ۇزىناعاشقا مال ساتۋعا كەلگەن اعايىندى ءۇش ازاماتتى ءولتىردى دەگەندەر ءومىر باقي باس بوستاندىقتارىنان ايىرىلۋى مۇمكىن. سوتتالۋشىلارعا قاتىستى قوزعالعان قىلمىستىق ءىس بارىسىندا ولارعا قاراستىرىلعان ەڭ اۋىر جازا وسىنداي بولىپ وتىر.
ساعات 12 دە باستالۋ كەرەك سوت وتىرىسى تەك 1 ساعاتتان كەيىن عانا باستالدى. العاش بولىپ سۇراقتارعا جاۋاپ بەرگەن جابىرلەنۋشى تاراپ ءاۋ باستان قىلمىسكەرلەرگە قاتىستى ءوز پىكىرلەرىن اشىق ءبىلدىرىپ جاتتى.
بۇل تۋرالى 31 ارنا حابارلايدى.
تۇرسىن ءامىرباي، جابىرلەنۋشى:
- وسى قىلمىستىڭ ءتۇبى تۇبىنە دەيىن انىقتالۋىن، زاڭنىڭ ەڭ جوعارعى جازاسىن الۋىن، وتكەندە ون ادامدى اتقان ادامدى اتاتىن بولدى، مىنا سۇمىرايدىڭ كوزىن قۇرتىپ قارا جەرگە كومۋىن تالاپ ەتەمىن!
ەركىن بەيسەكەي، جابىرلەنۋشى:
- سوندا ءبىز مۇندا ولەيىن دەپ كەلدىك پا، ءبىر يتتەردىڭ قولىنان؟ ءبىزدىڭ مەملەكەتكە وكپەمىز جوق. بۇل سياقتى شىرىك جۇمىرتقالاردى اتۋ كەرەك! قىز زورلاعانمەن وسى سياقتى يتتەردى اتۋ!
سونداي اق سوت پروسەسسى بارىسىندا سوتتالۋشىلاردىڭ ادۆوكاتى جابىرلەنۋشىلەردەن ءبىر سۇراقتى بىرنەشە رەت قايتارا سۇراپ، سوزباققا سالدى. ال سوتتالۋشىلاردىڭ ەكەۋى، مۇرات وڭالبايەۆ جانە قىلمىستى كورە تۇرا ەش جەرگە حابارلامادى دەگەن بايقاسىموۆ وزدەرىن كىنالى دەپ سانامايدى. وسى ۋاقىتقا دەيىن قىلمىستىڭ كەي باپتارىمەن كەلىسپەيمىن دەگەن تالعات سۇلەيمەنوۆ بولسا، قىلمىسقا تەك جارتىلاي عانا قاتىسىم بار دەپ سالدى.
- كىنالىمىن دەپ سانايسىز با ءوزىڭىزدى؟ - جارتىلاي مويىندايمىن. - قالاي ول سوندا؟ - ماشينانى جاقتى سوسىن ارقايسىسىن ار جەردە اتتى دەگەنى، ول دۇرىس ەمەس. ول جەردە تۇسىنسىپەۋشىلىك، ەرەگىس تۋىندادى.
جابىرلەنۋشى تاراپ سوتتان ماتەريالدىق شىعىن رەتىندە مارقۇم بولعان ازاماتتاردىڭ وتباسىلارىنا 15 ميلليون تەڭگەدەن بارلىعى 45 ميلليون تەڭگە ءوندىرىپ بەرۋدى تالاپ ەتىپ وتىر.
ەسكەرە كەتەتىن ماسەلە، بۇگىندە مارقۇم تۋىستارىنا جوعالعان 41 باس مالدىڭ تولىقتاي قۇجاتتارى جانە 36 ءىرى قارا قايتارىلعان. ءقازىر ىزدەۋدەگى 5 باستى سوتتالۋشىلار ساتىپ جىبەردىك دەگەنىمەن ولاردىڭ قۇجاتتارى جابىرلەنۋشىلەردىڭ قولىندا. ال مالداردى قۇجاتسىز ساتۋ مۇمكىن ەمەس، ولاردى كۇدىكتىلەر وزدەرىنىڭ سىبايلاستارىندا تىعىپ وتىر دەيدى مارقۇم تۋىستارى.
