ۇزىناعاشتاعى ءۇش اعايىنىنىڭ ولىمىنە قاتىستى كەزەكتى سوت وتىرىسى قاسكەلەڭدە ءوتتى. جول جاعدايىنا بايلانىستى جابىرلەنۋشىلەر تالدىقورعاننان كەشىگىپ كەلگەندىكتەن 12-دە باستالۋى ءتيىس سوت وتىرىسى 13:10-دا باستالدى.

بۇعان دەيىن حابارلاعانىمىزداي، مال ساۋداسىمەن اينالىسقان اعايىندى ءۇش جىگىتتىڭ ولىمىنە قاتىستى تەرگەۋ جۇمىستارى اياقتالىپ، سوت پروسەدۋراسى كەزەڭىنە وتكەن ەدى. الايدا، تەرگەۋ جۇمىستارىنا مارقۇمداردىڭ تۋىستارى كۇمان كەلتىرگەن بولاتىن. سوت وتىرىسىندا جابىرلەنۋشىلەر تىڭدالدى. مارقۇمداردىڭ تۋىستارى وزدەرىنىڭ تەرگەۋ جۇمىسىمەن تانىسقانىن، الايدا كوڭىلى تولمايتىنىن باياندادى. ولار سوتتان تاعى دا ءادىل شەشىم شىعارۋىن، وقيعانى بۇگە-شىگەسىنە دەيىن انىقتاۋدى ءوتىندى.

ءبىرىنشى سوت تىڭداۋىنا مارقۇمداردىڭ 50-دەن اسا تۋىسى وزگە قالالاردان كەلدى. سوتقا ۇزىناعاشتىڭ ەكى تۇرعىنى مۇرات وڭالبايەۆ پەن تالعات سۇلەيمەنوۆ تارتىلىپ وتىر. ولارعا ق ر قىلمىستىق كودەكسىنىڭ 99 ("ادام ءولتىرۋ")، 192 ("قاراقشىلىق") جانە 202-باپتارى ("بوتەننىڭ مۇلكىن قاساقانا جويۋ نەمەسە ءبۇلدىرۋ") بويىنشا ايىپ تاعىلعان. 

سونداي-اق، قىلمىستى حابارلامادى دەپ جەرگىلىكتى مالشى باقىت بايقاسىموۆ ايىپتالىپ وتىر. سويتسەك، ول 2000 جىلى توناۋ جانە قاراقشىلىق باپتارى بويىنشا قاراعاندى وبلىسىندا سوتتادىپ، بەس جىل وتىرىپ شىققان ەكەن. 

"مەن ءوز كىنامدى مويىندايمىن، ءبىراق ءىشىنارا. 192 جانە 202-باپتار بويىنشا تاعىلعان ايىپپەن كەلىسپەيمىن. بۇل الدىن الا كەلىسۋ بولعان جوق، كولىكتى ورتەگەن جوقپىز. ۇقىپسىزدىقتان بولدى"، - دەپ مالىمدەدى سۇلەيمانوۆ. 

ال وڭالبايەۆ وزىنە تاعىلعان ەشبىر ايىپپەن كەلىسپەيتىنىن مالىمدەدى. قىلمىستىڭ كۋاگەرى، ياعني جەرگىلىكتى مالشى بايقاسىموۆ تا ايىپپەن كەلىسىپ وتىرعان جوق. ايتۋىنشا، ول قىلمىس جايلى قۇقىق قورعاۋ ورگاندارىنا ءوزىنىڭ جانە جاقىندارىنىڭ ومىرىنە الاڭداعاندىقتان حابارلاماعان.

وتىرىستا ءبىرىنشى بولىپ مەملەكەتتىك ايىپتاۋشى ءسوز سويلەدى. ول قاندى قىلمىستىڭ حرونولوگياسىن باياندادى. ونىڭ سوزىنە قاراعاندا، سوتتالۋشىلار اعايىندىلاردى تاۋ بوكتەرىندە بىر-بىردەن ولتىرگەن. الايدا مارقۇمداردىڭ ءبىرى بۇل نۇسقامەن كەلىسپەيتىنىن ايتتى. قازا تاپقان جارقىنبەك دولدان ۇلىنىڭ اعاسىنىڭ ايتۋىنشا، ءۇش ەر ادام وق اتىلعاندا سەزىكتەنۋى ءتيىس ەدى. "مۇندا قىلمىسكەرلەر تاۋ بوكتەرىنە جاقىنداعاندا 16 باس مالدى ءۇش رەيسپەن جەكە-جەكە تاسىعان دەپ جاتىر. باستاپقىدا اعايىندىلاردىڭ بىرىمەن تاسىعان، كەيىن ەكىنشىسىن جانە وسىدان سوڭ ءۇشىنشىسىن اپارىپ ولتىرگەن دەيدى. ءبىراق بۇل جىگىتتەردىڭ مال ساۋداسىمەن اينالىسىپ جۇرگەنىنە تالاي جىل بولدى. ولار مالدى شاتقالعا اپارۋعا كەلىسپەس ەدى. ولاردى زورلاپ اپارعان. بارعان جەرلەرىندە وسى ەكى قىلمىسكەردىڭ بانداسى بولعان، ولاردى دا تۇرمەگە قاماۋ كەرەك"، - دەدى مارقۇمنىڭ اعاسى. 

 ايتا كەتەيىك، مارقۇمداردىڭ تۋىستارى ءاربىر وتباسىعا 15 ميلليون تەڭگەدەن وتەماقى تالاپ ەتىپ وتىر. 

ەستەرىڭىزگە سالساق، 18 قىركۇيەكتە الماتى وبلىسى جامبىل اۋدانىندا جوعالعان ءۇش ازاماتتىڭ قىلمىسكەرلەر قولىنان قازا تاپقانى، وسى قىلمىسقا قاتىستى كۇدىكتى رەتىندە 24 قىركۇيەكتە ەكى ازاماتتىڭ ۇستالعانى حابارلانعان بولاتىن. اتالعان ءۇش ازامات، 1979 جىلعى دولدان ۇلى جارقىنبەك، 1973 جىلعى زارلىحان ۇلى مۇقيات پەن ءالىمحان قادىلبەك ەسىمدى جىگىتتەر شىعىس قازاقستان وبلىسىنىڭ تارباعاتاي اۋدانىنان 40 باس مال ساتىپ الىپ، ونى ەكى جۇك كولىگىمەن 17 قىركۇيەك، سەنبى كۇنى، الماتى ماڭىنداعى ۇزىناعاش بازارىنا شىعارعان.

ەرلان تولەۋباي