استانا سوتى سەيىتقازى جانە اسەت ماتايەۆقا قاتىستى استاناداعى ەسىل اۋداندىق №2 سوتىنىڭ ۇكىمىنە بايلانىستى اپەللياسيالىق شاعىمدى قارادى، دەپ حابارلايدى قازاقپارات.

استانا قالاسى سوتىنىڭ اپەللياسيالىق القاسىنىڭ سۋدياسى الما ەسىموۆا ماتايەۆتارعا قاتىستى العاشقى سوت ۇكىمىن وزگەرىسسىز قالدىردى. دەگەنمەن ءومىر بويىنا مەملەكەتتىك جانە كوممەرسيالىق ۇيىمدارداعى ۇيىمداستىرۋمەن جانە ماتەريالدىق جاۋاپكەرشىلىكپەن بايلانىستى باسشىلىق قىزمەتتەردى اتقارۋعا تىيىم سالۋ جازاسى وزگەردى.

«اپەللياسيالىق سوت القاسى سەيىتقازى جانە اسەت ماتايەۆقا قاتىستى 3 قازاندا استاناداعى ەسىل اۋداندىق №2 سوتىنىڭ شەشىمىن وزگەرتۋدى قاۋلى ەتتى. ءومىر بويىنا مەملەكەتتىك جانە كوممەرسيالىق ۇيىمدارداعى ۇيىمداستىرۋمەن جانە ماتەريالدىق جاۋاپكەرشىلىكپەن بايلانىستى باسشىلىق قىزمەتتەردى اتقارۋعا تىيىم سالۋ جازاسىنىڭ ورنىنا، سەيىتقازى جانە اسەت ماتايەۆقا مەملەكەتتىك جانە كوممەرسيالىق ۇيىمدارداعى ۇيىمداستىرۋمەن جانە ماتەريالدىق جاۋاپكەرشىلىكپەن بايلانىستى باسشىلىق قىزمەتتەردى اتقارۋعا 10 جىلعا دەيىن تىيىم سالۋ جازاسى تاعايىندالسىن. ۇكىمنىڭ قالعان بولىگى وزگەرىسسىز قالسىن، پروكۋروردىڭ اپەللياسيالىق كەلىسپەۋشىلىگى قاناعاتتاندىرىلسىن»، - دەدى ا. ەسىموۆا.

اتالمىش ۇكىم 9 جەلتوقساندا كۇشىنە ەنەدى.

ايتا كەتەيىك، 3 قازاندا استاناداعى ەسىل اۋداندىق №2 سوتىنىڭ شەشىمىمەن، مەملەكەت بيۋدجەتىنەن ءىرى كولەمدە اقشا جىمقىردى جانە 300 ملن تەڭگە سالىقتى تولەۋدەن جالتاردى دەپ ايىپتالعان

سەيىتقازى ماتايەۆ 6 جىلعا باس بوستاندىعىنان ايىرىلعان بولاتىن. ال ونىڭ بالاسى اسەت ماتايەۆ 5 جىلعا باس بوستاندىعىنان ايىرىلدى. سەيىتقازى ماتايەۆ پەن ونىڭ بالاسى، «كازتاگ» حاا باس ديرەكتورى اسەت ماتايەۆ ءوزارا سىبايلاسا وتىرىپ، 300 ميلليون تەڭگە جىمقىردى دەپ ايىپتالعان بولاتىن. بۇعان قوسا، تەرگەۋ شارالارى سەيىتقازى ماتايەۆتىڭ 327 ملن تەڭگە كولەمىندەگى سالىقتان جالتارىپ جۇرگەنىن انىقتاعان بولاتىن. سەيىتقازى ماتايەۆ ق ر قك 177-بابىنىڭ 4ء-بولىمىنىڭ ب تارماعى بويىنشا جانە ق ر قك 245-بابىنىڭ 3ء-بولىمىنىڭ، 190-بابى، 4- ءبولىمىنىڭ 2-تارماعى بويىنشا كىنالى دەپ تانىلدى. ونىڭ دۇنيە-مۇلكى تاركىلەنىپ، 6 جىلعا باس بوستاندىعىنان ايىرۋ تۋرالى جازا تاعايىندالدى. اسەت ماتايەۆ تا ق ر قك 194-بابى 4ء-بولىمى، 190-باپتىڭ 4-تارماعىندا كورسەتىلگەن قىلمىستار بويىنشا كىنالى دەپ تانىلدى. اتالعان باپتار نەگىزىندە «كازتاگ» حاا بۇرىنعى باسشىسىنىڭ دۇنيە-مۇلكى تاركىلەنە وتىرىپ، 5 جىلعا باس بوستاندىعىنان ايىرىلدى.