اقتوبەدە «اعايىندى تورتەۋدىڭ» ءبىرى  زاڭسىز مۇناي ساۋداسىمەن اينالىسقان ءسالافيتتى ۇستادى. تاڭ اتىسىمەن قارۋ اسىنعان ارنايى جاساق قالا شەتىندەگى مۇناي وڭدەيتىن زاۋىتتى قورشاۋعا العان. بۇل تۋرالى كتك حابارلايدى.

قازاقستاننىڭ قارۋلى كۇشتەرىنىڭ وكىلدەرى بىرنەشە اي بويى قىلمىستىق توپتى كۇزەتىپ كەلگەن. ولاردى ۇستاۋ ءۇشىن ءتارتىپ ساقشىلارىنان باستاپ، ۇلتتىق قاۋىپسىزدىك كوميتەتى مەن جەمقورلىققا قارسى كۇرەس بيۋروسىنىڭ وكىلدەرى دە جۇمىلدىرىلدى.

بەلگىلى بولعانداي، كۇدىكتىلەر راديكالدى سالافيزم اعىمىن قولداۋشىلار ەكەن. قارا التىندى زاڭسىز ساۋدالاپ، قىرۋار قارجىمەن قالتا قامپايتقانداردىڭ لاڭكەستىك پيعىلداعى توپتارمەن بايلانىسى بارى دا انىقتالعان.

ونداعىلار تاڭ اتىسىمەن قارۋ اسىنعان ساقشىلاردىڭ ساۋ ەتە قالارىن كۇتپەگەندەي. ال زاۋىتقا مۇناي اكەلگەن ونداعان كولىك قاقپا الدىندا ءيرىلىپ تۇر.

سوسىن كاسىپورىن اينالاسىن ىشكى اسكەردىڭ ساربازدارى قورشاۋعا الدى. ويتكەنى ۇرلانعان قارا التىندى قىلمىستىق توپ وسىندا تاپسىرىپ كەلگەن ەكەن. جەتكىزۋشىلەردىڭ ءبىرىن ۇلتتىق قاۋىپسىزدىك قىزمەتكەرلەرى وسى كاسىپورىنعا كەلەر جولدا ۇستاپتى. ال قاراقشىلىق جولمەن الىنعان قارا التىندى ساتۋعا دەلدالدىق ەتكەن تاعى ءبىر تۇرعىن ءوز پاتەرىنەن تۇتقىنعا الىنعان. ءوزىن دوسۋپوۆ دەپ تانىستىرعان ودان مۇنايعا قاتىستى قۇجاتتار تاركىلەندى.

قۇزىرلى ورگاندار مۇناي ۇرلىعىمەن اينالىساتىن قىلمىستىق توپتى ۇستاۋ ءۇشىن وپەراسيانى بىرنەشە اي بويى جوسپارلاپتى. ويتكەنى مۇشەلەرىنىڭ كوپتىگىنەن جانە ەلىمىزدىڭ تۇكپىر-تۇكپىرىندە تۇراتىندىعىنان ءبىراز قيىندىق تۋىنداعان. سوندىقتان تەك اقتوبەدە عانا ەمەس، قاندىاعاش قالاسىنداعى مۇناي وڭدەيتىن «ۆەرنال ويل» زاۋىتى دا قورشاۋعا الىندى. وندا دا قىلمىسكەرلەر ۇرلانعان قارا التىندى وتكىزەتىن ءوز جەلىلەرىن قۇرىپ العان ەكەن.

ولاردىڭ بارلىعىن ەركىن ءىزباساروۆ الماتىدا وتىرىپ باسقارىپتى. 50 جاستاعى بۇل ازامات قىلمىس الەمىندە «اعايىندى تورتەۋ» دەگەن لاقاپ اتپەن تانىمال توپتىڭ سەركەسى. ارباعا تاڭىلسا دا، ەلىمىزدەگى مۇناي ۇرلىعىن باقىلاپ، ونى قايدا وتكىزىپ، اقشاسىن قايدا جىبەرۋدى بۇيىرىپ وتىرعان سول دەيدى ۇلتتىق قاۋىپسىزدىك كوميتەتىندەگىلەر. ول دا بۇگىن الماتىدا وققاعارى مەن كولىك جۇرگىزۋشىمەن بىرگە كوشە بويىندا كولىگىمەن كەتىپ بارا جاتقان جەرىنەن ۇستالدى.

ۇلتتىق قاۋىپسىزدىك كوميتەتى تاراتقان مالىمەتتەرگە قاراعاندا قىلمىستىق توپتىڭ مۇشەلەرى راديكالدى سالافيتتەردى قولداۋشىلار ەكەن. وسىنداي لاڭكەستىك پيعىلداعى توپتار مۇناي ۇرلىعىمەن جۇيەلى تۇردە اينالىسىپ، تابىستى كاسىپتەن تاپقان اقشاسىنا قارۋ-جاراق ساتىپ الىپ وتىرعان. ازىرگە قىلمىستىق توپتىڭ قۇرامىندا قانشا ادامنىڭ بولعانىن جانە قانشاسىنىڭ ۇستالعانىن قۇزىرلى ورگاندار اشىپ ايتپاي وتىر.

بۇعان دەيىن اقتوبەدە ارنايى وپەراسيا جۇرگىزىلىپ جاتقانىن حابارلاعان ەدىك. كەيىنىرەك جاعدايعا قاتىستى ۇقك تۇسىنىكتەمە دە بەرگەن.

دەرەك كوزى Stan.kz