الەكسەي ني اۋىر اتلەتيكادان قازاقستان قۇراماسىنىڭ باس باپكەرى قىزمەتىنەن كەتتى، - دەپ حابارلايدى Vesti.kz فەدەراسيانىڭ باسپا ءسوز قىزمەتىنە سىلتەمە جاساپ.

الايدا، الەكسەي ءنيدىڭ وتستاۆكاعا نە سەبەپتى كەتكەنى ايتىلماعان.

باپكەر بۇل قىزمەتتى 26 جىلدان بەرى اتقارىپ كەلەدى. ول باپكەر بوپ تۇرعاندا التى وليمپياداعا جانە 15 الەم چەمپيوناتىنا قاتىستى، سونداي-اق ازيا ويىندارى مەن ازيا چەمپيوناتتارى بار.

«مۇنىڭ بارلىعى نە سەبەپتى بولىپ جاتقانىن، كىمنىڭ جاساپ وتىرعانىن مەن بىلمەيمىن. مەن ساياساتكەر ەمەسپىن، بالشى دا ەمەسپىن. مەن باپكەرمىن، ەشتەڭەگە قاراماستان، سپورتشىلاردى دايىندايمىن. ءبىز ءوز شىندىعىمىزدى دالەلدەۋگە تىرىسامىز»، - دەگەن ەدى الەكسەي ني شاكىرتتەرى تۇسكەن دوپينگ داۋى جايلى.

ايتا كەتسەك، اۋىر اتلەتيكادان قازاقستان اتىنان 2008 جانە 2012 جىلدارى وليمپياداعا قاتىسىپ، چەمپيون اتانعاندار تۇگەلدەي دوپينگ داۋىنا ىلىگىپ، اتاقتارىن قايتاردى.