استانا-بۋراباي تاس جولىندا قايتىس بولعان قۇماربەك جاكەتاي مەيىرىمدى، كوڭىلدى ادام بولعان. ونىڭ ارەكەتى كوپ ادامنىڭ جۇرەگىندە وشپەس ءىز قالدىردى دەپ حابارلايدى tengrinews.kz

ۇلى نۇربول اكەسىمەن سوڭعى رەت تەلەفونمەن سويلەسىپ ۇلگەرگەن ەكەن. قۇماربەك جاكەتاي اپاتقا 2 مينۋت قالعاندا بالاسىنا تەلەفون شالعان. ول جولدا كەلە جاتقان ۇلىن ۋايىمداپ، قال جاعدايىن بىلەيىن دەپ حابارلاسقان.

بالاسى كولىك اپاتىن كورگەنىن، الايدا ولاردىڭ اراسىندا اكەسى بار دەپ مۇلدە ويلاماعانىن ايتادى.

«دەمەۋ بەرەتىن تۋعان-تۋىس بار. كومەككە مۇقتاجبىز دەپ ايتا المايمىن. ءوزىم استانادا جۇمىس ىستەيمىن. تەك ءبىر عانا ءوتىنىشىم بار. اكەمنىڭ ەرلىگى ەلەۋسىز قالماسا ەكەن. بۇل تاعى ءبىر ولىممەن اياقتالماۋى ءۇشىن كەرەك» دەيدى ۇلى نۇربول. 

قۇماربەك جاكەتايەۆتىڭ ايەلى جۇبايىن وتە مەيىرىمدى، كومەككە ءزارۋ ادامدارعا ۇنەمى قول ۇشىن بەرەتىن ادام ەدى دەپ ەسكە الدى.

قۇماربەك جاكەتاي ەندىگى جىلدىڭ 3 اقپانىندا 51 جاسقا تولۋى كەرەك ەدى. ايەلى ەكەۋى 1992 جىلى موڭعوليادان كوشىپ كەلگەن. سودان بەرى جاڭا جول اۋىلىندا تۇرادى. 6 جەلتوقساندا قۇماربەك جاكەتايدى جەرلەدى. قۇتقارىلعان Nissan Cefiro كولىگىنىڭ جۇرگىزۋشىسى ەرلان وسپانوۆ تا كەلدى. قۇماربەك جاكەتاي ءومىرىن ساقتاپ قالعان ادامداردىڭ اراسىندا ول دا بار.

4 جەلتوقساندا استانا-بۋراباي تاس جولىندا ءىرى كولىك اپاتى بولعانىن ەسكە سالامىز. بىرنەشە كولىك سوعىسىپ، 4 ادام قايتىس بولدى.

ساعات 14.10 شاماسىندا اتامەكەن اۋىلىنىڭ جانىندا بۋرابايدان استاناعا كەلە جاتقان اۆتوبۋس  Nissan Cefiro كولىگىمەن سوقتىعىسقان. اۆتوبۋستىڭ ىشىندە 49 ادام بولدى. كولىكتە وتىعان ءۇش ادام سول جەردە ءتىل تارتپاستان كوز جۇمدى. ۆاز-2106 كولىگىنىڭ جۇرگىزۋشىسى دە قايتىس بولدى. ەر ادام ماشيناسىنان نە بولعانىن ءبىلۋ ءۇشىن شىققان. ءبىراق، اۆتوبۋس ءتيىپ كەتىپ، ول دا وقيعا ورنىندا قايتىس بولدى. كولىكتى كوكشەتاۋدىڭ تۇرعىنى تىزگىندەگەن. اقمولا وبلىسىنىڭ ءىىد مالىمەتىنشە ول رەسەيدە ەسەپتە تۇرعان ەكەن.

الەۋمەتتىك جەلىلەردە اپات بولعان جەردە ءۇش جاسار بالا  بولعانى تۋرالى اقپارات تارادى.

كۋاگەرلەردىڭ ايتۋىنشا كولىككە اۆتوبۋس ۇشىپ تۇسپەس ءبۇرىن ونى مايىسقان كولىكتەن شىعارىپ العان. بالا ماكينسك قالاسىنداعى جاقىن اۋرۋحاناعا جەتكىزىلدى. ءتىرى قالعان بالانىڭ تۋىستارى اۋرۋحاناعا جەتتى.