن باستاۋ تۋرالى ۇسىنىس تاستادى، - دەپ حابارلايدى Qamshy.kz قالا اكىمدىگىنىڭ باسپا ءسوز قىزمەتىنە سىلتەمە جاساپ.

تاۋەلسىزدىكتىڭ 25 جىلدىعىن لايىقتى اتاپ ءوتۋ ءۇشىن قالا اكىمدىگى ارنايى ءىس-شارالار جوسپارىن ازىرلەگەن. وسى جوسپاردا بەلگىلەنگەن شارالار وتپەيىنشە قالا اۋماعىندا جاڭا جىلعا دايىندىق شارالارىن باستاماۋ تۋرالى ورتاق شەشىم قابىلدانىپتى.

«مەملەكەت باسشىسىنىڭ «قازاقستان رەسپۋبليكاسى تاۋەلسىزدىگىنىڭ 25 جىلدىعىن مەرەكەلەۋ تۋرالى» 2016 جىلعى 28 ناۋرىزداعى جارلىعىنا سايكەس ەگەمەندىك مەرەيتويىن لايىقتى اتاپ ءوتۋ جونىندەگى كەشەندى شارالار جوسپارى ازىرلەندى. جىل بويى تاۋەلسىزدىكتىڭ 25 جىلدىعىنا ارنالعان ءىس-شارالار ءوتىپ كەلەدى. پرەزيدەنت جارلىعىمەن بەكىتىلگەن «بىرلىك پەن جاسامپازدىقتىڭ 25 جىلى» تۇجىرىمداماسى بويىنشا مەرەيتوي قارساڭىندا رەپۋبليكا اۋماعىندا «ۇلى دالا ەلى – تاۋەلسىزدىكتىڭ 25 نەگىزى» اتاۋىمەن نەگىزگى مەرەكەلىك وقيعالار كۇنتىزبەسى جۇزەگە اسادى. قالا اكىمى وسىعان وراي «قازاقستان رەسپۋبليكاسى تاۋەلسىزدىگىنىڭ 25 جىلدىعىنا 25 جۇلدىزدى كۇن» مەرەكەلىك شارالار جوسپارىن بەكىتتى. ول قۇجات بويىنشا جوعارىدا اتالعان تۇجىرىمداماعا ساي 21 قاراشا مەن 15 جەلتوقسان ارالىعىندا ءبىرقاتار اۋقىمدى شارالار وتەدى»، - دەيدى قالا اكىمىنىڭ ورىنباسارى زينا اقىلبەكوۆا.

اكىم ورىنباسارىنىڭ ايتۋىنشا، بۇل كۇندەرى ەلىمىزدىڭ ەگەمەندىك جىلدارى جەتكەن جەتىستىكتەرىن ناسيحاتتاۋ، مەملەكەتتىك رامىزدەرگە قۇرمەتپەن قاراۋعا باعىتتالعان پاتريوتتىق، كوپشىلىك شارالاردان بولەك، بىرنەشە ءوندىرىس، كاسىپكەرلىك نىسانى اشىلىپ، ىسكە قوسىلماق.

جەزقازعان اكىمدىگى ەل تاۋەلسىزدىگىنىڭ 25 جىلدىعىن لايىقتى اتاپ ءوتۋ ءۇشىن وڭىردەگى مەكەمە، ۇيىمدارعا جاڭا جىلعا دايىندىق شارالارىن 18 جەلتوقساننان كەيىن باستاۋ تۋرالى ۇسىنىس جاساعان. اكىمدىك ۇسىنىسىن قالا كاسىپكەرلەرى، ءتۇرلى كاسىپورىن، مەكەمە باسشىلارى قولداپ، تاۋەلسىزدىك تويىنىڭ شىرقىن كەتىرمەۋگە ۋاعدالاسىپتى.