قازاقستاندا جارتى توننادان استام قان وتكىزگەن رەكوردتىق كورسەتكىشكە يە دونور بار. Cەگىز مىڭدىق شىڭداردى 14 مارتە باعىندىرعان ەڭ جاس الپينيست تە ءبىزدىڭ وتانداسىمىز. ال كەۋدەسىنە 10 كەلىدەن ارتىق مەتالل بۇيىمداردى جابىستىرا الاتىن ماگنيت-ايەل ورال قالاسىندا تۇرادى. وسىنداي ەرەكشە تۇلعالار مەن ۇزدىك كورسەتكىشتەر ءبىر جەرگە جيناقتالدى. الماتىدا ءار سالانىڭ ۇزدىكتەرى تىركەلگەن رەكوردتار كىتابىنىڭ جاڭا باسىلىمى جارىققا شىقتى.

مۇقاعالي اقىننىڭ "مەن دونورمىن" ولەڭى ومىرلىك ۇرانىنا اينالعان الەكساندر سكاكوۆسكيي وسى ۋاقىتقا دەيىن جارتى توننادان ارتىق قان وتكىزگەن. قازاقستانداعى ءنومىرى ءبىرىنشى دونور 1051 رەت قان تاپسىرعانىن ايتادى. 45 جىل بويى تالاي جانعا كومەگى تيگەن 70 جاستاعى قارياعا كوپتىڭ قوشەمەتى دە ەرەكشە.

الەكساندر سكاكوۆسكيي، دونور:

- مەن 1971 جىلدان بەرى قان تاپسىرامىن. ەڭ العاش بوسانايىن دەپ جاتقان كەلىنشەككە قان كەرەك بولىپ، مەنىڭ قانىم سايكەس كەلگەن. مەنىڭ قانىمدى قۇيىپ نارەستە مەن اناسىن امان الىپ قالدى. 

رەكوردتىق كورسەتكىشى بار وتانداستارىمىز قاتارىندا سپورتشىلار دا، الپينيستەر دە بار. ءتىپتى، الەمدە تەڭدەسى جوق دارىگەرلەر وتباسى دا رەكوردتار كىتابىنا ەنگەن. الماتىلىق دۋدايەۆتار وتباسىندا 28 ءتىس دارىگەرى بار ەكەن. ال 76 جاستاعى جان اتا ىشكى قۋاتى ارقىلى ادام سەنگىسىز ارەكەتتەر جاساسا، جامالي ديحان ۇلى 6 مەتر بيىكتىكتە 300 وتكىر پىشاقتىڭ ۇستىمەن ءجۇرىپ وتكەن. 

جامالي ديحان ۇلى، ەتنوگراف:

- ەڭ ۇلكەن جەتىستىگىم - 2014 جىلى سەمەيدىڭ قالباتاۋ وڭىرىندە وتكەن ەر جانىبەكتىڭ 300 جىلدىق اسىندا 300 پىشاقتىڭ جۇزىنەن 8 مينۋت 47 سەكۋندتا ءجۇرىپ ءوتتىم.  

وتانداسىمىزعا الەمدە باسەكەلەس جوق ەكەن. رەكوردشى ءوز كورسەتكىشىن ارى قاراي دامىتپاق. وعان قوسا، جامالي ديحان ۇلى 15228 ادامدى ءبىر ۋاقىتتا "قارا جورعا" بيىنە بيلەتكەن ادام. 13 تاراۋدان تۇراتىن رەكوردتار كىتابىندا 325 ەڭ ۇزدىك جەتىستىكتەر جازىلعان.

جاراس نيازبەك، دۋمان سۇلەيمەنوۆ