وكىنىشكە وراي، مەملەكەتكە قاتىسى بار مەكەمە، ۇيىمدار مەن لاۋازىمدى تۇلعالار توڭىرەگىندە جەمقورلىق پەن الاياقتىققا قاتىستى اڭگىمە دە ەرە جۇرەتىن بولدى. مۇنى پاراقورلىقپەن كۇرەسۋشى باس مەكەمە – مەملەكەتتىك قىزمەت ىستەرى جانە جەمقورلىققا قارسى ءىس-قيمىل جونىندەگى اگەنتتىك تە راستاپ وتىر.

اگەنتتىك جۇرگىزگەن موريتورينگ كۆازيمەملەكەتتىك سالاداعى جەمقورلىق وقيعالارى الاڭداۋشىلىق تۋعىزاتىنىن كورسەتكەن.

جاۋاپتى مەكەمە جاساعان تالداۋ وتكەن جىلمەن سالىستىرعاندا اتالعان سالادا جەمقورلىق قىلمىستىڭ 1،5 ەسە وسكەنىن (143-تەن 202-گە) انىقتاعان. ورىن العان قىلمىستار نەگىزىنەن ۇرلاۋ، لاۋازىمدىق مىندەتتەرىن شامادان تىس پايدالانۋ، مەملەكەتتىك ساتىپ الۋلار مەن مەملەكەتتىك باعدارلامالاردى جۇزەگە اسىرۋ كەزىندەگى پارا الۋشىلىقپەن بايلانىستى بولىپ وتىر.

ماسەلەن، جەمقورلىققا قارسى قىزمەت جاقىندا عانا «بايتەرەك Devolopment» اق باسقارما ءتوراعاسىنىڭ ورىنباسارى اسلان جاقىپوۆتى، اتالعان مەكەمەنىڭ مەملەكەتتىك باعدارلامالاردى جۇزەگە اسىرۋ ديرەكسياسىنىڭ باسشىسى باۋىرجان ايتىمبەتوۆ پەن عازيز سارييەۆتى تۇتقىنداعان بولاتىن. ولار 28 ميلليون تەڭگە كولەمىندە پارا العانى ءۇشىن ۇستالدى. سىبايلاس توپ قازاقستاننىڭ بىرنەشە وڭىرىندەگى 13 مەكەمەنى قوسىپ، «نۇرلى جول» باعدارلاماسىنا دەپ بولىنگەن قاراجاتتى جىمقىرۋ ءۇشىن ۇلكەن قىلمىستىق سحەما دا قۇرعان كورىنەدى.

جەمقورلىققا باتقان كومپانيا ءبىر «بايتەرەك Devolopment» ەمەس. قارجىلىق قىلمىستارمەن كۇرەسۋشى اگەنتتىك «استانا ەكسپو-2017»، «استانا» الەۋمەتتىك-كاسىپكەرلىك كورپوراسياسى» (اپك)، «جەتىسۋ» اپك»، «قازاقستان تەمىرجولى»، «قازاقتەلەكوم» ۇلتتىق كومپانيالارى، «قورعاس» شەكارا ماڭى ارىپتەستىگى حالىقارالىق ورتالىعى، «قازمۇنايگاز ونىمدەرى»، ت.ب. كومپانيالاردىڭ دا جۇمىسىنداعى ءبىراز بىلىقتى اشتى.

اگەنتتىك بۇل مەكەمەلەردەگى جەمقورلىق قىلمىستىڭ 55 پايىزى (112 قىلمىس) ساتىپ الۋلار تارتىبىنە بايلانىستى ەكەندىگىن العا تارتادى. وسىلايشا، ءوزى – بي، ءوزى – قوجا بولعان ۇلتتىق كومپانيا قىزمەتكەرلەرى مەملەكەتتىك ساتىپ الۋلار تۋرالى زاڭناما تالاپتارىن اينالىپ ءوتىپ، قازىنانىڭ قىرۋار قارجىسىن جەكە مۇددەلەرىنە پايدالانۋدىڭ كوزىن تاپقان.