بۇگىن ق ر پرەمەر-مينيسترى ورىنباسارى اسقار مامين جۇمىس ساپارىمەن ماڭعىستاۋ وبلىسىنا بارىپ، قۇرىق پورتىنداعى پاروم كەشەنىنىڭ قۇرىلىسىمەن تانىستى. «نۇرلى جول» باعدارلاماسىنىڭ جوباسىن «قازاقستان تەمىر جولى» ۇك» اق جۇزەگە اسىرۋدا.
ق ر ءبىرىنشى ۆيسە-پرەمەرىن قۇرىق پورتىنىڭ العاشقى ىسكە قوسۋ كەشەنى نىساندارى قۇرىلىسىنىڭ اياقتالۋ كەزەڭى جايلى حاباردار ەتتى، دەپ حابارلادى primeminister.kz.
ەرساي ستانساسىنان قۇرىق پورتىنا دەيىن كىرەبەرىس تەمىر جول ۋچاسكەسىنە ۇزىندىعى 1 شاقىرىمنان اساتىن رەلس-شپالدى تور سالىندى. توپىراق ۇيىندىلەرىمەن شپالدى بەكىتۋ جۇمىستارى اياقتالدى. 4،3 ملن. م3 كولەمىندە جەردى ويۋ جۇمىستارى جۇزەگە اسىرىلدى. باتىس جاقتاعى قورشاۋ قۇرىلىسى اياقتالدى. وعان 400 مىڭ توننا كەسەك تاس جۇمسالدى. كىرەبەرىستەگى ارنا مەن پورت اكۆاتورياسىنىڭ ءتۇبىن تەرەڭدەتۋ جۇمىستارى اياقتالدى. 10 كۆت. سىرتقى ەلەكترمەن جابدىقتاۋ جەلىسى سالىندى.
كوتەرگىش-وتپە كوپىرى تۇرعىزىلۋدا. قۇرىق پورتىنىڭ العاشقى ىسكە قوسۋ كەشەنى كەلەسى جىلدىڭ اياعىندا پايدالانۋعا ەنگىزىلەدى. «قۇرىق پورتىنداعى پاروم كەشەنى ترانسكاسپيي حالىقارالىق كولىكتىك مارشرۋتتىڭ كولىك-لوگيستيكالىق جۇيەسىنىڭ ماڭىزدى بۋىنى بولىپ تابىلادى. ول قازاقستاننىڭ ترانزيتتىك-كولىكتىك الەۋەتىن دامىتۋعا قۋاتتى سەرپىن بەرەدى جانە «جاڭا جىبەك جولى» جوباسىن ىسكە اسىرۋعا ىقپال ەتەتىن بولادى»، - دەدى ءمامين.
پاروم كەشەنى تاۋلىگىنە 5 پارومعا قىزمەت كورسەتىپ، جىلىنا 1 ملن توننا كولەمىندە جۇك تاسىمالداۋدى قامتاماسىز ەتەدى.
