كۇمىس القا يەگەرلەرىنە پرەزيدەنتتىڭ اتىنان بەرىلگەن سىيلىق استانالىق جاندوس دۇيسەكەيەۆتىڭ شامىنا ءتيدى. ول سىيلىقتى كورگەندە تالىپ قالا جازداعان دەپ حابارلايدى NUR.KZ.
استانالىق ازاماتتىڭ جۇبايى التى بالانىڭ اناسى. جاندوس دۇيسەكەيەۆتىڭ سوزىنە قاراعاندا، ءبىر اپتا بۇرىن قالالىق اكىمشىلىكتەن حابارلاسقاندار كۇمىس القا يەگەرىنە تۇڭعىش پرەزيدەنت كۇنى مەن تاۋەلسىزدىكتىڭ 25 جىلدىعىنا وراي ەلباسىنىڭ سىيلىعى بەرىلەتىنىن ەسكەرتكەن.
«استانا قالاسى اكىمشىلىگىنەن ءبىر قىز ايەلىمنىڭ تەلەفونىنا حابارلاستى. تۇڭعىش پرەزيدەنت كۇنى مەن تاۋەلسىزدىكتىڭ 25 جىلدىعىنا وراي ەلباسىنىڭ سىيلىعىنا يە بولعانىمىزدى، قالا اكىمشىلىگىنىڭ ارنايى قىزمەتكەرلەرى كەلىپ قۇتتىقتايتىنىن ايتىپ، ۇيدە بولۋىمىزدى ءوتىندى»، — دەيدى جاندوس.
ەلباسىنىڭ ەلەپ-ەسكەرگەنىنە ريزا بولعان اتا-انا بۇل جاڭالىقتى ۇل-قىزدارىنا ايتىپ، سىيلىق كەلەتىن كۇندى اسىعا كۇتەدى.
«بالا دەگەن ارمانشىل ەمەس پە؟ پاتشادان الاتىن سىيلىقتى ءارقايسىسى وزىنشە ارمانداپ، ءبىرى كومپيۋتەر دەسە، ەكىنشىسى سمارتفون، تاعى ءبىرى قوراپ تولى شوكولاد دەدى. ۇلكەن ۇلىم 4-سىنىپ وقيتىن ەدى. ول ۇلكەندىگىن ءبىلدىرىپ، تۇڭعىش پرەزيدەنتىمىز بالاقايلارعا سىيلىق بەرگەندى جاقسى كورەدى،تالاسپاڭدار بارىمىزگە ءبىر-بىر قاپ سىيلىق بەرەدى، — دەپ ءىنى-قارىنداستارىن ەلىكتىرىپ قويدى»، — دەيدى التى بالانىڭ اكەسى.
جەتىنشى بالاسىنا اياعى اۋىر كوپبالالى انا اۋرۋحاناعا، بالا-شاعاسى مەكتەپكە بارماي استانا قالاسىنىڭ اكىمشىلىك قىزمەتكەرلەرىن تاپجىلماي ۇيدە كۇتىپ وتىرادى. ءتىپتى داستارحان جايىپ، بالالار سىيلىق اكەلگەن ادامدارعا ءوز ونەرلەرىن دايىنداپتى.
كوپتەن كۇتتىرگەن اكىمشىلىك قىزمەتكەرلەرى ۋادە ەتكەن كۇنى تۇسكە تاياۋ كەلگەن.
«تابالدىرىقتان اتتاماستان ءبىر پاكەتتى ايەلىمە ۇستاتىپ، سۋرەتكە ءتۇسىرىپ، قاعازىنا قول قويدىردى دا: «پرەزيدەنت اتىنان قۇتتىقتايمىز، سىيلىقتى قابىل الىڭىزدار»، -دەپ داستارحانعا قارايلاماستان كەتىپ قالدى. ءبىز اڭ-تاڭبىز. بالالاردا تۇسىنبەي قالدى. ءبىر كەزدە كىشكەنتاي پاكەتتى اشتىق. ىشىندەگىسىن كورىپ تالىپ قالا جازدادىق»، — دەيدى جاندوس دۇيسەكەيەۆ.
سىيلىق رەتىندە تارتىلعان پاكەتتىڭ ىشىندە ءبىر ليتر سۇيىق ماي، ءبىر كەلى كۇرىش، ءبىر كەلى قاراقۇمىق، جارتى كەلى قانت، ەكى كەلى ۇن بولعان.
«پرەزيدەنتتىڭ اتىنان مۇنداي سىيلىق جاساپ جۇرگەندەردىڭ تايازدىعىنا بالالارىمنىڭ الدىندا ۇيالعانىمنان جەرگە كىرىپ كەتە جازدادىم»، — دەيدى ول.
كوپبالالى اكە تەز ارادا وزدەرىنە وسى تۋرالى تەلەفون ارقىلى حابارلاپ ايتقان ۇيىمداستىرۋشى قىزعا مۇنىڭ ۇيات ەكەندىگىن تۇسىندىرمەكشى بولعان. الايدا اكىمشىلىكتەگىلەر جىگىتتىڭ وزىنە ۇرسىپ تاستاپتى.
«قايتا سىزدەردى ويلاپ، وسىنداي سىيلىق تاراتىپ وتىرعان ۇيىمداستىرۋشىلارعا، ەلباسىنا راحمەت ايتۋدىڭ ورنىنا «جالوبى» ايتاسىزدار دەپ ورىسشا بۇرقىلدادى»، — دەيدى جاندوس دۇيسەكەيەۆ.
