بۇلىنگەن پاۆيلوننىڭ سۋرەتى

بۇگىن، ەلباسى «استانا EXPO-2017» ۇلتتىق كومپانياسى باسشىسى ەسىموۆتى قابىلدادى.  كەزدەسۋدە ا.ەسىموۆ ەلباسىعا «ەكسپو-2017» حالىقارالىق كورمەسىنە دايىندىق بارىسىنىڭ سوڭعى كەزەڭى تۋرالى باياندادى. دەگەنمەن كەشە عانا قۇلاپ قالعان پاۆيلون تۋرالى ءسوز بولا قويعان جوق.

«استانا ەكسپو-2017» ۇلتتىق كومپانياسى» اق باسقارماسىنىڭ ءتوراعاسى قۇرىلىس جۇمىستارى كەستەگە سايكەس جۇرگىزىلىپ جاتقانىن ايتىپ، ءتىپتى «العاشقى نىساندار تاپسىرىلۋعا دايىن، سونىڭ ىشىندە جالپى كولەمى 285 مىڭ شارشى مەتر بولاتىن حالىقارالىق پاۆيلوندار بار»، - دەدى.

ەسىموۆكە «بىزگە شەتەلدىك قاتىسۋشىلار كورمەدە كورسەتەتىن جاڭا يننوۆاسيالىق تەحنولوگيالاردى بارىنشا پايدالانۋ قاجەت»، - دەگەن  ەلباسى كورمەنى لايىقتى وتكىزىپ، سودان كەيىن قازاقستاندا ونىڭ جەتىستىكتەرىن پايدالانۋ قاجەتتىگىن اتاپ ءوتتى.

پاۆيلوننىڭ قۇلاماي تۇرعانداعى سۋرەتى

ال، سىرتقى ىستەر ءمينيسترى ەرلان ىدىرىسوۆ كەشە ورىن العان توتەنشە جاعدايعا قاراماستان ەكسپو-2017 كورمەسى نىساندارىنىڭ ءبارى ۋاقىتىندا تاپسىرىلاتىندىعىن جەتكىزدى.  «ەشقانداي ۇلكەن ماسەلە جوق. بۇل ارالىق كونسترۋكسيا، نەگىزگى عيمارات ەمەس. بۇل جۇمىس پروسەسسى. كەز كەلگەن قۇرىلىستا وسىنداي جاعدايلار بولىپ تۇرادى. شۇعىل ارەكەت جاسالدى، قازا تاپقاندار جوق. قۇرىلىس ءجۇرىپ جاتىر، ءبارى ۋاقىتىندا تاپسىرىلادى. ەكسپو بويىنشا قويىلعان بارلىق مىندەتتەر ۋاقىتىندا ورىندالادى. كەشە ناقتى تۇسىنىك بەرىلدى»، - دەدى ىدىرىسوۆ.

ال، سەنات دەپۋتاتى اسحات كۇزەكوۆتىڭ ايتۋىنشا، ەكسپو سەكىلدى كۇردەلى قۇرىلىستار كەزىندە ءارتۇرلى جاعداي بولۋى مۇمكىن. «بۇل ماسەلەگە كوپ كوڭىل اۋدارۋدىڭ، مەنىڭشە، قاجەتى جوق. ويتكەنى ءبارى ويداعىداي بولۋى ءتيىس. قۇرىلىس ءتيىستى دەڭگەيدە ءجۇرىپ جاتىر»، - دەيدى دەپۋتات.

ەسكە سالا كەتەيىك، كەشە استانادا ەكسپو كورمەسى اۋماعىنداعى نىسانداردىڭ ءبىرى وپىرىلىپ ءتۇستى. قۇرىلىستى جۇرگىزگەن BI Group كومپانياسىنىڭ حابارلاۋىنشا، بۇل قۇرىلىم تەك دەكوراتيۆتى بولىپ تابىلادى ءارى ول ەشقانداي فۋنكسيونالدىق قىزمەت اتقارمايدى. BI Group باسشىسى ايدىن راحىمبايەۆ EXPO اۋماعىنداعى قۇراستىرمانىڭ وپىرىلۋ سەبەبىن تومەندەگىدەي ءتۇسىندىردى:

"بىرىنشىدەن، قۇراستىرما جايلى ايتار بولساق - بۇل شىن مانىندە ساۋلەت-دەكوراتيۆ ەلەمەنت. فورماسى - مەتالل فەرما. ونى قۇراستىرۋ جانە مونتاجداۋ جۇمىستارىمەن ەلىمىزدەگى ەڭ كاسىبي "يمستالكوم" كومپانياسى اينالىستى. ءبىز كاسىبي قۇرىلىسشىلار رەتىندە ءقازىردىڭ وزىندە ولاردىڭ بىلىكتىلىگىنە كۇمان كەلتىرمەيمىز. كەشە دە بار جاۋاپكەرشىلىكتى ولارعا ارتىپ قويا سالمادىق، بۇگىن دە سولاي"، - دەپ جازدى Facebook جەلىسىندە Build Investment Group حولدينگىنىڭ پرەزيدەنتى ايدىن راحىمبايەۆ.

ونىڭ ايتۋىنشا، سۋرەتتەردى انىقتاپ قاراسا قۇراستىرمانىڭ بالقىتىپ بىرىكتىرىلگەن جەرى نەمەسە مونتاج تىرەۋىشتەرى سىنعانباعان، ونى قاساقانا كەسىپ تاستاعانداي اسەر قالدىرادى. "ال نەگىزگى قۇراستىرمانىڭ بەكەمدىلىگىن وسىنداي بيىكتىكتەن قۇلاعان ساتىندە ءتىپتى اسپالارىنداعى اينەكتەرىنىڭ سىنباي قالۋىنان بايقاي بەرۋگە بولادى. (...) ينجەنەرلەرمەن كەڭەسكەننەن كەيىنگى الدىن الا تۇجىرىمىمىز - 90 مەتر فەرما اياز تۇسكەن كەزدە مەتاللدىڭ قىسىمىنا شىداس بەرمەدى، سەبەبى مەتاللدىڭ حيميالىق قۇرامى قۇجاتتا كورسەتىلگەن بەكەمدىگىنە ساي بولمادى، ال نەگىزىندە مەتالل اياز بەن ىستىق تۇسكەندەگى جاعدايدا سىعىلۋ مەن سوزىلۋعا توتەپ بەرە الاتىنداي ەسەپپەن جاسالادى. مۇنىڭ تەك الدىن الا پىكىر رەتىندە ايتىلىپ وتىرعانىن اتاپ وتەيىن. قورىتىندى شەشىمدى ساراپشىلاردان قۇرالعان كوميسسيا جاسايدى. بۇل جاقىن ۋاقىتتا بولادى دەپ ۇمىتتەنەمىن. ءبىرىنشى كەزەكتە قىتايدان جەتكىزىلگەن مەتاللدىڭ حيميالىق قۇرامىنا ساراپتاما جاسالادى. بۇل مەتاللداردان كورمە تەرريتورياسىنداعى وزگە دە نىساندار بوي كوتەرگەن بولاتىن. زەرتحانا ساراپتامالارىن كۇتەمىز"، - دەدى راحىمبايەۆ.