چ.ءدارۆيننىڭ ءىلىمىن پارشا-پارشا ەتىپ، ادامنىڭ تەگى توپىراقتان جارالعانىن عالىمدار دالەلدەپ، ولاردىڭ تۋعان مەكەنى سول بولعاندىقتان بارار جەرلەرى دە سول دەگەن تۇجىرىمعا كەلگەنى بەسەنەدەن بەلگىلى. ءبىراق، بۇل تۇجىرىم كوكىرەگى وياۋ جاندار مەن يسلام نۇرىنا شومىلعان جاندارعا ءتان. قازاقتىڭ ءدىنى شاريعاتتى ۇستانا وتىرىپ، يسلامنان سۋسىندايدى. ەندەشە، شاريعات ابايدىڭ ءسوزىن جاقتايدى، « ولسەڭ ورنىڭ قارا جەر».

قارا جەردىڭ بەتىندە ءجۇرىپ، قارا بەت بولعالى قاشان. ەۋروپانىڭ بولمىسىمىزعا ولقى كەلەتىن ولار ءۇشىن « وڭ» دەپ باعالانعان «سولاقاي» ارەكەتكە بارىپ ءجۇرمىز. سونىڭ ءبىرى سوۆەت داۋىرىنەن بەرى باس كوتەرىپ كەلە جاتقان، قازاق جەرىندە كرەماتوريي وشاعىن سالۋ. التاي مەن ارقانىڭ اراسىنداعى كەڭ جاتقان جەر تاقيامىزعا تار كەلگەن سىڭايلى. مۇسىلمان بولا تۇرا، سۇيەگىڭ جەرگە جەتپەي كۇلگە اينالىپ كەتسە بۇل دەگەنىڭ ناعىز شاريعاتقا قارسى دۇنيە. بۇل ماسەلە، بىزدە 2004 جىلى ناقتىلانىپ، كرەماتوريي وشاقتارى الماتى قالاسىندا سالىنۋ ءقاۋپى بار دەگەن پايىم شىققان. ودان بەرى جۇرت تا تىنىش، جۇت تا بولماپ ەدى. الماتى قالاسىندا تۇراتىن تۇرعىنداردىڭ ءبىرى ەسىنە ساپ ەتە تۇسكەندەي، وسى وشاق توڭىرەگىندە الماتى قالاسى اكىمدىگىنىڭ سايىتىنداعى « اكىمگە سۇراق» بولىمىنە سۇراق قويىپتى. بۇل تۋرالى «زاڭ» گازەتى جازىپ وتىر. اكىمنىڭ جاۋابى: «الماتى قالالىق ءدىني سالتتىق قىزمەت كورسەتۋ كومبيناتىنا كرەماتوريي قۇرىلىسىنىڭ جوباسىن جاساپ ۇسىنۋ تاپسىرىلعان بولاتىن. سوعان سايكەس الماتى قالاسى الاتاۋ اۋدانىنداعى بورالداي قورىمى ماڭىنان، ادامدار تۇراتىن ايماقتان بەلگىلى ءبىر قاشىقتىق ساقتالا وتىرىپ 2 گەكتار جەر تەلىمى قاراستىرىلعان. جەر تەلىمىن انىقتاۋ سانيتارلىق-ەپيدەميولوگيالىق باعالاۋ تۇرعىسىنان جۇرگىزىلىپ، ينجەنەرلىك كوممۋنيكاسياعا قوسىلۋ مۇمكىندىكتەرى ەسكەرىلگەن. اتالمىش جەر تەلىمىندە كرەماتوريي قۇرىلىسىنا جانە ونى جۇزەگە اسىرۋعا قاجەتتى تەحنيكالىق جاعدايدى باعالاۋ جۇمىستارى دا جۇرگىزىلگەن. گاز، جارىق پەن سۋ جۇيەسى سەكىلدى بارلىق كوممۋنيكاسيالىق جەلىلەر ول جەردى بويلاي ورنالاسقان. سونداي-اق، «گيز ينجەنەرينگ» جشس-مەن جوبانىڭ تەحنيكالىق-ەكونوميكالىق نەگىزى جاسالدى». «ەلۋ جىلدا ەل جاڭارا ما» دەپ باعىت ۇستاپ كەلە جاتساق، ون جىلدىڭ ىشىندە ايى وڭىنان تۋاتىن ءىس مىناۋ بولسا جاعا ۇستادىق. سىلتاۋدىڭ ءتۇرى، جەر شىعىنى بولمايدى، تابيعاتقا پايدالى مىس.

ءسويتىپ، و، دۇنيەنىڭ توزاعىنان قورقىپ جۇرگەندە الماتىنىڭ «ولىك ورتەگىشىنە» كىرىپ كەتپەسەك جارار...

مارعۇلان اقان